দৈনন্দিন বাৰ্তা প্ৰতিবেদন
দিহিংপাটকাইৰ বনভূমি ,বন্যপ্ৰাণীৰ বিচৰণক্ষেত্ৰ আৰু কয়লাখনন বিষয়ত পুনৰ জৰীপ চলোৱা হ’ব।যোৱা ২০১৯ বৰ্ষৰ অক্টোবৰ মাহৰ পৰা অসমত ক’ল ইণ্ডিয়াৰ কয়লা খনন বন্ধ আছে।এইবিষয়ত ২৮ টা চৰ্তসম্বলিত বুজাবুজি পত্ৰ দিয়া হৈছে।এইচৰ্তসমূহ পালনৰ পিছত অসম চৰকাৰে সিদ্ধান্ত ল’ব কয়লা খননৰ অনুমোদন দিবনে নাই।যদিহে বনভূমিৰ উচ্ছেদ বা ক্ষতি হয়,তেন্তে তেনেধৰনৰ খননৰ অনুমতি নিদিয়ে।এইকথা স্পষ্ট কৰি দিছে অসম চৰকাৰে।আজি খানাপাৰা প্ৰশাসনীয় পদাধীকাৰী মহাবিদ্যালয়ত আয়োজিত এক সংবাদমেলত এইকথা স্পষ্ট কৰিছে বন আৰু পৰিবেশ মন্ত্ৰী পৰিমল শুক্লবৈদ্যৰ লগতে উদ্যোগ-বাণিজ্যমন্ত্ৰী চন্দ্ৰমোহন পাটোৱাৰীয়ে।দুয়োজনে কয় যে অসমৰ মুখ্যমন্ত্ৰীয়ে পৰিবেশ ৰক্ষাত সদায় গুৰুত্ব দিয়ে।সেয়ে দহকোটিজোপা গছপুলি ৰোপনৰ নিৰ্দেশ দিছে।বৰ্তমানলৈ ছয়কোটিজোপা ৰোপন কৰা হ’ল।দিহিং পাটকাইৰ বিষয়ত অসম চৰকাৰে কোনো অনুমোদন দিয়া নাই।ক’ল ইণ্ডিয়া কেন্দ্ৰীয় চৰকাৰৰ প্ৰতিষ্ঠান আৰু কয়লা খনন অসমত ১৯৭৩ চনৰ পৰাই চলি আছে।ক’ল ইণ্ডিয়াক দিয়া ৩০ বছৰীয়া লীজ যোৱা ২০০৩ চনতে অন্ত পৰিছে।তথাপি ক’ল ইণ্ডিয়াই নিৰ্দেশনা নবীকৰণ নকৰাকৈ ২০১৩ চনলৈ খনন চলাই গ’ল।ইয়াৰ বাবে ক’ল ইণ্ডিয়াক ৪৩কোটি ২৪ লাখ টকা জৰিমনা আদায় দিয়াৰ নিৰ্দেশ দিয়া হৈছে।ইয়াৰ পিছত ক’ল ইণ্ডিয়াই ২০১৩ চনৰ পৰা ২০২৩ চনলৈ খনন চলাবলৈ আগতীয়া অনুমতি বিছাৰি চৰকাৰলৈ পত্ৰ প্ৰেৰণ কৰে।এই পত্ৰত কোৱা হৈছে যে ২০১২ চনলৈ ৫৭,২০ হেক্টৰ ভূমিত কয়লা খনন চলোৱা হৈছে।নতুনকৈ একাংশ সংযোজন কৰি মুঠ ৯৮,৫৯ হেক্টৰ ভূমিত খনন চলোৱাৰ অনুমতি বিচাৰিছে।ইয়াৰ অধ্যয়নৰ বাবে চৰকাৰে এখন সমিতি গঠন কৰিছিল।২০১৫ চনৰ আগষ্ট মাহত গঠন কৰা সমিতিখনত গুৱাহাটী বিশ্ববিদ্যালয়ৰ অৱসৰী অধ্যাপক ডঃ পি চি ভট্ৰাচাৰ্য, গুৱাহাটী আই আই টিৰ অধ্যাপক ডঃ চি মল্লিকাৰ্জুনসহ একাংশ বন বিষয়া আছিল।এইসমিতিয়ে ২০১৬ চনৰ এপ্ৰিল মাহত টিকক অপেন কাষ্ট অঞ্চল ভ্ৰমণ কৰিছিল। এই সমিতিৰ প্ৰতিবেনৰ চৰকাৰে কেন্দ্ৰলৈ প্ৰেৰণ কৰে।এই প্ৰতিবেদনৰ ভিত্তিতে ভাৰত চৰকাৰে ২৮ টা চৰ্তসহ অনুমোদন জনাইছে।এই চৰ্তসমূহ পালন কৰিলে অসম চৰকাৰে শেহত অনুমোদন জনোৱাৰ দায়িত্ব আছে।বৰ্তমানলৈ অসম চৰকাৰে অনুমোদন জনোৱা নাই বুলি ব্যক্ত কৰে।বনভূমিত কেতিয়াও কয়লা খননৰ অনুমতি নিদিয়ে বুলি স্পষ্ট কৰে।ইফালে অসমত সঘনে আৰক্ষী-বন বিভাগে আটক কৰা কয়লা ট্ৰাক সমূহৰ কয়লাসমূহ অসমৰ নহয় বুলি স্পষ্ট কৰি দিয়ে চন্দ্ৰমোহন।এইকয়লাবোৰ অৰুনাচল,মেঘালয়,নাগালেণ্ড আদিৰ পৰা অনা।অসমৰ চাহ বাগান, ইটা ভাটা আদিত কয়লাৰ আৱশ্যক হয়।গতিকে বিধিগতভাবে কয়লা সৰবৰাহ কৰা হৈছে বুলি অৱগত কৰে।ইয়াৰ বিপৰীতে অসমত চলি থকা অবৈধ কয়লাৰ খনন তথা সৰবৰাহৰ বিষয়ে অসম চৰকাৰ অৱগত নহয় বুলি দুইমন্ত্ৰীয়ে ব্যক্ত কৰে।।