যোৰহাটত যানবাহন চলাচলৰ ক্ষেত্ৰত নতুন নিয়ম : এইবাৰ যুগ্ম, অযুগ্ম সংখ্যাৰ ব্যৱস্থা

যোৰহাট

যোৰহাটত যানবাহন চলাচলৰ ক্ষেত্ৰত এইবাৰ যুগ্ম আৰু অযুগ্ম সংখ্যাৰ ব্যৱস্থা কৰা হৈছে৷ সম্প্ৰতি ক’ৰ’ণা ভাইৰাছৰ সংক্ৰমণ ৰোধৰ প্ৰতি লক্ষ্য ৰাখি যোৰহাট জিলা দণ্ডাধীশে এক আদেশ যোগে কাইলৈৰ পৰা অত্যাৱশ্যকীয় সেৱাত জড়িত অনুমতি থকা বাহনসমূহৰ চলাচল সীমিতকৰণৰ বাবে ব্যৱস্থা গ্ৰহণ কৰিছে৷ এই অনুসৰি বিভাগীয় অনুমতি থাকিলেও দুচকীয়া বাহনসহ সকলো যানবাহনৰ পঞ্জীয়ন নম্বৰৰ শেষৰ সংখ্যাটো অযুগ্ম অৰ্থাৎ ১, ৩, ৫, ৭, ৯ সংখ্যাৰ বাহন প্ৰতি সপ্তাহৰ সোমবাৰ, বুধবাৰ আৰু শুকুৰবাৰে চলাচল কৰাৰ বিপৰীতে মঙলবাৰ, বৃহস্পতিবাৰ আৰু শনিবাৰে যুগ্ম সংখ্যা অৰ্থাৎ ২, ৪, ৬, ৮ সংখ্যাৰ বাহনবোৰ জিলাখনত চলাচল কৰিব পাৰিব৷ অৱশ্যে এই আদেশৰ পৰা স্বাস্থ্যসেৱা, আৰক্ষী, অগ্নিনিৰ্বাপক, জৰুৰীকালীন সেৱাত জড়িত টেলিকম সেৱা, বিদ্যুৎ সেৱা আদি, ৰাজ্যিক পৰিবহণ নিগমৰ অধীনৰ বাছ, পৌৰসভাৰ যানবাহন আৰু মালবাহী ট্ৰাকবোৰক ৰেহাই দিয়া হৈছে৷ অৱশ্যে এই আদেশ দেওবাৰবোৰত প্ৰযোজ্য নহ’ব৷ এই আদেশ জিলাখনত তৎকালে বলবৎ কৰা হৈছে আৰু পুনৰ আদেশ নিদিয়া পৰ্যন্ত বাহাল থাকিব বুলি যোৰহাট জিলা তথ্য আৰু জনসংযোগ বিষয়া শাৰদী গগৈয়ে জনাইছে৷