থানাত মহিলা আৰক্ষীক চৰ মৰাৰ ভাবুকি দি গ্ৰেপ্তাৰ ৰূপাৰানী ভূঞা : ন্যায়িক জিম্মালৈ প্ৰেৰণ

মঙলদৈ

অৱশেষত আৰক্ষী গ্ৰেপ্তাৰ কৰিলে বিৰ্তকিত প্ৰবক্তা ৰূপাৰাণী ভূঞাক। বুধবাৰে দৰং জিলা আৰক্ষীয়ে ৰূপাৰাণী ভূঞাক গ্ৰেপ্তাৰ কৰি বৰ্তমান থানাতে ৰাখিছে। প্ৰবক্তাগৰাকীয়ে কিছুদিনৰ পৰা সামাজিক মাধ্যমত আপলোড কৰা বিতৰ্কিত পোষ্টৰ ওপৰত ভিত্তি কৰি বহুকেইটা সংগঠনে এজাহাৰো দাখিল কৰিছিল। উল্লেখ্য যে মঙলদৈ থানাৰ মহিলা কোষৰ উপ পৰিদৰ্শিকাক দুৰ্ব্যৱহাৰ কৰাকলৈবুধবাৰে কাৰাগাৰলৈ প্ৰেৰণ কৰে মঙলদৈ মহাবিদ্যালয়ৰ প্ৰৱক্তা ৰূপাৰাণী ভূঞা। ছ’চিয়েল মিডিয়াত চৈয়দ আব্দুল মালিকৰ কবিতা বিকৃতকৰণ, সাম্প্ৰদায়িক পোষ্ট লিখা আদি কেবাটাও বিষয়কলৈ দৰং আৰক্ষীয়ে দিনৰ ভাগত সোধপোচ কৰি থকাৰ সময়তে তদন্তকাৰী বিষয়া টুইংকল গোস্বামীক চৰিয়াবলৈ উদ্যত হয়। এইলৈ ২৬৪/২০ নং গোচৰ ৰুজু কৰে আৰু আৰক্ষীয়ে কৰ্তব্যত বাধা দানৰ ধাৰাত কাৰাগাৰতৈ প্ৰেৰণ কৰে৷ লক্ষনীয় যে ভূঞাৰ বিৰুদ্ধে মঙলদৈ থানাত দুটা আৰু হাতীগাঁও থানাত মুঠতে ৩টা গোচৰ ৰুজু হয়। বিপৰীতে ভূঞাই ছ’চিয়েল মিডিয়াত ভাবুকি, অশালীন ব্যৱহাৰ কৰাকলৈ আন এটা গোচৰ ৰুজু কৰে। সমুদায় ৪টা গোচৰৰ তদন্ত চলি আছিল আৰু বুধবাৰে বক্তব্য গ্ৰহণৰ বাবে ভূঞা উপস্হিত হয় দিনৰ প্ৰায় ১২ বজাত। তদন্তৰ সময়ত পোনতে আৰক্ষী অধীক্ষকৰ কাৰ্যালয় আৰু পাছলৈ মঙলদৈ থানাৰ মহিলা কোষত দৰঙৰ হেডকোৱাৰ্টাৰ ডিএছপি মামনি হাজৰিকাই ভূঞাৰ বক্তব্য গ্ৰহণ কৰাৰ উপৰি উপ পৰিদৰ্শক টুইংকল গোস্বামীয়েও সোধপোচ কৰে। কিন্তু ভূঞাই বাৰে বাৰে তেওঁৰ বিৰুদ্ধে এফবিত পোষ্ট দিয়াসকলক কিয় আটক কৰা নাই তাকলৈ বাক বিতণ্ডাত লিপ্ত হয়। ইয়াৰ মাজতে বৈদ্যুতিন মাধ্যমত বক্তব্য ৰাখিবলৈ ওলাই অহাত ভূঞাক হাতত ধৰি বাধা দিয়াত গোস্বামীক চৰিয়াম বুলি ভাবুকি দিয়ে। সমগ্ৰ সময়চোৱাত তীব্ৰ বাক বিতণ্ডাৰ পাছত আবেলি ৫ বজাত উপ পৰিদৰ্শক গোস্বামীয়ে দিয়া এজাহাৰৰ ভিত্তিত কাৰাগাৰলৈ প্ৰেৰণ কৰা বুলি মঙলদৈ সদৰ থানাৰ ভাৰপ্ৰাপ্ত বিষয়া নিৰঞ্জন বৰুৱাই সদৰি কৰে। আৰক্ষীয়ে ভূঞাক আৰু জিম্মাত নলয় বুলিও প্ৰকাশ কৰে। ইপিনে ভূঞাক কৰায়ত্ত কৰাকলৈ গুণমুগ্ধসকলে তীব্ৰ প্ৰতিক্ৰিয়া ব্যক্ত কৰি হিন্দুৰ নাম ল’লেই সাম্প্ৰদায়িক হৈ যায় বুলি ক্ষোভ প্ৰকাশ কৰে। তেওলোকে ভূঞাই দাখিল কৰা আনখন এজাহাৰ সন্দৰ্ভত কি পদক্ষেপ লৈছে তাক লৈ প্ৰশ্নৰ অৱতাৰণা কৰিছে।