বাংলাদেশৰ শৰণাৰ্থী শিবিৰৰ পৰা নাৱেৰে পলায়ন কৰা ১৮০ জন যাত্ৰীৰ নাও ডুব গৈছে মহাসাগৰৰ বুকুত…
বাংলাদেশৰ শৰণাৰ্থী শিবিৰৰ পৰা নাৱেৰে পলায়ন কৰা ১৮০ জন যাত্ৰীৰ নাও ডুব গৈছে মহাসাগৰৰ বুকুত। ৰাষ্ট্ৰসংঘৰ শৰণাৰ্থী সংস্থাই আশংকা কৰা মতে সাগৰ তলি ইতিমধ্যে পোত খাই গৈছে ডুবন্ত নাওখন। সাগৰৰ বুকুত নাওখনৰ ১৮০ গৰাকী যাত্ৰীয়েই সলিল সমাধি ঘটিছে বুলি আশংকা কৰা হৈছে।
উল্লেখ্য যে ম্যানমাৰৰ পৰা পলায়ন কৰি বাংলাদেশৰ শৰণাৰ্থী শিবিৰত আশ্ৰয় লৈছে কমেও ১০ লাখ ৰোহিংগীয়াই। ম্যানমাৰত বৌদ্ধ ধৰ্ম সংখ্যাগৰিষ্ঠ। সেইবাবেই সেই দেশৰ সেনাই সংখ্যালঘু ৰহিংগীয়াক আক্ৰমণ কৰিছিল। সেয়ে ২০১৭ চনৰ পৰা ম্যানমাৰ এৰি আশ্ৰয়ৰ বাবে বাংলাদেশলৈ আহিছিল ৰহিংগীয়াসকল।
ৰাষ্ট্ৰসংঘৰ শৰণাৰ্থী উচ্চায়ুক্তৰ তথ্য অনুসৰি নৱেম্বৰৰ শেষৰ ফালে ৰোহিংগীয়া শৰণাৰ্থী কঢ়িয়াই আনিবৰ বাবে বাংলাদেশৰ ফালে এখন নাও আহিছিল। ডিচেম্বৰৰ আৰম্ভণিতে সেই নাওখনত ফাট মেলা দেখা গৈছিল। ইয়াৰ পিছত নাওখনৰ লগত যোগাযোগ স্থাপন কৰিব পৰা হোৱা নাছিল।
তেতিয়াৰ পৰাই নাওখনৰ কোনো সন্ধান পোৱা নগ’ল। গতিকে নাওখনত থকা ১৮০ জন লোকৰ আটাইকেইজনৰেই মৃত্যু হোৱাৰ সন্দেহ প্ৰকাশ কৰিছে ৰাষ্ট্ৰসংঘৰ শৰণাৰ্থী সংস্থাই। ৰাষ্ট্ৰসংঘৰ শৰণাৰ্থী উচ্চায়ুক্তৰ মুখপাত্ৰ বাবৰ বালোচে আশা কৰিছে যে কোনোবা যাত্ৰী হয়তো এতিয়াও ক’ৰবাত জীয়াই আছে।