এছিয়া মহাদেশৰ অন্যতম বৃহৎ আৰু অত্যাধুনিক কৃষি অনুসন্ধান বা গৱেষণা প্ৰতিষ্ঠান হিচাপে বিবেচিত ভাৰতীয় কৃষি গৱেষণা প্ৰতিষ্ঠান চমুকৈ আইকাৰৰ সপ্তম সংখ্যক প্ৰতিষ্ঠা দিৱস আজি উদ্যাপন কৰা হয় ৷ ধেমাজি জিলাৰ গোগামুখৰ দিৰপাইস্থিত কৃষি গৱেষণা প্ৰতিষ্ঠানৰ প্ৰশাসনিক ভৱনত গাম্ভীৰ্যপূৰ্ণ পৰিৱেশত উদ্যাপন কৰা উক্ত অনুষ্ঠানৰ পুৱা ১০-৩০ বজাত আইকাৰৰ শিৰোনাম গীত পৰিৱেশন কৰা হয় ৷
১০-৩৫ বজাত সৰস্বতী বন্দনা আৰু সমবেত সংগীত পৰিৱেশন কৰা হয় ৷ ১০-৩৫ বজাত আদৰণি ভাষণ দিয়ে জেষ্ঠ বিজ্ঞানী তথা আইকাৰ গোগামুখৰ তত্বাবধায়ক ড° দীপজ্যোতি বৰুৱাই ৷ আদৰণি ভাষণত তেওঁ কয়- ২০১৭ চনত গোগামুখস্থিত আইকাৰ প্ৰতিষ্ঠা হৈছিল ৷ প্ৰতিষ্ঠা লগ্নৰ পৰা আইকাৰৰ নিৰ্মাণ কাৰ্য যিমান দূৰ ইমান দ্ৰুত কৰি তোলা হৈছে ৷ প্ৰশাসনিক ভৱন, অতিথিশালাৰ নিৰ্মাণ ইতিমধ্যে সম্পূৰ্ণ কৰা হৈছে ৷ গৱেষণাৰ বিভাগীয় গৃহ সমূহ নিৰ্মাণ চলি আছে ৷ গৱেষক ছাত্ৰ-ছাত্ৰীৰ আৱাস সমূহৰ নিৰ্মাণ সম্পূৰ্ণ হোৱাৰ পথত আগবাঢ়িছে ৷ গৱেষক ছাত্ৰ-ছাত্ৰীৰ আৱাস সমূহৰ নিৰ্মাণ সম্পূৰ্ণ হ’লেই তেওঁলোকৰ পাঠদান কাৰ্যসূচীও আৰম্ভ হ’ব ৷ তেওঁ কয়- বৰ্তমান আইকাৰত ২৮ গৰাকী বিজ্ঞানীয়ে নিজৰ নিজৰ বিভাগত আগতীয়াাকৈ কাম কৰি আছে ৷ আগন্তুক ২০২৪ চনৰ পৰা আইকাৰত পাঠদান কাৰ্যসূচী আৰম্ভ হ’ব আৰু তেতিয়ালৈকে আইকাৰৰ সকলোবোৰ আন্তগাঁথনি সম্পূৰ্ণ হ’ব বুলিও তেওঁ দোহাৰে ৷ আইকাৰৰ সকলো ধৰণৰ নিৰ্মাণ কাৰ্য সুন্দৰভাৱে পৰিচালনা কৰাত গোগামুখবাসী ৰাইজৰ সহযোগীতাক তেওঁ শলাগ লয় ৷ ১০-৫৫ বজাত আইকাৰ সন্দৰ্ভত চমু বক্তব্য আগবঢ়াই আইকাৰ গোগামুখৰ প্ৰধান বিজ্ঞানী ড° এ কে শ্ৰীবাস্তৱে ৷ ১১-১০ বজাত আইকাৰ গোগামুখৰ ন’ডেল বিষয়া ড° ৰবীন গগৈয়ে আইকাৰৰ প্ৰতিষ্ঠা দিৱস উপলক্ষে সকলোলৈকে শুভবাৰ্তা প্ৰেৰণ কৰে ৷ ১১-১৫ বজাত ‘ভাৰতীয় কৃষিত উদ্ভিদৰ জৈৱ বৈচিত্ৰ্য আৰু জাতৰ বিকাশৰ ভূমিকা’ শীৰ্ষক আলোচনা চক্ৰ অনুষ্ঠিত হয় ৷ ১১-৩০ বজাত ৫ গৰাকী সফল কৃষকক সম্বৰ্ধনা জনোৱা হয় । কৃষক সকল হৈছে জয় পেগু, অনুজ দলে, বনশ্ৰী হাজৰিকা, গিৰিজাপ্ৰসাদ দলে আৰু ৰজত পাৱে ৷
দুপৰীয়া ১২ বজাত সন্মানীয় অতিথি হিচাপে উদ্যান শস্য আৰু বনাঞ্চলৰ ওপৰত ভাষণ দিয়ে অৰুণাচল প্ৰদেশৰ পাচিঘাট কৃষি মহাবিদ্যালয়ৰ বিজ্ঞানী ড° বি এন হাজৰিকাই ৷ ১২-১৫ বজাত আমন্ত্ৰিত অতিথিৰ ভাষণ দিয়ে ধেমাজি জিলাৰ উপায়ুক্ত অংকুৰ ভৰালীয়ে ৷ ১২-২৫ বজাত কৃষিত চৰাইৰ পৰিৱেশত পৰিৱেশ তন্ত্ৰ সেৱা শীৰ্ষক বিষয়ৰ ওপৰত ভাষণ দিয়ে অসম কৃষি বিজ্ঞান বিশ্ব বিদ্যালয়ৰ লখিমপুৰ চৌহদৰ মুখ্য বিজ্ঞানী ড° প্ৰবাল শইকীয়াই ৷ বিয়লি ১ বজাত উপস্থিত ৰাইজক উদ্দেশ্যি ভাষণ দিয়ে মিচিং স্বায়ত্তশাসিত পৰিষদৰ মুখ্য কাৰ্যবাহী সদস্য পৰমানন্দ চায়েঙ্গীয়াই ৷ ১-২০ বজাত শলাগৰ শৰাই আগবঢ়াই প্ৰধান বিজ্ঞানী ড° এছ মনিবন্ননে ৷ উল্লেখনীয় যে ২০১৭ চনৰ আজিৰ দিনটোতে গোগামখ দিৰপাইস্থিত ভাৰতীয় কৃষি গৱেষণা প্ৰতিষ্ঠানখন স্থাপন কৰা হৈছিল ৷ অনুষ্ঠানত উপস্থিত থাকে গোগামুখ মহাবিদ্যালয়ৰ অধ্যক্ষ ড° দিলীপ কুমাৰ ঝা, আইকাৰৰ প্ৰাক্তন ন’ডেল বিষয়া ড° কে বি পন আদিয়ে ৷