মদাহীৰ কান্ধত দেশৰ ৰাজভঁৰাল টনকিয়ালৰ দায়িত্ব ! দিল্লী-অন্ধ্ৰৰ পিছত অসমত বাঢ়িল ২৫% আবকাৰী শুল্ক

গুৱাহাটী

 আজব দেশৰ কথা অমৃত সমান। মদাহীয়ে টনকিয়াল কৰিব ভাৰতৰ ৰাজভঁৰাল। সেয়েহ’লগৈ সুৰাই একমাত্ৰ ভৰসা। সুৰাৰ ধনেৰে চলিছে দেশ উদ্ধাৰৰ পৰিকল্পনা। বাটে পথে গেলা মদাহী বুলি তিৰস্কাৰৰ বলি হোৱা সকলে এতিয়া দেশ উদ্ধাৰৰ গধুৰ বোজা কান্ধ পাতি ল’ব লগা হৈছে নিজৰ অজ্ঞাতে। যি সময়ত বাঘা বাঘা নেতা, অৰ্থনীতিবিদ, জ্ঞানী, পণ্ডিত, বিশেষজ্ঞ আদি ব্যৰ্থ হৈছে দেশৰ বিত্তীয় সুস্থিৰতা অটুত ৰাখিবলৈ, সেইসময়ত গেলা মদাহীয়ে গঞ্জনা মূৰ পাতিও দেশৰ ৰাজকোষ টনকিয়াল কৰিছে। ফলত চৰকাৰে অভিলেখ পৰিমানে শুল্ক বৃদ্ধি কৰিছে সুৰাৰ ওপৰত। লগে লগে ৰাজকোষলৈ বৈছে ৰাজহৰ সোঁত। অসমতো দৈনিক ২৫ -৩০ কোটি টকাৰ সুৰা বিক্ৰী হৈছে। ফলত মাহে অতিৰিক্ত এহাজাৰ কোটি সংগ্ৰহৰ বাবে ২৫ শতাংশ আবকাৰী শুল্ক বৃদ্ধি কৰিছে এম আৰ পিৰ ওপৰত।একে নিৰিখ বাঢ়িছে মেঘালয় আৰু অৰুণাচলত।ছত্তিশগড়ত মদাহীক ‘হোম ডেলিভাৰী’ কৰিছে মদ।অন্ধ্ৰ প্ৰদেশত ৭৫ শতাংশ, কৰ্ণাটক আৰু তামিলনাডুত ১৭ শতাংশ, দিল্লীত ৭০ শতাংশ, পশ্চিমবংগত ৩০ শতাংশ, ৰাজস্থানত ৪০ শতাংশ, উত্তৰ প্ৰদেশত বটলেপ্ৰতি ৰেগুলাৰ ব্ৰেণ্ডত দহ টকা আৰু প্ৰিমিয়াম ব্ৰেণ্ডত ৫০ টকা, হাৰিয়ানাত বটলেপ্ৰতি ৫০ টকা দাম বৃদ্ধি কৰিছে। ব্যতিক্ৰম কেৱল উৰিষ্যা আৰু পাঞ্জাব। এই দুখন ৰাজ্যত আগৰ দামতে বিক্ৰী কৰিছে মদ। সকলো ৰাজ্যতে জিএছটিৰ পিছত দ্বিতীয় বা তৃতীয় বৃহৎ ৰাজহ সংগ্ৰহৰ উৎস হ’ল আৱকাৰী শুল্ক। প্ৰতি মাহে গড়ে ১৫,০০০-২০,০০০ কোটি টকা অহৰণ হয় মদাহীৰ পেটত সোমোৱা দেশী-বিদেশী মদৰ শুল্ক হিচাপে।সেয়ে সুৰা বিনে গতি নাই বিয়াগোম চৰকাৰৰ।