Oiii Police । অসমীয়া চলচ্চিত্ৰ উদ্যোগত বৰ্তমান সময়ত এক ইতিবাচক পৰিৱেশ বিৰাজ কৰিছে। ইখনৰ পিছত সিখন অসমীয়া ছবিয়ে দৰ্শকৰ সঁহাৰি লাভ কৰাৰ মাজতে আগন্তুক কেইবামাহৰ বাবে একাধিক ছবিৰ মুক্তিৰ তাৰিখ ঘোষণা কৰা হৈছে। এনে পৰিস্থিতিত মুক্তিৰ পূৰ্বে এক গুৰুত্বপূৰ্ণ সিদ্ধান্ত গ্ৰহণ কৰিছে ‘Oiii Police!!!’ ছবিৰ টীমে।
জনপ্ৰিয় পৰিচালক সুব্ৰত কাকতিৰ পৰিচালনা আৰু ছুপাৰষ্টাৰ ৰবি শর্মাৰ অভিনয়েৰে সজোৱা ‘Oiii Police!!!’ ছবিখন ৩ জুলাইত ৰাজ্যজুৰি মুক্তি লাভ কৰাৰ কথা আছিল। কিন্তু ৮ জুনৰ সন্ধিয়া ছ’চিয়েল মিডিয়াৰ জৰিয়তে ছবিখনৰ মুক্তিৰ তাৰিখ পিছুৱাই দিয়াৰ কথা আনুষ্ঠানিকভাৱে ঘোষণা কৰে ছবিখনৰ নিৰ্মাতা-কুশলীয়ে।
জানিব পৰা মতে, একেই দিনা ‘ককা দেউতা নাতি আৰু হাতী-২’ ছবিখন মুক্তি লাভ কৰিবলৈ সাজু হোৱাত দুয়োখন ছবিৰ মাজত সংঘাত এৰাই চলাৰ লক্ষ্যৰে ‘Oiii Police!!!’ৰ মুক্তিৰ দিন সলনি কৰাৰ সিদ্ধান্ত লোৱা হৈছে।
ছ’চিয়েল মিডিয়াত প্ৰকাশ কৰা এক ভিডিঅ’ বাৰ্তাত পৰিচালক সুব্ৰত কাকতি, অভিনেতা ৰবি শর্মা আৰু অভিনেত্ৰী অমৃতা গগৈয়ে এই সিদ্ধান্তৰ কথা জনায়। লগতে অতি সোনকালে ছবিখনৰ নতুন মুক্তিৰ তাৰিখ ঘোষণা কৰা হ’ব বুলিও তেওঁলোকে উল্লেখ কৰে।
উল্লেখ্য যে, চলিত বৰ্ষৰ ১৩ এপ্ৰিলত ছবিখনৰ টিজাৰ মুকলি কৰি ৩ জুলাইৰ মুক্তিৰ দিন ঘোষণা কৰা হৈছিল। ইতিমধ্যে ছবিখনক লৈ দৰ্শকৰ মাজত যথেষ্ট আগ্ৰহৰ সৃষ্টি হৈছে।
আনহাতে, পৰিচালক সুব্ৰত কাকতিৰ পূৰ্বৰ ছবি ‘শ্ৰী ৰঘূপতি’ আৰু ‘বিদূৰভাই’ বক্স অফিচত সফলতা লাভ কৰিছিল। বিশেষকৈ ‘শ্ৰী ৰঘূপতি’ ছবিখনৰ জৰিয়তে এগৰাকী চলচ্চিত্ৰ পৰিচালক হিচাপে আত্মপ্ৰকাশ কৰি সুব্ৰত কাকতিয়ে অসমীয়া ছবিজগতত নিজৰ এক বিশেষ স্থান গঢ়ি তুলিবলৈ সক্ষম হৈছিল।
