ভাৰতীয় জনতা যুৱ মর্চাৰ গোৱালপাৰা জিলা কমিটিৰ দ্বিতীয় কার্যনির্বাহক সভাখন চাৰি ছেপ্টেম্বৰ তাৰিখে আগিয়া বাপুপাৰাস্থিত মদন মোহন সত্ৰৰ শংকৰ মাধৱ কৃষ্টি ভৱন প্ৰাংগনত অনুষ্ঠিত হৈ যায়।জিলা যুৱ মর্চাৰ বিভিন্ন মণ্ডলৰ পৰা অংশ গ্ৰহন কৰা দুই শতাধিক কার্যকর্তাৰ উপস্থিতিত পুৱা চাৰে দহ বজাত বন্তি প্ৰজলন আৰু মাতৃ বন্দনাৰে আৰম্ভ হোৱা যুৱ মর্চাৰ কার্যনির্বাহক সভাত আদৰণি ভাষণ আগবঢ়ায় গোৱালপাৰা জিলা ভাৰতীয় জনতা যুৱ মর্চাৰ সভাপতি পবিত্ৰ কুমাৰ ৰাভাই।ইয়াৰ পিছতে গোৱালপাৰা জিলা ভাৰতীয় জনতা পার্টিৰ সভাপতি ভৃগুৰঞ্জন ৰাভাই যুৱ মর্চাক উদ্দেশি মার্গদর্শণ আগবঢ়োৱাৰ পিছতে সামাজিক মাধ্যমত যুৱ মর্চাৰ ভুমিকা বিষয়ত বি জে পি ৰ ৰাজ্যিক সম্পাদিকা টিনামনী দৈমাৰী আৰু নীতি আৰু গবেষণা কোষৰ প্ৰয়োজনীয়তা আৰু কার্যপদ্ধতি সম্পর্কে গোৱালপাৰা জিলা বি জে পি ৰ উপ সভাপতি পুৰন্দৰ ৰাভাই বক্তব্য প্ৰদান কৰে।
উক্ত জিলা যুৱ মর্চাৰ কার্যনির্বাহক সভাত ভাৰতীয় জনতা যুৱ মর্চাৰ ৰাজ্যিক সভাপতি সিদ্ধাংকু অংকুৰ বৰুৱা মুখ্য অতিথি হিচাপে উপস্থিত থকাৰ লগতে গোৱালপাৰা জিলা যুৱ মর্চাৰ প্ৰভাৰী অৰ্ণৱজ্যোতি লহকৰ প্ৰমুখ্যে জনতা যুৱ মর্চাৰ কেবাগৰাকী শীর্ষ নেতা উপস্থিত থাকে।উল্লেখ্য যে উক্ত জিলা যুৱ মর্চাৰ কার্যনির্বাহক সভাতে ভাৰতীয় জনতা পার্টিৰ নীতি আৰু আদর্শত আকৃষ্ট হৈ ৰাভা শিল্পী সমাজৰ প্ৰাক্তন সাধাৰণ সম্পাদক কনক ৰাভাৰ নেতৃত্বত কেবাজনো যুৱক যুৱতীয়ে ভাৰতীয় জনতা যুৱ মর্চাত যোগদান কৰে।
