হোজাই, ৮ অক্টোবৰঃ অসম চৰকাৰৰ অভিলাষী অৰুনোদয় আচনি জনসাধাৰণৰ মাজত সজাগতা সৃষ্টিৰ লক্ষ্যৰে হোজাই জিলা প্ৰশাসনে গ্ৰহণ কৰিছে এক অভিনৱ কৌশল৷ নাট্যকাৰ আৰু পৰিচালক অচ্যুত ঠাকুৰীয়াৰ ৰচনা আৰু পৰিচালনাৰে স্থানীয় শিল্পীৰ দহজনীয়া দলে যোৱা সাত অক্টোবৰত এখনি বাটৰ নাটৰ প্ৰথম দৰ্শনীৰ জৰীয়তে অৰুনোদয় আচনিৰ প্ৰচাৰ অভিযানৰ শুভাৰম্ভ কৰে। জিলা সদৰ শংকৰদেৱ নগৰৰ উপায়ুক্ত কাৰ্যালয়ৰ চৌহদত পূৱা দহ বজাত আৰম্ভ হোৱা এই অনুষ্ঠানত বাটৰ নাটৰ প্ৰথম খন দৰ্শনী আনুষ্ঠানিকভাবে শুভাৰম্ভ ঘোষণা কৰি উপায়ুক্ত ডা° সদনেক সিংঙে অৰুনোদয় আচনিৰ লক্ষ্য আৰু উদ্দেশ্য সম্পৰ্কে বক্তব্য দাঙি ধৰে৷ শুভাৰম্ভ অনুষ্ঠানত ডা° সদনেক সিংঙৰ লগতে উপস্থিত থাকে অতিৰিক্ত উপায়ুক্ত প্ৰশান্ত বৰুৱা আৰু লংকা পৌৰসভাৰ কাৰ্যবাহী বিষয়া ডা° লোচন ৰঞ্জন তালুকদাৰ৷ পৰবৰ্তী সময়ত শিল্পীৰ দলটোৱে লংকা চহৰৰ লগতে কাকীৰ বিভিন্ন এলেকাত বাটৰ নাট প্ৰদৰ্শন কৰি ৰাইজৰ মাজত সজাগতাৰ সৃষ্টি কৰিবলৈ সক্ষম হয়৷ জনপ্ৰিয় আচনিখনৰ বহুল প্ৰচাৰৰ বাবে শিল্পীৰ দলটোৱে জিলখনৰ চুকে কোনে এসপ্তাহ ধৰি বাটৰ নাট পৰিবেশন অব্যাহত ৰাখিব।
