হোজাইত বন্যহস্তীৰ মুক্ত বিচৰণ

শুক্ৰবাৰৰ দিনটো হোজাইৰ চৌপাশে পাৰ কৰিছে আতঙ্কময় পৰিবেশত, তিনিটা বন্য হস্তীৰ মুক্ত বিচৰণত আতংকিত জনাঞ্চল৷ দিনতেই ডবকা বনাঞ্চলৰ পৰা জনাঞ্চলৈ খাদ্যৰ সন্ধানত উলাই অহা বন্য হস্তীৰ দলটোক বনকৰ্মীৰ তৎপৰতাত মোৰাঝাৰ কপাহবাৰী আদি অঞ্চলৰ পৰা হোজাইৰ টেলিবস্তি হৈ নন্দপুৰ গাওঁলৈকে আনিব পৰা গৈছে যদিও বাতৰি সংগ্ৰহ কৰা সময় লৈকে হাবিলৈকে খেদি লৈ যাবলৈ সক্ষম হোৱা নাই বন কৰ্মীৰ দলটোৱে। হাতীৰ দলটোৱে কপাহবাৰী, মোৰাঝাৰ আদি বিভিন্ন গাওঁ অতিক্ৰম কৰি দিন দুপৰতে হোজাইৰ একাংশ গাওঁ যেনে টেলিবস্তি, ধনিৰাম পথাৰ, নন্দপুৰ আৰু দাৰীয়া বস্তি আদি গাওঁ সমূহত এক আতঙ্কময় পৰিবেশৰ সৃষ্টি কৰে। হাতীৰ দলটোক খেদিবলৈ বনকৰ্মীৰ দলটোৱে প্ৰচেষ্টা অব্যাহত ৰাখিছে, হাতীৰ জাকটোক খেদিবলৈ গুলী ফুটোৱাৰ লগতে বিভিন্ন পন্থা অৱলম্বন কৰিছে৷ ঘন জনবসতি অঞ্চল হোৱা হেতুকে বহু চেষ্টা কৰিও সফল হ’ব পৰা নাই, অন্যহাতে বন্য হস্তীক চাবলৈ ৰাজ পথলৈ ওলাই আহিল অজস্ৰ স্থানীয় লোক। হোজাই আৰক্ষী উপস্থিত হৈ পৰিস্থিতি নিয়ন্ত্ৰণৰ চেষ্টা কৰে যদিও  আতঙ্কৰ মাজেৰে দিনটো অতিক্ৰম কৰে হোজাইৰ উক্ত অঞ্চল বাসীয়ে।