কলিয়াবৰ
লকডাউনত উপাৰ্জনহীন হৈ কলিয়াবৰৰ ডিজুভেলী চাহ বাগিচাৰ একাংশ শ্ৰমজীৱী লোকে বনৰীয়া আলু-কচু খাই ভোক নিবাৰণ কৰাৰ বাতৰি সংবাদ মাধ্যমত প্ৰকাশ পোৱাৰ পিছতে অসহায় লোকসকলৰ কাষত ঠিয় দিয়ে কলিয়াবৰৰ এটি আগশাৰীৰ বেচৰকাৰী সংস্থা অ’পেন ড’ৰ অসমৰ সদস্যসকল। নগাঁও-কাৰ্বি আংলং সীমান্তবৰ্তী পাহাৰৰ নামনিৰ প্ৰান্তীয় অঞ্চলত অৱস্থিত ডিজুভেলী চাহ বাগিচাৰ ২৩ নং খণ্ডৰ অৰ্ধ শতাধিক শ্ৰমজীৱী পৰিয়ালৰ মাজত খাদ্য সামগ্ৰীৰ লগতে অত্যাৱশ্যকীয় সামগ্ৰী বিতৰণ কৰে স্বেচ্ছাসেৱী সংস্থাটোৱে। উল্লেখ্য যে পঞ্চায়ত কৰ্মীৰ দুৰ্নীতি-অনিয়মৰ বাবে আঞ্জুকপানী গাঁও পঞ্চায়তৰ এলেকাধীন পিছপৰা অঞ্চলটোৰ লোকসকলে চৰকাৰী-বেচৰকাৰী সাহায্যৰ অভাৱত অনাহাৰে-অৰ্ধাহাৰে দিন পাৰ কৰাৰ লগতে পাহাৰীয়া আলু-কচুৰে ভোক নিবাৰণ কৰি আহিছিল অসম চাহ নিগমৰ অধীনস্থ বাগিচাখনৰ প্ৰান্তীয় অঞ্চলটোৰ বাসিন্দাসকলে। লকডাউনৰ প্ৰভাৱত খাদ্য সংকটত পৰা শ্ৰমজীৱী লোকসকলক চাউল, ডাইল, আটা, আলু, পিঁয়াজ আদি খাদ্য সামগ্ৰী যোগান ধৰাৰ লগতে চাবোনকে ধৰি বিভিন্ন অত্যাৱশ্যকীয় সামগ্ৰীও বিৰতণ কৰে সংস্থাটোৱে। বেচৰকাৰী সংস্থাটোৰ এই কাৰ্যসূচীত সহযোগিতা আগবঢ়ায় কলিয়াবৰ মহকুমা প্ৰশাসনেও।