কংগ্ৰেছ-এ আই ইউ ডি এফৰ মহাজোট বন্ধন নহয়,মহাজট বন্ধনহে হব

কংগ্ৰেছ-এ আই ইউ ডি এফৰ মহাজোট বন্ধন নহয়, মহাজট বন্ধন হব।কেইদিনমানৰ পিচত জট ভাঙোতেই কাজিয়া হব। কংগ্ৰেছো শূণ্য আৰু এ আই ইউ ডি এফো শূণ্য। গতিকে শূণ্যৰ লগত শূণ্য যোগ হ’লে উত্তৰ শূণ্যই হব। কিন্তু এই জোটবন্ধনে কিছু কিছু স্থানত যে খিলঞ্জীয়া অসমীয়া মানুহৰ বাবে কৰবাত কৰবাত যে চিন্তনীয় হব সেইটো অস্বীকাৰ নকৰো। সেয়ে অসমীয়া মানুহে সিদ্ধান্ত লব লাগিব যে তেওঁলোকে কংগ্ৰেছ-এ আই ইউ ডি এফৰ যোটবন্ধনক সমৰ্থন কৰিব নে নকৰিব। আজি নগাঁৱত ‘কিয়া’ মটৰচ নামৰ বিলাসী বাহন খন উন্মোচন কৰিবলৈ আহি এই মন্তব্য কৰে ৰাজ্য চৰকাৰৰ স্বাস্থ্য বিভাগৰ ৰাজ্যিক মন্ত্ৰী পীয়ূষ হাজৰিকাই। সাংবাদিকৰ আগত হাজৰিকাই কয় যে-‘জোটবন্ধনত থকা অন্যদলসমূহৰ কোনো অস্তিত্ব আছে বুলি নাভাবো। জোটবন্ধনত দুটাহে দল আছে। জোটবন্ধন হৈছে কংগ্ৰেছ আৰু এ আই ইউ ডি এফৰ ই শঠামিতিৰালি। ইপিনে নগাঁও জিলাৰ ধৰ্মীয় সংখ্যালঘুৰ লোক অধিক থকা ধিং আৰু ৰূপহীহাট বিধান সভা সমষ্টিৰ সম্পৰ্কত মন্ত্ৰী হাজৰিকাই কয়-‘ধিং আৰু ৰূপহীহাট সমষ্টিত বিজেপি নাইয়েই। সেই সমষ্টিত হয় কংগ্ৰেছ বা ,এ আই ইউ ডি এফ জয়ী হব। গতিকে এই দুটা সমষ্টিকলৈ আমাৰ কোনো মতলব নাই। ‘ মন্ত্ৰী হাজৰিকাই কংগ্ৰেছ আৰু এ আই ইউ ডি এফৰ যোটবন্ধনে এটা দুটা সমষ্টিত কৰবাত খিলঞ্জীয়া ক্ষতিগ্ৰস্ত কৰিব পাৰে বুলি মন্তব্য কৰি কয়-তাৰ বিপৰীতে খিলঞ্জীয়া ৰাইজ জাগ্ৰতও হব আৰু আমাৰ লাভো হব।সাংবাদিকৰ প্ৰশ্নৰ উত্তৰত মন্ত্ৰী হাজৰিকাই কয়-‘ৰাইজৰ দল আৰু অসম জাতীয় পৰিষদৰ জোটবন্ধনে বিজেপিৰ ওপৰতকোনো ধৰণৰ প্ৰভাৱ নেপেলায়।লুৰিণজ্যোতি গগৈয়ে ৰহা বিধান সভা সমষ্টিৰ কচুৱা আৰু ধিং বিধান সভা সমষ্টিৰ মৈৰাবাৰীত সভা অনুষ্ঠিত কৰিছে।এই সভাই বিজেপিক লাভান্বিতহে কৰিব। ৰাইজৰ দল আৰু অসম জাতীয় পৰিষদৰ জোটবন্ধনে কংগ্ৰেছ আৰু এ আই ইউ ডি এফকহে ক্ষতিগ্ৰস্ত কৰিব। গতিকে বিজেপিয়েই চৰকাৰ কৰিব।