Breaking

প্ৰধান মন্ত্ৰী কিষাণ সন্মান নিধিৰ তালিকাত অনিয়মৰ অভিযোগ : পঞ্চায়ত প্ৰতিনিধিৰ পৰিয়ালৰ নাম অন্তভূক্তৰে অভিলেখ কলিয়াবৰত

0 49

কলিয়াবৰ

কলিয়াবৰ মহকুমাৰ পশ্চিম কলিয়াবৰ উন্নয়ন খণ্ডৰ অন্তৰ্গত ৰহধলা গাঁও পঞ্চায়তত প্ৰধান মন্ত্ৰী কিষাণ সন্মান নিধিৰ তালিকাত বিয়াগোম কেলেঙ্কাৰীয়ে সকলোৰে চকু কপালত তুলিছে। তালিকাত একেটা পৰিয়ালৰ একাধিক সদস‍্যৰ লগতে চাকৰীয়াল, ছাত্ৰ-বৃদ্ধৰয়ম সমাহাৰ দেখা গৈছে। ৰহধলা গাঁও পঞ্চায়তৰ শিৱস্থান গাঁও ৩ নং গাঁও সভা (ৱাৰ্ড)ৰ সদস‍্যা অনিতা শইকীয়া ওৰফে জানমণিৰ পৰিয়ালৰ সদস‍্য তথা মাতৃৰ পৰিয়ালৰো সদস‍্যৰ নাম প্ৰধান মন্ত্ৰী কিষাণ সন্মান নিধিৰ তালিকাত সন্নিবিষ্ট হোৱাত গাঁওবাসীয়ে তীব্ৰ ক্ষোভ প্ৰকাশ কৰিছে।গাঁওখনৰ খাটি খোৱা বহু প্ৰকৃত কৃষক বাদ পৰা তালিকাখনত একে পৰিয়ালৰ একাধিক সদস‍্য তালিকাভূক্ত হৈছে। গাঁওখনৰ প্ৰকৃত হিতাধিকাৰীৰ বিপৰীতে কেইবাটাও পৰিয়ালৰ একাধিক সদস‍্যই এই তালিকাত অন্তৰ্ভূক্ত হৈছে। গাঁওখনৰ গাঁওসভাৰ সদস‍্যা অনিতা শইকীয়াৰ আঞ্জুকপানীৰ বাসিন্দা পিতৃ আৰু মাতৃ, স্বামী, গঢ়গুৰি গাঁওসভা এলেকাৰ বাসিন্দা মোমায়েক, মামীয়েক, মোমায়েকৰ পুত্ৰৰ নামো এই তালিকত অন্তৰ্ভূক্ত হৈছে। আনহাতে, চামগুৰি সমষ্টিৰ মূল বাসিন্দা জনৈক দেৱ উপাধিৰ ছাত্ৰী এগৰাকীৰো নাম পিএমকেএছ নিধিৰ হিতাধিকাৰী তালিকাত স্বজন-তোষণ আৰু নিজ-খেয়াল খুছি মতে অন্তৰ্ভূক্ত হোৱাত ক্ষোভত ফাটি পৰিছে গাঁওবাসী। তদুপৰি, আঙ্গনবাড়ী কৰ্মী, বিবাহ সূত্ৰে চামগুৰিৰ বাসিন্দা নামো তালিকাভূক্ত হোৱাত চৰকাৰী আঁচনিৰ বাস্তৱ ৰূপে সকলোকে স্তম্ভিত কৰি তুলিছে।গাঁওখনৰ কেইবাগৰাকী ব‍্যক্তিৰ মহাত্মা গান্ধী গ্ৰাম ৰোজগাৰ যোজনাৰ তালিকাভূক্ত যদিও তেওঁলোকৰ বেঙ্ক একাউণ্টত আজিলৈকে এটকাও জমা নোহোৱাৰ অভিযোগ উঠিছে। প্ৰধান মন্ত্ৰী কিষাণ সন্মান নিধিৰ এই বিয়াগোম কেলেঙ্কাৰীৰ বিষয়ে গাঁওবাসীয়ে ইতিমধ‍্যে লিখিতভাৱে প্ৰকৃত কৃষকক বঞ্চিত কৰি প্ৰস্তুত কৰা তালিকাৰ সমগ্ৰ অভিযোগ কলিয়াবৰ মহকুমাৰ মহকুমাধিপতিলৈ প্ৰেৰণ কৰিছে। গাঁওবাসী এই বিষয়ে কলিয়াবৰৰ বিধায়ক তথা মন্ত্ৰী কেশৱ মহন্তকো অৱগত কৰাৰ পৰিকল্পনা কৰিছে‌।