হিন্দু বাংলাদেশীৰ পক্ষত থকা বিধায়ক শিলাদিত্য আকৌ কেনেকৈ অসমীয়া জাতি প্ৰেমী হ’ল ? আৰ টি আই কৰ্মী এ জে আকন্দ‌ৰ বিস্ফোৰক অভিযোগ : ‘কা’ বলবৎ নহলে শিলাদিত্য নিজেই বাংলাদেশলৈ যাব লগীয়া হ’ব পাৰে।

0 835

নগাঁও :

“বহু বিতৰ্কিত আৰু সাম্প্ৰদায়িক বিধায়ক শিলাদিত্য দেৱৰ মস্তিষ্কৰ বিকৃত ঘটাছে। সুবিধাবাদী এই নেতাজনে  কেৱল মাত্ৰ এটা জনগোষ্ঠীক টাৰ্গেট কৰি বিভিন্ন সময়ত সাম্প্ৰদায়িক মন্তব্য কৰি শংকৰ-আজানৰ দেশ অসমত ভাতৃঘাতী সংঘৰ্ষ সৃষ্টি কৰাৰ বাবে দীৰ্ঘদিন ধৰি অহৰহ চেষ্টা কৰি আহিছে। কিন্তু আজিলৈকে তেওঁৰ  মনেসজা উত্তেজিত কথাত কোনেও ভৰি দিয়া নাই।”- এই মন্তব্য নগাঁৱৰ আৰ টি আই কৰ্মী তথা সমাজ সচেতক যুৱক আব্দুল জলিল আকন্দ‌ৰ। এ জে আকন্দ‌ই আজি এক বিবৃতিযোগে উল্লেখ কৰি লগতে কয়, কালি গুৱাহাটীৰ নুনমাটিত ঋতুপৰ্ণ পেগু নামৰ এগৰাকী লোকক নিৰ্মম ভাবে হত্যা কৰা হৈছে। এই কাৰ্য নিশ্চিত ভাবে খুবেই গৰ্হিত কাৰ্য। হত্যাকাৰী বা অপৰাধীৰ কোনো জাতি-ধৰ্ম নাথাকে। যদিহে অপৰাধীয়ে ধৰ্ম মানিলে হয়, তেন্তে তেওঁ মানুহক হত্যা কৰাৰ দৰে জঘন্য আৰু বৰ্বৰ কাম কেতিয়াও কৰিব নোৱাৰে। কাৰণ কোনো ধৰ্ম‌ই হত্যা-হিংসাক মানি নলয়। তেনে স্থলত নুনমাটিৰ লোকজনক হত্যা কৰা দুৰ্বৃত্ত‌কেইটা কোন ধৰ্মৰ সেইটো ডাঙৰ কথা নহয়। হত্যাকাৰীৰ দৃষ্টান্তমুলক শাস্তি হ’ব লাগে। নুনমাটিত সংঘটিত হত্যাকাণ্ডৰ প্ৰসংগত মিঞা মুছলমানে হত্যা কৰা বুলি দাবী কৰি বিধায়ক শিলাদিত্য‌ই গোটেই জাতিটোক মিঞা বাংলাদেশী বুলি আখ্যায়িত কৰিব বিচাৰিছে। অসমীয়া মানুহে মুছলমানৰ সৈতে সকলো ধৰণৰ সম্পৰ্ক ছেদ কৰিব লাগে বুলি কৈ আচলতে সাতামপুৰুষীয়া ঐক্য-সংহতি বিনষ্ট কৰি হিন্দু-মুছলমানৰ মাজত সংঘৰ্ষ লগোৱাৰ চেষ্টা অব্যাহত ৰাখিছে। ৰাজ্যৰ আন একাংশ জাতি-গোষ্ঠীৰ লোকৰ মাজতো বিভিন্ন ঠাইত এক প্ৰকাৰ প্ৰতিদিনেই হত্যাকাণ্ড সংঘটিত হৈছে। সেইবোৰ প্ৰসংগত তেওঁ নিমাত থকাৰ ৰহস্য কি ? সংবাদ মাধ্যমৰ আগত  শিলাদিত্য‌ই তেওঁৰ বক্তব্যত উল্লেখ কৰিছে যে আমাৰ ভুমিপুত্ৰক হত্যা কৰিছে। বাংলাদেশী মুলৰ লোক শিলাদিত্য‌ আকৌ কেতিয়া ভুমিপুত্ৰ হ’ল বুলি আকন্দ‌ই প্ৰশ্ন অৱতাৰণা কৰি কয়, শিলাদিত্য‌ই হিন্দু বাংলাদেশীৰ পক্ষত অৱস্থান কৰি আহিছে। অভিযোগ মতে, তেওঁৰ  নিজৰেই লিগেচী ডাটা নাই। বিভিন্ন পক্ষ‌ই তেওঁক তেঁওৰ লিগেচী ডাটা বা ১৯৭১ চনৰ আগৰ প্ৰমাণ পত্ৰ দিবলৈ কৈ আহিছিল যদিও আজি পৰ্যন্ত কথা চহকী বিধায়ক জনে তেওঁৰ নথি পত্ৰ ৰাজহুৱা কৰিবলৈ সাহস নকৰিলে। শেহতীয়াকৈ তেওঁ তৰুণ গগৈ, অখিল গগৈ, জুবিন গাৰ্গ আদি লোক সকলক এঘৰীয়া কৰিব লাগে বুলি মন্তব্য কৰাৰ কাৰণ উল্লেখ কৰি আকন্দ‌ই কয়, তেওঁলোকে নাগৰিকত্ব সংশোধনী আইন বিৰোধিতা কৰিছে। এই আইন কিবা কাৰণত প্ৰত্যাহাৰ হলে শিলাদিত্য নিজেই বাংলাদেশলৈ যাব লাগিব। তেওঁ বাৰে বাৰে মিঞা মুছলমানে অসমীয়া জাতিক ধ্বংস কৰিব বুলি দাবী কৈ বিতৰ্কিত আৰু সাম্প্ৰদায়িক মন্তব্য কৰি অহা শিলাদিত্য‌ৰ দৰে সন্দেহযুক্ত লোকে অসম আৰু অসমীয়া জাতিক বচোৱাৰ আহ্বান জনোৱা কথাটো আচলতে গছত গৰু উঠা কথাৰ দৰেহে হৈছে। প্ৰকৃততে তেওঁ মুছলমানৰ বিৰুদ্ধে বিতৰ্কিত মন্তব্য কৰি সস্তীয়া প্ৰচাৰৰ আশাতে সততে সংবাদ মাধ্যমৰ শিৰোনামা দখল কৰাৰ চেষ্টা চলাই আহিছে। সমষ্টি উন্নয়নত সম্পূর্ণ ৰূপে ব্যৰ্থ হোৱাৰ অভিযোগ থকা এইগৰাকী বিধায়ক যেন স্বয়ম্ভূ গড। তেওঁ আছু, আমছু, কৃষক মুক্তি, প্ৰাক্তন মুখ্যমন্ত্ৰীদ্বয় তৰুণ গগৈ, প্ৰফুল্ল কুমাৰ মহন্ত, শিল্পী জুবিন গাৰ্গ , অন্যান্য শিল্পী-সাহিত্যিক, লেখক,বুদ্ধিজীৱী কোনেও তেওঁৰ পৰা হাৰি যোৱা নাই। সকলোকে সমালোচনা কৰি আচলতে শিলাদিত্য‌ই নিজকে কি বুলি ভাৱে তাৰ প্ৰশ্ন উত্থাপন কৰিছে আব্দুল জলিল আকন্দ‌ই। আনকি, তেওঁৰ পৰা হাৰি যোৱা নাই নিজৰ দলৰ একাংশ নেতা-কৰ্মীও। কাৰণ তেওঁ কিছুদিন পুৰ্বে বিজেপিৰ একাংশ নেতা বিভিন্ন ছিণ্ডিকেটত জৰিত থকাৰ বিস্ফোৰক অভিযোগ কৰি সংবাদ মাধ্যমৰ শিৰোনাম দখল কৰি আহিছে। তেওঁৰ নিজৰ স্বাৰ্থৰ আঘাত হলেই এনে কৰে। আকন্দ‌ৰ মতে, শিলাদিত্য‌ ইতিমধ্যে এঘৰীয়া হৈছে বাবে ৰাজহুৱা স্থানৰ পৰিৱৰ্তে সংবাদ মাধ্যমৰ আগত আবোল তাবোল মন্তব্য কৰে। তেওঁ এটা মানসিক বিকাৰগ্ৰস্ত লোক হয়। সেই কাৰণে তেওঁৰ দল বা মুখ্যমন্ত্ৰী সৰ্বানন্দ সোনোৱালে আজি পৰ্যন্ত নিয়ন্ত্ৰণ কৰিব পৰা নাই। তেওঁৰ বিতৰ্কিত মন্তব্যৰ বাবে ৰাজ্যৰ বিভিন্ন আৰক্ষী থানাত শতাধিক গোচৰ ৰুজু হোৱাৰ পিছত তেওঁক গ্ৰেপ্তাৰ নকৰাত আকন্দ‌ই উদ্বেগ প্ৰকাশ কৰি তেওঁক অতি শীঘ্ৰে গ্ৰেপ্তাৰৰ দাবী জনায়। অন্যথা অসমত ভাতৃঘাতী সংঘাত হলে চৰকাৰ জগৰীয়া হ’ব বুলি আকন্দ‌ই সকীয়াই দিয়ে।