পঞ্চম শ্ৰেণীলৈকে কোনো ছাত্ৰ-ছাত্ৰীয়ে ইংৰাজী মাধ্যমত পঢ়িব নোৱাৰিব : হিমন্ত বিশ্ব শৰ্মা

“পঞ্চম শ্ৰেণীলৈকে কোনো ছাত্ৰ-ছাত্ৰীয়ে ইংৰাজী মাধ্যমত পঢ়িব নোৱাৰিব, নিজ নিজ মাতৃভাষাত পঢ়িব লাগিব ।” বৃহস্পতিবাৰে ধনশিৰি মহকুমাৰ সীমান্তৰ উৰিয়ামঘাটৰ সন্মিলীত বড়ো গণমঞ্চৰ সপ্তম বাৰ্ষিক অধিবেশনত মুখ্য অতিথি হিচাবে উপস্থিত থাকি এই মন্তব্য কৰে মন্ত্ৰী হিমন্ত বিশ্ব শৰ্মাই।

লগতে মন্ত্ৰী হিমন্ত বিশ্ব শৰ্মাই কয় যে “অসমীয়াৰ লগতে বড়ো, ৰাভা, ডিমাচা, কাৰ্বিৰ লগতে নানা জনগোষ্ঠীৰ নিজা নিজা ভাষা সংষ্কৃতি আছে যাক আমি পাহৰিব নোৱাৰো । সেয়ে অসমীয়াৰ লগতে, বড়োৱে বড়ো, ৰাভাই ৰাভা, কাৰ্বিয়ে কাৰ্বি ভাষাত পঢ়িবৰ বাবে সুবিধা পাব ।”

ইফালে শিক্ষাগ্ৰহণৰ ক্ষেত্ৰতো চৰকাৰে ৰাষ্ট্ৰীয় শিক্ষা নীতিত নিজ মাতৃভাষাত পঞ্চম শ্ৰেণীলৈকে পঢ়াৰ সুবিধা কৰি দিছে বুলি মন্ত্ৰীগৰাকীয়ে মন্তব্য কৰে। তেখেতে কয়, ”চৰকাৰে ৰাষ্ট্ৰীয় শিক্ষা নীতিত নিজ মাতৃভাষাত পঞ্চম শ্ৰেণীলৈকে পঢ়াৰ সুবিধা কৰি দিছে। কিন্তু নিজ মাতৃভাষাত পঢ়িবৰ বাবে, ভাষা সংস্কৃতি ৰক্ষাৰ বাবে যথেষ্ঠ শিক্ষক লাগিব। সেয়েহে চৰকাৰে সিদ্ধান্ত লৈছে অহা বৰ্ষত এই বছৰতকৈ বহু বেছি শিক্ষক নিযুক্তি দিব।”

সকলো ছাত্ৰ-ছাত্ৰীক টেট পৰীক্ষাৰ বাবে অধ্যয়ন কৰি থাকিবলৈকো মন্ত্ৰী শৰ্মাই আহ্বান জনায়। তেখেতে কয়, ”এতিয়া যিদৰে এ: আই চাকৰিৰ বাবে যুৱক-যুৱতীসকলে পুৱা উঠি চেষ্টা কৰিছিল, ঠিক সেইদৰে পুনৰ অহা বছৰ টেট পৰীক্ষাৰ বাবে তেওঁলোকে কষ্ট কৰক|”