চলিত বৰ্ষৰ আৰম্ভণিতে নতুন দিল্লীয়ে আয়োজন কৰিব উন্নয়নশীল দেশসমূহৰ এখন সন্মিলন…
চলিত বৰ্ষৰ আৰম্ভণিতে নতুন দিল্লীয়ে আয়োজন কৰিব এছিয়া, আফ্ৰিকা আৰু লেটিন আমেৰিকাৰ উন্নয়নশীল দেশসমূহৰ এখন সন্মিলনৰ। অহা ১২ আৰু ১৩ জানুৱাৰীত ভিডিঅ’ কনফাৰেঞ্চিঙৰ জৰিয়তে ১২০ খনতকৈও অধিক দেশক এই সন্মিলনত অংশগ্ৰহণ কৰিবলৈ আমন্ত্ৰণ জনোৱা হৈছে।
ৰাষ্ট্ৰপ্ৰধানসকলৰ উপৰিও বিভিন্ন দেশৰ বিভাগীয় মন্ত্ৰীসকলকো এই সন্মিলনলৈ নিমন্ত্ৰণ কৰা হৈছে। মহামাৰী আৰু প্ৰভাৱ, ইউক্ৰেইন যুদ্ধৰ আন্তঃৰাষ্ট্ৰীয় প্ৰভাৱ, খাদ্য, সাৰ আৰু ইন্ধনৰ মূল্যৰ অস্বাভাৱিক বৃদ্ধি, ঋণৰ বোজা, মুদ্ৰাস্ফীতি আদি বিষয়ক কেন্দ্ৰ কৰি এই সন্মিলন অনুষ্ঠিত কৰা হ’ব।
এই সন্মিলনত ভাৰতৰ প্ৰধানমন্ত্ৰীয়ে মুকলি ভাষণ প্ৰদান কৰিব। সন্মিলনত ভাৰতৰ কেন্দ্ৰীয় বিত্তমন্ত্ৰী আৰু বৈদেশিক পৰিক্ৰমা মন্ত্ৰীও উপস্থিত থাকিব বুলি জানিব পৰা গৈছে।
‘ভয়েচ অৱ গ্ল’বেল চাউথ’ শীৰ্ষক সন্মিলন ঘোষণা কৰি বৈদেশিক সচিব বিনয় কোৱাট্ৰাই আজি কয় যে নিজৰ নিজৰ উদ্দেশ্য চিনাক্ত কৰি বিশ্বব্যাপী একমত গঢ়ি তোলাৰ লক্ষ্যৰে আমি সকলো উন্নয়নশীল দেশক এক মঞ্চত একত্ৰিত কৰি বিভিন্ন বিষয়ত অগ্ৰাধিকাৰ দি আগুৱাই যোৱাৰ পথসমূহ আলোচনা কৰিব খুজিছো।
তেওঁ লগতে কয় যে “এই পদক্ষেপ প্ৰধানমন্ত্ৰী নৰেন্দ্ৰ মোদীৰ ‘সব কা সাথ, সব কা বিকাশ, সব কা বিশ্বাস আৰু সব কা প্ৰয়াস’ নীতিৰ সৈতে জড়িত। কেন্দ্ৰীয় চৰকাৰেও ভাৰতৰ পৰম্পৰাগত নীতি বসুধৱ কুটুম্বকমৰ দৰ্শন মনত ৰাখিছে।”
সন্মিলনত জি-২০ দেশসমূহক গোটৰ বাহিৰৰ দেশসমূহৰ সৈতেও সংযোগ স্থাপনৰ চেষ্টা কৰা হ’ব। কোৱাট্ৰাই কয়, “প্ৰধানমন্ত্ৰীয়ে কৈছিল যে উন্নয়নশীল আৰু পিছপৰা দেশবোৰৰ কথা সদায় শুনা নাযায়। এই সন্মিলনত গোটৰ বাহিৰৰ দেশৰ পৰামৰ্শ শুনিবলৈ এক অধিৱেশন অনুষ্ঠিত কৰা হ’ব।”