দৈনন্দিন বাৰ্তা ডেস্ক
প্ৰাকৃতিক বিপৰ্যয়ই আগুৰি ধৰিছে ভাৰতবৰ্ষ৷ আমফাম, নিসৰ্গই ইতিমধ্যে তাণ্ডৱ সৃষ্টি কৰিলে৷ অহা ৮০ বছৰত ভাৰতৰ জলবায়ু বহু পৰিৱৰ্তন হ’ব৷ ইয়াৰ ফল ধ্বংসাত্মক হৈ উঠাৰ সম্ভাৱনা প্ৰকট বুলি গৱেষকসকলে মত প্ৰকাশ কৰিছে৷
অহা ৮০ বছৰৰ ভিতৰত ভাৰতত প্ৰাকৃতিক দুৰ্যোগ ভয়াৱহ হৈ উঠিব৷ তীব্ৰ তাপমাত্ৰা, বিধ্বংসী বান, ভয়ানক তথা শক্তিশালী ভূমিকম্প আদি হোৱাৰ সম্ভাৱনা আছে৷ এই পৃথিৱীৰ অর্থনীতি, পৰিবেশ, সমাজ আদি ৰক্ষা কৰাৰ আগতে ধৰিত্ৰীক ৰক্ষা কৰাৰ প্ৰয়োজন৷ প্ৰতিখন দেশকে গ্ৰীণ হাউচ গেছ নিৰ্গমনৰ পৰিমাণ কমাবলৈ সতৰ্ক কৰি প্ৰচাৰ কৰা হৈছে৷
উল্লেখ্য যে ছৌদি আৰবৰ বিশ্ববিদ্যালয় আব্দুলাজিজৰ অধ্যাপক মনছুৰ আলমাজৌৰিয়ে কয় যে ২১ শতিকাত ভাৰতৰ বাৰ্ষিক সর্বনিম্ন তাপমাত্রা প্রায় ৪.২ ডিগ্রী চেলচিয়াচ বৃদ্ধি পাইছে৷ ভাৰতৰ দৰে জনবসতিপূৰ্ণ দেশ এখনত এনেয়ে প্ৰকৃতিৰ খামখেয়ালি আছে৷ অনুমানিক ২১ শতিকাৰ বাকী সময়ত হয়তো ভাৰত ভয়াৱহ প্রাকৃতিক বিপর্যয়ৰ সম্মুখীন হ’ব৷
ইতিমধ্যে সেই প্রাকৃতিক বিপর্যয়ৰ সামান্য নমুনা দেখিছে ভাৰতৰ কেইখনমান ৰাজ্যই৷ আমফাম, নিসৰ্গ, হিমাচল প্ৰদেশৰ বান আদি এই ক্ষেত্ৰত অতি সামান্য বুলি উল্লেখ কৰিছে বিশেষজ্ঞসকলে৷ আৰ্থ ছিষ্টেম এণ্ড ছাইন্স নামৰ জার্নালখনত প্ৰকাশ পোৱা এক প্ৰতিবেদনত কোৱা হৈছে যে আগন্তুক দিনত ভাৰতৰ অৱস্থা সকলোতকৈ বেয়া হ’ব৷ কেৱলমাত্ৰ তীব্র তাপপ্রবাহ বা উষ্ণতা বৃদ্ধিয়ে নহয় ভয়াৱহ বানৰ সম্ভাৱনা আছে ভাৰতত৷
এই জার্নালখনৰ প্ৰতিবেদনত কোৱা হৈছে যে উত্তৰ-পশ্চিম ভাৰতত মূলত ভয়াৱহ বানৰ সম্ভাৱনা আছে৷ অতিৰিক্ত তাপমাত্রাৰ ফলত হিমবাহ গলিব আৰু জলস্তৰৰ পৰিমাণ বাঢ়িব৷ সেই কথা মানুহক বিজ্ঞানীসকলৰ তৰফৰ পৰা বাৰে বাৰে বুজোৱা হৈছে৷ সেই জলস্তৰ বৃদ্ধিৰ ফলত বান হ’ব পাৰে বুলি আশংকা প্ৰকাশ কৰিছে বিজ্ঞানীসকলে৷ আনহাতে বার্ষিক গড় বৰষুণ মাত্ৰাধিকভাৱে হৰ্থাৎ বাঢ়ি যাব বুলি উল্লেখ কৰিছে গৱেষকসকলে৷