অজয় মাকেন, অৰবিন্দৰ সিং লাভলী, সন্দীপ দীক্ষিতঃ সুৰা নীতি কেলেংকাৰীত অৰবিন্দ কেজৰিৱালৰ বিৰুদ্ধে প্ৰথমে অভিযোগ উত্থাপন কৰা কংগ্ৰেছ নেতাসকলেই সমদল কৰিছে এতিয়া কেজৰিৱালৰ সমৰ্থনত!

একালৰ শত্ৰু এতিয়া হৈছে মিত্ৰ! ৰাজনৈতিক পাকচক্ৰৰ এক যেন খেলা। এসময়ত অৰবিন্দ কেজৰিৱালৰ বিৰুদ্ধে দীল্লীৰ সুৰা কেলেংকাৰীৰ অভিযোগ উত্থাপন কৰা একাংশ কংগ্ৰেছ নেতাই এতিয়া সুৰা নীতিৰ কেলেংকাৰীত গ্ৰেপ্তাৰ হোৱা কেজৰিৱালৰ সমৰ্থনত সৰব হৈ পৰিছে। কংগ্ৰেছ দলে দিল্লীৰ মুখ্যমন্ত্ৰী অৰবিন্দ কেজৰিৱালৰ আবকাৰী নীতিৰ গোচৰত জড়িত থকাৰ অভিযোগ আৰু তাৰ পিছত প্ৰৱৰ্তন সঞ্চালকালয়ৰ (ইডি) দ্বাৰা গ্ৰেপ্তাৰ কৰা আদি ঘটনাৱলীত কংগ্ৰেছে যেন লুটিবাগৰ মাৰিলে। আবকাৰী নীতিৰ গোচৰত ইডিৰ পদক্ষেপ আৰু শেহতীয়াকৈ আগন্তুক ২০২৪ চনৰ লোকসভা নিৰ্বাচনৰ বাবে কংগ্ৰেছ আৰু আম আদমী পাৰ্টিৰ (আপ) মাজত আসন ভাগ-বতৰা বুজাবুজিৰ চুক্তিৰ বাবেই কংগ্ৰেছে এতিয়া পূৰ্বৰ স্থিতিৰ পৰা আঁতৰি আহি কেজৰিৱালক সমৰ্থন জনাইছে। মাত্ৰ এবছৰ আগতে, অজয় মাকেন, অৰবিন্দৰ সিং লাভলী, অনিল চৌধুৰী আৰু সন্দীপ দীক্ষিতকে ধৰি কংগ্ৰেছ দলৰ গুৰুত্বপূৰ্ণ ব্যক্তিসকলে ২০২৩ চনত দিল্লীক জোকাৰি যোৱা সুৰা নীতি কেলেংকাৰীৰ সন্দৰ্ভত অৰবিন্দ কেজৰিৱালক অভিযুক্ত কৰাৰ ক্ষেত্ৰত মুখ্য ভূমিকৈা গ্ৰহণ কৰিছিল। তেওঁলোকে কেজৰিৱালৰ পদত্যাগৰ দাবীত প্ৰতিবাদ সংগঠিত কৰিছিল, দুৰ্নীতিৰ অভিযোগত কেজৰিৱালৰ পদত্যাগ দাবী কৰিছিল। চিবিআইয়ে কেজৰিৱালৰ ডেপুটি মনীষ চিছোদিয়াক গ্ৰেপ্তাৰ কৰাৰ পিছত মুখ্যমন্ত্ৰী অৰবিন্দ কেজৰিৱালৰ পদত্যাগ দাবী কৰি কংগ্ৰেছ নেতাসকলে আম আদমী পাৰ্টিৰ কাৰ্যালয়ৰ ওচৰত অনিল চৌধুৰীৰ নেতৃত্বত প্ৰতিবাদ সাব্যস্ত কৰিছিল। দলটোৱে কৈছিল যে যেতিয়ালৈকে অৰবিন্দ কেজৰিৱাল শাসনত থাকে তেতিয়ালৈকে উচিত তদন্ত সম্ভৱ নহ’ব। “সমগ্ৰ দিল্লী চৰকাৰ দুৰ্নীতিত সম্পূৰ্ণৰূপে নিমজ্জিত হৈ আছে। যেতিয়ালৈকে কেজৰিৱাল শাসনত থাকিব, সুৰা কেলেংকাৰীৰ স্বতন্ত্ৰ তদন্ত নহ’ব, আৰু সেয়েহে, তেওঁ পদত্যাগপত্ৰ দাখিল কৰা উচিত,” চৌধুৰীয়ে কৈছিল।

কংগ্ৰেছ দলে কেজৰিৱালৰ প্ৰৱঞ্চনামূলক সুৰা নীতি বুলি কোৱা সন্দৰ্ভত এক আনুষ্ঠানিক অভিযোগো দাখিল কৰিছিল। এআইচিচিমিডিয়া চেলৰ মুৰব্বী পৱন খেৰাই তদন্ত আৰম্ভ কৰাৰ কৃতিত্ব দাবী কৰিছিল, কংগ্ৰেছৰ হেঁচাৰ ফলত বিজেপি নেতৃত্বাধীন কেন্দ্ৰই দিল্লী সুৰা কেলেংকাৰীৰ তদন্ত কৰিবলৈ বাধ্য হৈছিল। কিন্তু এতিয়াী সেইসকল কংগ্ৰেছ নেতাই কেজৰিৱালৰ বাবে ঘঁৰিয়ালৰ চকুপানী টুকিছে।