হোলোঙাপাৰস্থিত জাতীয় বীৰ লাচিত বৰফুকনৰ মৈদাম প্ৰাংগনত স্মাৰক বক্তৃতাৰ আয়োজন
অসমীয়া জাতিৰ স্বাভিমান, সাহস আৰু শৌৰ্য বীৰ্যৰ প্ৰতীক জাতীয় বীৰ লাচিত বৰফুকনৰ মৃত্যু দিৱসটি সোমবাৰে যোৰহাটৰ হোলোঙাপাৰৰ লাচিত মৈদাম প্ৰাঙ্গণত দিনজোৰা কাৰ্যসূচীৰে অনুষ্ঠিত হয় । লাচিত মৈদাম সংৰক্ষণ সমিতিয়ে স্হানীয় ৰাইজৰ সহযোগত উদযাপন কৰা দিৱসটিৰ লগত সংগতি ৰাখি পোনপ্ৰথমবাৰৰ বাবে অনুষ্ঠিত কৰা হয় লাচিত বৰফুকন স্মাৰক বক্তৃতা ।
জাতীয় বীৰ গৰাকীৰ মৃত্যু দিৱস উদযাপনৰ লগত সংগতি ৰাখি পুৱা পতাকা উত্তোলন কৰে লাচিত মৈদাম সংৰক্ষণ সমিতিৰ সভাপতি হৰেন বৰুৱাই ৷ মৈদাম তৰ্পণ অনুষ্ঠান মুকলি কৰে সমাজকৰ্মী তিলেশ্বৰ ফুকনে ৷ ইয়াৰ পাচতে পৰম্পৰাগত ৰীতি নীতিৰে সম্পন্ন হয় ফুৰালুং ৷ দিনৰ এঘাৰ বজাৰ পৰা অনুষ্ঠিত হয় “লাচিত বৰফুকন আৰু শৰাইঘাটৰ যুদ্ধ” শীৰ্ষক বিষয়ত প্ৰথম বাৰ্ষিক লাচিত বৰফুকন স্মাৰক বক্তৃতা ৷
যোৰহাট জিলাৰ উপায়ুক্ত অশোক কুমাৰ বৰ্মনে আনুষ্ঠানিকভাবে উদ্ধোধন কৰা বক্তৃতানুষ্ঠানটোৰ সঞ্চালনা কৰি বিশিষ্ট শিক্ষাবিদ তথা পূৰ্বাঞ্চল তাই সাহিত্য সভাৰ সভাপতি ড° দয়ানন্দ বৰগোঁহায়ে স্মাৰক বক্তৃতা প্ৰদান কৰে । কাকজান মহাবিদ্যালয়ৰ অধ্যক্ষ ড০ৰূপৰেখা বৰদলৈ,অৱসৰপ্ৰাপ্ত অধ্যক্ষ ৰত্নেশ্বৰ গগৈয়ে বিশিষ্ট অতিথিৰ আসন অলংকৃত কৰে । বিকাশ সন্দিকৈয়ে আদৰণি ভাষন প্ৰদান কৰা তথা তুফেল জিলানীয়ে আতধৰা অনুষ্ঠানত মৈদাম সংৰক্ষণ সমিতিৰ সম্পাদক মহেন্দ্ৰ গগৈয়ে শলাগ জ্ঞাপন কৰে ।