নাগশংকৰৰ এটি অন্যতম সামাজিক -সাংস্কৃতিক অনুষ্ঠান আলোকে শিক্ষক দিৱসৰ দিনা নাগশংকৰ উচ্চ মাধ্যমিক বিদ্যালয়ৰ অবসৰপ্রাপ্ত শিক্ষক তথা ধলাইবিলৰ চামধৰা গাঁও নিবাসী সমাজকৰ্মী, সংগঠক, সাহিত্যিক কমল ৰাজবংশীক ‘গুৰু ৰত্ন’উপাধি প্ৰদান কৰে। নাগশংকৰ নাট্য ভৱনত আলোকৰ সভাপতি পৰেশ শইকীয়াৰ সঞ্চালনাত অনুষ্ঠিত এক গাম্ভীৰ্যপূৰ্ণ সভাত এই উপাধি প্ৰদান কৰা হয়। পানপুৰ উচ্চতৰ মাধ্যমিক বিদ্যালয়ৰ অধ্যক্ষ বিশ্ব হাজাৰিকা এই অনুষ্ঠানত নিৰ্দিষ্ট বক্তা হিচাপে উপস্থিত আছিল। তেওঁ ডঃ সর্বপল্লী ৰাধাকৃষ্ণনৰ জীৱনাদর্শৰ বিষয়ে মনোজ্ঞ ভাষণ প্ৰদান কৰে। ৰাজবংশীক এটি সম্বৰ্দ্ধনা পত্র, গামোচা, চেলেং, জাপি, স্মৃতিচিহ্ন, পাগুৰি আৰু এটি শৰাই প্রদানৰ অন্তত ‘গুৰুৰত্ন’ উপাধিৰে বিভূষিত কৰা হয়।
সমাবেশেত ৰাজবংশীয়ে বিগত দিনৰ স্মৃতি ৰোমন্থন কৰি শিক্ষক সমাজৰ প্রতি শিক্ষকতাক পেছা হিচাপে নহয় এটি মিছন হিচাপে ল’বলৈ আহ্বান জনায়। এজন শিক্ষক সদায় দূৰদর্শী হোৱাৰ লগতে হাজাৰ হাজাৰ ছাত্ৰ ছাত্ৰীক অনুপ্ৰেৰিত কৰাৰ সক্ষমতা থাকিব লাগে বুলি কয়। সভাৰ সমস্ত কার্যসূচী পৰিচালনা কৰে অলোকৰ উপসভাপতি পুতুল বৰাই। অলোকৰ সম্পাদক বিমান শইকীয়াই ধন্যবাদ জ্ঞাপন কৰে। বৃহত্তৰ নাগশঙ্কৰ অঞ্চলৰ বিভিন্ন সামাজিক-সাংস্কৃতিক সংগঠনসমূহেও ৰাজবংশীক সংবর্ধনা জ্ঞাপন কৰে। সভাত সন্মানীয় অতিথি হিচাপে উপস্থিত আছিল দক্ষিণ নাগশঙ্কৰ উচ্চ বিদ্যালয়ৰ অবসৰপ্রাপ্ত প্রধান শিক্ষক চন্দ্র কান্ত শর্মা, নাগশঙ্কৰ উচ্চ বিদ্যালয়ৰ অবসৰপ্রাপ্ত প্রধান শিক্ষক দুলু গগৈ। সভাত উপস্থিত আছিল হিতেশ বৰুৱা, লাবণ্য দেবী, বল্লভ চাপগাই, লোচন বৰা সহ অনেক বিশিষ্ট ব্যক্তিসকল।