মমতা বেনাৰ্জীয়ে কেন্দ্ৰৰ ডিজিটাইজেচনক সমালোচনা কৰি ক’লে-“মোডী চৰকাৰে গ্ৰাম্য দৰিদ্ৰৰ জীৱন দুৰ্বিষহ কৰি তুলিছে…”

পশ্চিম বংগৰ মুখ্যমন্ত্ৰী মমতা বেনাৰ্জীয়ে বৃহস্পতিবাৰে অভিযোগ কৰে যে কেন্দ্ৰই গ্ৰাম্য দৰিদ্ৰ লোকসকলক অনলাইন কাৰ্যকলাপৰ বৃত্তলৈ ঠেলি দি তেওঁলোকৰ জীৱন দুৰ্বিষহ কৰি তুলিছে।

পশ্চিম মিদনাপুৰ জিলাত অনুষ্ঠিত প্ৰশাসনিক পৰ্যালোচনা বৈঠকত ভাষণ দি মুখ্যমন্ত্ৰী মমতা বেনাৰ্জীয়ে কয় “কেন্দ্ৰীয় চৰকাৰে গ্ৰাম্য লোকৰ জীৱনত সম্পূৰ্ণ অনলাইন ব্যৱস্থা প্ৰৱৰ্তন কৰিব বিচাৰিছে। কিন্তু প্ৰান্তীয় জনগোষ্ঠীসমূহে ইয়াৰ লগত কেনেকৈ অভ্যস্ত হ’ব পাৰে? গতিকে, তেওঁলোকৰ জীৱন দুৰ্বিষহ হৈ পৰিছে।”

“মহাত্মা গান্ধী ৰাষ্ট্ৰীয় গ্ৰাম্য নিয়োগ নিশ্চয়তা আইন (এমজিএনৰেগা)ৰ অধীনত ১০০ দিনীয়া চাকৰি আঁচনিৰ ধন পৰিশোধৰ বাবে কেন্দ্ৰই আধাৰ কাৰ্ডৰ সৈতে বেংক একাউণ্টৰ সংযোগ বাধ্যতামূলক কৰা বুলি দাবী কৰে। কিন্তু কেন্দ্রীয় চৰকাৰে জানেনে যে ৰাজ্যৰ কেইবাটাও গ্ৰাম্য ব্লকত এটাও বেংক শাখা নাই? তাত থকা লোকসকলে কি কৰিব?” মুখ্যমন্ত্ৰীয়ে প্ৰশ্ন কৰে।