বৰপেটাৰ মন্দিয়া উন্নয়ন খণ্ডৰ বিডিঅ’ নৱৰত্ন পাটোৱাৰীক নিলম্বন

বৰপেটা জিলাৰ মন্দিয়া উন্নয়ন খণ্ডৰ খণ্ড উন্নয়ন বিষয়া নৱৰত্ন পাটোৱাৰীক অসম চৰকাৰৰ পঞ্চায়ত আৰু গ্রামোন্নয়ন বিভাগৰ প্ৰধান সচিব ডাঃ জে বি এক্কাই নির্দেশ নং-পি আৰ ডি-১২/৯৮/২০২০-পি আৰ ডি (বি)/ ২৬ তাং দিছপুৰ ০৫/০১/২০২১ মর্মে তৎকালীনভাৱে বলৱৎ হোৱাকৈ চাকৰিৰ পৰা নিলম্বন কৰে৷উল্লেখযোগ্য যে উন্নয়ন খণ্ডটোৰ অধীনৰ এমজিএনৰেগা আৰু চতুৰ্দশ বিত্তীয় আয়োগৰ ধন অপব্যৱহাৰ কৰাৰ অভিযোগত নিলম্বন কৰা হৈছে বুলি নিৰ্দেশটোত উল্লেখ কৰিছে। বিগত সময়ত বিডিঅ’ নৱৰত্ন পাটোৱাৰীৰ বিৰুদ্ধে উত্থাপিত হৈছে অনিয়ম আৰু চৰকাৰী ধন আত্মসাৎ কৰাৰ বিভিন্ন অভিযোগ। এই অভিযোগ সমূহৰ  তদন্ত কৰে পঞ্চায়ত আৰু গ্রামোন্নয়ন বিভাগৰ যুটীয়া সঞ্চালকে। যুটীয়া সঞ্চালকে দাখিল কৰা প্ৰতিবেদন অনুসৰি দুৰ্নীতিগ্ৰস্ত বিডিঅ’ পাটোৱাৰীক নিলম্বন কৰে। চৰকাৰী নীতি নিৰ্দেশনা অমান্য কৰি এমজিএনৰেগা আঁচনিৰ ধনেৰে  ২০১৭-১৮ বৰ্ষত মন্দিয়াৰ বেচৰকাৰী শিক্ষানুষ্ঠান ড্ৰীমলেণ্ড একাডেমীত ধন খৰচ কৰা, পি এম জি এছ ৱাইৰ পথত এমজিএনৰেগাৰ ধনৰ অপব্যাৱহাৰ কৰা আদিৰ অভিযোগৰ ভিত্তিতে নিলম্বন কৰা হয়। উল্লেখযোগ্য যে নৱৰত্ন পাটোৱাৰী মাত্ৰ তেৰমাহ পূৰ্বে পঞ্চায়ত সম্প্ৰসাৰণ বিষয়াৰ পৰা খণ্ড উন্নয়ন বিষয়া হিচাপে পদোন্নতি হৈছিল আৰু মন্দিয়া উন্নয়ন খণ্ডত যোগদান কৰিছিল।