গোৱালপাৰাত পুনৰ ৰাষ্ট্ৰীয় ঘাইপথত দুৰ্ঘটনাই প্ৰাণ কাঢ়িলে এজন যুৱকৰ।
দৰংগিৰি আৰু বেকিপুলত সংঘটিত হোৱা দুটা পথ দুৰ্ঘটনাত নিহত হৈছিল ৪ গৰাকী যুৱক। সেই ঘটনাৰ ২৪ ঘন্টা নৌহওঁতেই আন এক পথ দুৰ্ঘটনাত থিতাতে নিহত হ’ল দ্বীপজ্যোতি কলিতা নামৰ এজন যুৱক। দুধনৈৰ ১৭ নং ৰাষ্ট্ৰীয় ঘাইপথৰ নিদানপুৰ-চৰাইমাৰী পথৰ মাজতে এক ভয়ংকৰ পথ দুৰ্ঘটনা সংঘটিত হয়।
এখন তীব্ৰবেগী আল্ট্ৰা বাছে মহটিয়াই নিলে পালচাৰ বাইকসহ দ্বীপজ্যোতি কলিতা নামৰ যুৱক জনক। বাছৰ খুন্দাত পথৰ পৰা দ’ খাৱৈত চিটিকি পৰে যুৱকজন আৰু বাইকখন। দুৰ্ঘটনা সংঘটিত কৰা বাছখন দুধনৈ আৰক্ষীয়ে ইতিমধ্যে জব্দ কৰিবলৈ সক্ষম হৈছে ৷
জানিব পৰা মতে, ৰাষ্ট্ৰীয় ঘাইপথৰ ঠিক সোঁমাজতে এখন চিলিণ্ডাৰ ভৰ্তি ট্ৰাক ৰখাই থোৱা আছিল আৰু তীব্ৰবেগত অহা বাছখনে ট্ৰাকখন অতিক্ৰম কৰিবলৈ লওঁতে সমুখৰ পৰা অৰ্থাৎ দুধনৈৰ পৰা ৰংজুলি গৈ থকা বাইকসহ আৰোহীক প্ৰচণ্ড খুন্দা মাৰে, যাৰ ফলত এই পথ দুৰ্ঘটনাটো সংঘটিত হয়।
উক্ত ট্ৰাকখনৰ কাৰণে এই দুৰ্ঘটনাটো সংঘটিত হোৱাৰ সন্দেহ কৰা হৈছে ৷ ঘটনাস্থলীৰ পৰা মৃতদেহটো আৰক্ষীয়ে উদ্ধাৰ কৰিছে ৷ নিহত দ্বীপজ্যোতি কলিতাৰ ঘৰ ৰংজুলিত ৷