দৈনন্দিন বাৰ্তা সেৱা, ভূৰাগাওঁ, ৩ নৱেম্বৰঃ মৰিগাঁও জিলাৰ গেৰুৱা আঞ্চলিক ক্ৰীড়া সন্থাৰ উদ্যোগত যোৱা কালিৰে পৰা অঞ্চলটোৰ জামাদাৰী খেল পথাৰত অনুষ্ঠিত হৈছে প্ৰাইজমানি ফুটবল প্ৰতিযোগিতা। প্ৰতিযোগিতাৰ প্ৰথমখন খেল জামুগুৰি ফুটবল একাদশ বনাম নগাঁও কাছমাৰী ফুটবল একাদশৰ মাজত অনুষ্ঠিত হয়।
মৰিগাঁও জিলা ক্ৰীড়া সন্থাৰ সাধাৰণ সম্পাদক জিতু বৰদলৈয়ে উদ্বোধন কৰা উদ্বোধনী খেলখনত জামুগুৰি ফুটবল একাদশে নগাঁও কাছৰমাৰী ফুটবল একাদশক ১-০ গ’লত পৰাভূত কৰে। প্ৰাইজমানি ফুটবল খেলখন পৰিচালনা কৰে মিন্টু বৰদলৈ, ভৱেন বৰদলৈ, ভকচেল বৰদলৈ আৰু বিনোদ বড়োৱে।