দুলীয়াজান অইলৰ ৭০০০ লিটাৰ চোৰাং কনণ্ডেণ্টছেট তেল জব্দ আৰক্ষীৰ : ৰঙাঘৰলৈ ২

দুলীয়াজান

সোমবাৰে নিশা দুলীয়াজান আৰক্ষী আৰু নাওহলীয়া আৰক্ষীয়ে যুটীয়া অভিযান চলাই অইল ইণ্ডিয়া লিমিটেডৰ বৃহৎ চোৰাং কনণ্ডেণ্টছেট তেল জব্দ কৰিবলৈ সক্ষম হয়৷ উল্লেখ্য যে সোমবাৰে নিশা দুলীয়াজানৰ এটা আৰক্ষী দলে গোপন সূত্ৰৰ পম খেদি ২ নং নাওহলীয়াৰ বলাই মজুমদাৰ নামৰ লোকজনৰ ঘৰত অভিযান চলাই ১৫০০ লিটাৰৰো অধিক অইল ইণ্ডিয়া লিমিটেডৰ চোৰাং কনণ্ডেণ্টছেট তেল জব্দ কৰে৷ বলাই মজুমদাৰৰ ঘৰত অভিযান চলাই থকা সময়ত উমান পাই একে অঞ্চলৰ পৰেশ মজুমদাৰ নামৰ লোকজনৰ ঘৰতো অভিযান চলায়। আৰক্ষীৰ অভিযানত পৰেশ মজুমদাৰৰ ঘৰৰ পৰা ৫,৫০০ লিটাৰ চোৰাং কনণ্ডেণ্টছেট তেল জব্দ কৰিবলৈ সক্ষম হয়। খবৰ অনুসৰি, উক্ত তেল অইল ইণ্ডিয়া লিমিটেডৰ বিভিন্ন তৈলক্ষেত্ৰৰ পাইপ কাটি অভিনৱ কৌশলেৰে সংগ্ৰহ কৰি অন্য অন্য ঠাইলৈ ছালান দিবৰ বাবে ঘৰত মজুত কৰি ৰাখিছিল। ইতিমধ্যেই আৰক্ষীয়ে কনণ্ডেণ্টছেট তেল চুৰি অপৰাধত দুলীয়াজান আৰক্ষী থানাৰ অন্তৰ্গত তথা নাওহলীয়া আৰক্ষী চকীৰ অধীনৰ ২নং নাওহলীয়া অঞ্চলৰ বলাই মজুমদাৰ আৰু পাপু মজুমদাৰক আৰক্ষীয়ে আটক কৰি মঙলবাৰে কাৰাগাৰলৈ প্ৰেৰণ কৰে। ইফালে তেল চুৰি চক্ৰটোৰ লগত জড়িত আৰু লোক শীঘ্ৰেই আৰক্ষীৰ জালত পৰাৰ সম্ভাৱনা আছে বুলি আৰক্ষী সূত্ৰই জানিবলৈ দিয়ে৷Attachments area