সাংবাদিকৰ তৎপৰতাত বৰপেটাৰোডৰ সেচ্ছাসেৱী সংগঠনে উদ্ধাৰ কৰিলে অসহায় কুকুৰক…
বৰপেটা জিলাৰ হাউলীৰ কৈমাৰিৰ হোমা একাডেমিৰ কাষত বিগত এসপ্তাহ ধৰি এটা কুকুৰে মুখত প্লাষ্টিকৰ টেমা এটা লৈ গুৰি ফুৰি থকা প্ৰত্যক্ষ কৰিছিল হাউলীৰ সাংবাদিক আনিছুজৰ জামানে । খাদ্য বস্তুৰ সন্ধান কৰি থকাৰ সময়তে হঠাৎ কুকুৰটোৰ মুখত লাগি ধৰে এটা প্লাষ্টিকৰ টেমা । যাৰ ফলত কুকুৰটোৱে আহাৰ গ্ৰহন কৰিব পৰা নাছিল ।
এই দৃশ্য সাংবাদিক গৰাকীয়ে প্ৰত্যক্ষ কৰি প্ৰথমে স্থানীয় ৰাইজৰ সহযোগত কুকুৰটোক উদ্ধাৰ কৰাৰ চেষ্টা চলাইছিল যদিও সক্ষম হোৱা নাছিল । এই সন্ধৰ্ভত সাংবাদিক গৰাকীয়ে কুকুৰটোয়ে নৰক যন্ত্ৰণাত ভোগা বুলি এটা বাতৰি যুগুত কৰাৰ পাছতে ৰাজ্যজুৰি কুকুৰ প্ৰেমী লোকে দুখ প্ৰকাশ কৰিছিল ।
সাংবাদিক গৰাকীলৈ ৰাজ্যৰ ভিন্ন প্ৰান্তৰ লোকে ফোন কৰি কুকুৰটোৰ খবৰ লৈছিল । তাৰ পিছতে কুকুৰটোক উদ্ধাৰ কৰাৰ বাবে বৰপেটা ৰোডৰ এটা সেচ্ছাসেৱী সংগঠনে আগবাঢ়ি আহিছিল । সেচ্ছাসেৱী সংগঠনটোৰ নিলম দাস নামৰ এগৰাকী যুৱতীৰ নেতৃত্বত অহা ৫ জনীয়া এটা দলৰ লগতে হাউলীৰ কেই গৰাকী সাংবাদিকৰ সহযোত অৱশেষত কুকুৰ টোক উদ্ধাৰ কৰিবলৈ সক্ষম হয় ।
আনকি কুকুৰটোক উদ্ধাৰ কৰিবলৈ ঘটনাস্থলীত হাউলীৰ অগ্নি নিৰ্বাপক বাহিনীৰ লোকো উপস্থিত হয় । উল্লেখ্য যে ইয়াৰ পুৰ্বেও সাংবাদিক আনিছুজৰ জামানে নিজৰ তৎপৰতাত আবদ্ধ হৈ থকা জীৱ -জন্তুক উদ্ধাৰ কৰি প্ৰকৃতি প্ৰেমৰ নিদৰ্শন দাঙি ধৰিছে । সাংবাদিকৰ এনে কৰ্তব্য দেখি সাংবাদিক গৰাকীক সঁহাৰি জনাইছে।