বকো আৰক্ষীৰ তালাচিত উদ্ধাৰ ড্ৰাগছসহ নগদ ধন : দুই ব্যৱসায়ী যুৱক আটক

বকো

 দেশজুৰি ক’ৰ’ণা ভাইৰাছৰ বিৰুদ্ধে তীব্ৰ যুদ্ধ সদৃশ পৰিবেশ সৃষ্টি হৈ থকাৰ মাজতে শুকুৰবাৰে কামৰূপ জিলাৰ বকোত উদ্ধাৰ হয় নগদ ধনসহ ড্ৰাগছ আৰু নিচাযুক্ত সামগ্ৰী। শুকুৰবাৰে আবেলি বকো আৰক্ষী থানা আৰু বকো বজাৰৰ কাষতে ১৭ নং ৰাষ্ট্ৰীয় ঘাইপথৰ ওপৰত বহোৱা আৰক্ষীৰ পহৰা চকীত বকো আৰক্ষী থানাৰ ভাৰপ্ৰাপ্ত আৰক্ষী বিষয়া যোগেন্দ্ৰ বৰ্মনৰ তৎপৰতাত উদ্ধাৰ কৰিবলৈ সক্ষম হয় অবৈধ ড্ৰাগছ সৰবৰাহকাৰী অসাধু ব্যৱসায়ী দুজন। তালাচী চকীৰ ঘটনাস্থলীত জানিব পৰা মতে গোৱালপাৰা জিলাৰ ময়লা পথাৰৰ হজৰত শ্বেখৰ দুই পুত্ৰ ছানোৱাৰ হুছেইন আৰু আব্দুল্লা শ্বেখ নামৰ অসাধু ব্যৱসায়ী দুজনে এ এছ ০১ ডি টি – ৬৬৪৬ নম্বৰৰ এল্টো কে ১০ ভি এক্স আই ছিৰিজৰ মাৰুতি গাড়ীৰে গুৱাহাটীৰ পৰা গোৱালপাৰা জিলা অভিমুখে আহিছিল। উল্লেখ্য যে এক গোপন সূত্ৰৰ পম খেদি বকো থানাৰ আৰক্ষী বিষয়াগৰাকীয়ে পহৰা চকীত উক্ত গাড়ীখন ৰখায় আৰু তালাচী চলায়। আৰক্ষীৰ তালাচীত কথা বতৰাত সন্দেহ হোৱাত গাড়ীৰ ভিতৰত থকা বেগত ওলাই তিনি লাখ চৈধ্য হাজাৰ টকাসহ এক কিলো দুশ পয়সত্তৰ গ্ৰাম ড্ৰাগছৰ লগতে ভিন্ন প্ৰকাৰৰ ঔষধ আৰু টেৱলেট। ইফালে মুঠ ৩৭ টা পেকেটত বাৰ হাজাৰটা টেবলেট থকা বুলি জানিবলৈ দিয়ে ধৃত ব্যৱসায়ী দুজনে। আৰক্ষী সূত্ৰে জানিব পৰা মতে উদ্ধাৰ হোৱা ড্ৰাগছখিনিৰ মূল্য প্ৰায় ডেৰ লক্ষ্য টকা। আনহাতে গাড়ীত উত্তেজক ঔষধ আৰু সাধাৰণ টেবলেট কিছুমানৰ লগত অন্যান্য সামগ্ৰীও পোৱা গৈছে। বকোত ড্ৰাগছ সৰবৰাহকাৰী অসাধু ব্যৱসায়ী আটক হোৱা খবৰ পোৱা মাত্ৰকে ঘটনাস্থলীত উপস্থিত হয় বকো ৰাজহ চক্ৰৰ চক্ৰ বিষয়া পিংকী দত্ত, ছমৰীয়া ৰাজহ চক্ৰৰ চক্ৰ বিষয়া অদিতী গগৈসহ স্থানীয় প্ৰশাসনৰ লোক।