লোকসভাত অমিত শ্বাহৰ উদাত্ত ভাষণ। ‘বিৰোধীৰ মিত্ৰতা ‘অৰ্থহীন’, পুনৰ প্ৰধানমন্ত্ৰী হ’ব মোদীয়েই…

বিৰোধী মিত্ৰজোঁটক আজি লোকসভাৰ মজিয়াত উভতি ধৰে কেন্দ্ৰীয় গৃহমন্ত্ৰী অমিত শ্বাহে। লোকসভাত কেন্দ্ৰীয় মন্ত্ৰী শ্বাহে বিৰোধী মিত্ৰজোঁট আই এন ডি আই এক তীব্ৰ আক্ৰমণ চলাই কয় যে তেওঁলোকৰ মিত্ৰতাই কোনো উদ্দেশ্য পূৰণ নকৰে, কিয়নো প্ৰধানমন্ত্ৰী নৰেন্দ্ৰ মোদী পুনৰ নিৰ্ণায়ক সংখ্যাগৰিষ্ঠতাৰে ক্ষমতালৈ উভতি আহিবলৈ সাজু হৈছে। দিল্লী চৰকাৰৰ ৰাষ্ট্ৰীয় ৰাজধানী অঞ্চল (সংশোধনী) বিধেয়ক, ২০২৩ক কেন্দ্ৰ কৰি আৰম্ভ হোৱা বিতৰ্কৰ মাজতে শ্বাহে এনেদৰে কয়।এই বিধেয়কৰ উদ্দেশ্য হৈছে দিল্লীৰ বিষয়ত কেন্দ্ৰীয় চৰকাৰক অধিক ক্ষমতা প্ৰদান কৰা। বিধেয়কখনৰ সমৰ্থনত বক্তব্য প্ৰদান কৰি শ্বাহে বিৰোধীপক্ষক তীব্ৰ সমালোচনা কৰে।

শ্বাহে কয় ” এয়া উপযুক্ত সময় যে আমি কেৱল মিত্ৰতাৰ বাবে ৰাজনীতিত জড়িত হোৱাৰ পৰিৱৰ্তে দিল্লীৰ কল্যাণৰ বি?ত গুৰুত্ব দিব লাগে। আইন আৰু বিধেয়কসমূহ দেশৰ লাভালাভৰ বাবে উত্থাপন কৰা হয়, ক্ষমতাৰ খেলৰ বাবে নহয়,” । শ্বাহে বিৰোধী সাংসদসকলক গুৰুত্বপূৰ্ণ বিষয়বোৰকলৈ ৰাজনীতি কৰাৰ পৰা বিৰত থাকিবলৈও আহ্বান জনায়। কেন্দ্ৰীয় মন্ত্ৰীগৰাকীয়ে কংগ্ৰেছক আহ্বান জনাই কয় -তেওঁলোকে “সঠিক পথত কাম” কৰক। শ্বাহে জোৰ দি কয় যে ৰাইজে বিৰোধীৰ কাৰ্যকলাপ নিবিড়ভাৱে লক্ষ্য কৰি আছে আৰু আগন্তুক নিৰ্বাচনত তেওঁলোকক জবাবদিহি কৰিব।

দিল্লীৰ ৰাষ্ট্ৰীয় ৰাজধানী অঞ্চল (সংশোধনী) বিধেয়ক, ২০২৩ সন্দৰ্ভত শ্বাহে স্পষ্ট কৰি দিয়ে যে ইয়াৰ উদ্দেশ্য অধিকাৰ উলংঘন কৰা নহয়, বৰঞ্চ দুৰ্নীতিৰ মোকাবিলা কৰা। বিধেয়কখনে কেন্দ্ৰীয় চৰকাৰক দিল্লীৰ ৰাষ্ট্ৰীয় ৰাজধানী অঞ্চলৰ চৰকাৰৰ সৈতে সম্পৰ্কিত নিয়ম-কানুন প্ৰস্তুত কৰাৰ ক্ষমতা প্ৰদান কৰিব , যাৰ ভিতৰত আছে বিষয়া আৰু কৰ্মচাৰীসকলৰ সেৱাৰ কাৰ্য আৰু চৰ্তাৱলী।” শ্বাহে কয় যে কেৱল ৰাজনৈতিক মিত্ৰতা গঠন কৰি জনসাধাৰণৰ বিশ্বাস জিকিব নোৱাৰি; এয়া দেশৰ সমৃদ্ধিৰ প্ৰতি প্ৰকৃত সমৰ্পণৰ জৰিয়তে অৰ্জন কৰা সম্ভৱ। তেওঁ বিৰোধীৰ মিত্ৰতাৰ পিছতো মোদীয়েই পুনৰ প্ৰধানমন্ত্ৰী হ’ব বুলি দৃঢ়তাৰে কয়।