খোৱাঙত চোৰাং তেলৰ ঘাটি উচ্ছেদ

খোৱাং

ডিব্ৰুগড় জিলাৰ খোৱাং শেনচোৱা পুখুৰীত শুকুৰবাৰে চোৰাং তেলৰ এক বৃহৎ ঘাটি আৰক্ষীয়ে উচ্ছেদ কৰিবলৈ সক্ষম হয়। ডিব্ৰুগড় জিলাৰ অতিৰিক্ত আৰক্ষী অধীক্ষকৰ নেতৃত্বত চলা এক অভিযানত এই ঘাটি উচ্ছেদ কৰে৷ অভিযান কালত বিকি সোণোৱাল নামৰ লোকজনৰ ঘৰৰ পৰা প্ৰায় পাঁ‌চ হাজাৰ লিটাৰ ডিজেলসহ কেইবাটাও তেলৰ ড্ৰাম জব্দ কৰে আৰক্ষীয়ে। আৰক্ষীৰ চকুত ধুলি দি এই অসাধু ব্যৱসায়ীজনে দীৰ্ঘ দিনৰ পৰা এই ব্যৱসায় চলাই আহিছিল  এক গোপন সূত্ৰৰ পম খেদি অতিৰিক্ত আৰক্ষী অধীক্ষজনে ব্যৱসায়ীজনৰ ঘৰৰ পৰা এই সামগ্ৰীসমূহ জব্দ কৰিবলৈ সক্ষম হয়৷ ইফালে চোৰাং তেলৰ এই ৰমৰমীয়া ব্যৱসায় চলাই থকা বিকি সোণোৱাল বৰ্তমান পলাতক বুলি জানিব পৰা গৈছে৷ খোৱাং আৰক্ষীয়ে ইতিমধ্যে ডিজেলৰ লগতে ড্ৰামবোৰ জব্দ কৰি চোৰাং তেলৰ ব্যৱসায়ী বিকিৰ সন্ধানত নামি পৰিছে৷ উল্লেখ্য যে চোৰাং তেলৰ ব্যৱসায়ীজনে মুক্তভাৱে এই ব্যৱসায়ত নামি পৰি বৃহত্তৰ শেনচোৱা পুখুৰী অঞ্চলত তেল যোগান ধৰি আহিছিল। এই ব্যৱসায়ীজনক গ্ৰেপ্তাৰ কৰিলেই চোৰাং তেলৰ এই বৃহৎ চক্ৰটোৰ লগত আৰু কোন কোন লোক জড়িত হৈ আছে উলাই পৰিব বুলি ৰাইজে মত পোষণ কৰিছে৷