বৰদৌলগুৰিত এজেপি,ৰাইজৰ দলক মহাজোঁটত চামিল হবলৈ আহ্বান কংগ্ৰেছ নেত্ৰীৰ
সমাগত বিধান সভাৰ নিৰ্বাচন । দৰং জিলাতো তৎপৰতা বৃদ্ধি পাইছে ৰাজনৈতিক দল সমূহৰ ৷ এই বিধানসভা নিৰ্বাচনৰ বাবে ৰাজ্যখনৰ অন্যান্য সমষ্টিৰ দৰে ছিপাঝাৰ সমষ্টিতো তৎপৰ হৈ পৰিছে ৰাজ্যখনৰ প্ৰধান বিৰোধী দল কংগ্ৰেছ ।
বুধবাৰে বৰদৌলগুৰি যুৱ কংগ্ৰেছৰ সভাপতি ধন ৰাজৰ নেতৃত্বত স্থানীয় কংগ্ৰেছৰ কৰ্মীৰ সহযোগত আয়োজিত কংগ্ৰেছৰ এখন কৰ্মী সভাত বিজেপিৰ বিৰুদ্ধে কেইবাটাও তাৎপৰ্যপূৰ্ণ বক্তব্য আগবঢ়ায় কংগ্ৰেছ নেত্ৰী সত্যৰানী কলিতাই ।
এইবাৰ ২০২১ৰ বিধানসভা নিৰ্বাচনত কংগ্ৰেছ দলে বৃহৎ সংখ্যক ভোট লাভ কৰিব বুলি দৃঢ়তাৰে ঘোষণা কৰে ৷ কৰ্মীসভাৰ পিছতে সংবাদ মাধ্যমৰ সন্মুখত কলিতাই এইবাৰ ছিপাঝাৰ সমষ্টি মহিলাৰ বাবে সংৰক্ষিত হোৱাৰ সম্ভাৱনা থকা বুলি উল্লেখ কৰি প্ৰবীন কংগ্ৰেছ নেত্ৰী সত্যৰাণী কলিতাই ছিপাঝাৰৰ জীয়াৰী হিচাবে হাইকমাণ্ডৰ ওচৰত সমষ্টিটোৰপৰা টিকট বিচাৰিব বুলি জানিব দিয়ে ৷
নেত্ৰীগৰাকীয়ে এজেপি,ৰাইজৰ দলক মহাজোঁটত চামিল হবলৈ আহ্বান জনায় ৷ এওঁলোকৰ সবল নেতৃত্বই আগন্তুক দিনত কংগ্ৰেছ দলটিক আৰু অধিক শক্তিশালী কৰি তুলিব বুলি কংগ্ৰেছ কৰ্মী সকল আশা প্ৰকাশ কৰিছে ।
বিজেপিৰ দখলৰ পৰা সমষ্টিটো আগন্তুক নিৰ্বাচনত কেনেকৈ আকৌ নিজৰ দখললৈ আনিব আৰু এইক্ষেত্ৰত কেনেধৰণৰ ৰণকৌশল অৱলম্বন কৰিব সেইটো লক্ষ্যণীয় হব ।
কালিৰ সভাত উপস্থিত থাকে দৰং জিলা কংগ্ৰেছৰ উপ সভাপতি ইছমাইল আলী, বৰদৌলগুৰি মণ্ডল কংগ্ৰেছৰ সভাপতি পবিত্ৰ বৰুৱা, ছিপাঝাৰ ব্লক কংগ্ৰেছৰ ছাহজিদ ৰহমান প্ৰমুখ্যে শতাধিক জ্যেষ্ঠ-কনিষ্ঠ কংগ্ৰেছ নেতা ৷