এখন দুখন নহয়, এশ পাঁচ খন বিদ্যালয়ৰ স্বীকৃতি বাতিল কৰিব মাধ্যমিক শিক্ষা পৰিষদ চমুকৈ ছেবাই। উদ্বিগ্ন চিন্তিত ছাত্ৰ ছাত্ৰীৰ লগতে অভিভাৱক সকল। মেট্ৰিকৰ ফলাফলেই যেন কাল অমানিশা নমাই আনিলে এই বিদ্যালয় কেইখনলৈ। মেট্ৰিকৰ ফলাফলৰ বাবে দায়ী কোন এই বিষয়টো চৰকাৰ তথা শিক্ষা বিভাগে পৰ্যালোচনা কৰিছেনে। ফলাফল ওলোৱাৰ পিছত দুৰ্বল বিদ্যালয় কেইখনৰ বিৰুদ্ধে কি ব্যৱস্হা গ্ৰহন কৰিছে বিভাগটোৱে। বহু বিদ্যালয়ৰ অবস্হা তথৈবচ। ভঙা ডেক্স বেঞ্চ, অনাময় ব্যৱস্থাৰ নাই সুবিধা, নাই খোৱা পানীৰ সুবিধা পৰ্যন্ত। আনকি বহু বিদ্যালয়ত নাই পৰ্যাপ্ত শিক্ষক শিক্ষয়ত্ৰী। আনহাতে শিক্ষক শিক্ষয়ত্ৰীৰ সমস্যাও অনেক। প্ৰায় বছৰটোৰ অৰ্ধেক দিন ৰাজপথত আন্দোলন কৰোতেই যায়।

একাংশ শিক্ষকৰ বিৰুদ্ধে আছে জলপানিৰ ধন আত্মসাতৰ অভিযোগ। এই সকল শিক্ষক শিক্ষয়ত্ৰীৰ এচাম চৰকাৰী চাকৰীত নিযুক্তিৰ পূৰ্বে ব্যক্তিগত খণ্ডৰ বিদ্যালয়ত নিযুক্ত হৈ আছিল। সেই সময়ত তেওঁলোকে নিৰ্দিষ্ট সময়ত শ্ৰেনীত উপস্থিত থকাৰ বিপৰীতে চৰকাৰী চাকৰিত বহুতেই পাহৰি যায় নিয়মানুবৰ্তিতা। একেদৰে তাহানি স্কুল পৰিদৰ্শক সকলে চাডেন ভিজিট দি বিদ্যালয়ৰ বিষয়ে উমান লৈছিল। আজি কালি বাতানুকূল কোঠাৰ পৰা পৰিদৰ্শকে বিদ্যালয় পৰিদৰ্শন কৰিবলৈ নাযায়। চৰকাৰে এনে কেৰোণ সমূহ আতৰোৱাৰ বিপৰীতে কেতিয়াবা ছাত্ৰ ছাত্ৰীৰ সংখ্যা কম বুলি বিদ্যালয় বন্ধ কৰি আন বিদ্যালয়ৰ সৈতে সংলগ্ন কৰি আহিছে। শেহতীয়াকৈ নতুন শিক্ষা নীতি ৰূপায়ন কৰাৰ প্ৰাক্ মূহুৰ্তত মেট্ৰিকৰ ফলাফলৰ দোহাই দি বন্ধ কৰিবলৈ ওলাইছে শতাধিক বিদ্যালয়। এইয়া কিমান যুক্তিসংগত সেয়া অসমবাসীৰ বিচাৰ্যৰ বিষয়।

বন্দনা কলিতা হত্যাকাৰী হৈছিল কিয়? অনাদৰ অৱহেলা নে নতুন চিত্ৰ নাট্য! প্ৰেম হিংসাত পৰিণত হৈছিল কিয়?
ক্ষোভে জন্ম দিছিল নেকি লালসাৰ ! গুৱাহাটীৰ ডাবল মাৰ্ডাৰ খ্যাত ঘটনাৰ খলনায়িকা বন্দনা কলিতা জন্মগত ভাবে হত্যাকাৰী আছিল নেকি। আৰক্ষীক দিয়া স্বীকাৰোক্তিত কিমান সত্যতা আছে। নে চতুৰ বন্দিতাৰ এইয়া অনুকম্পা আদায়ৰ নতুন চিত্ৰনাট্য। কি কৈছিল আৰক্ষীক বন্দনাই-

বাৰ বছৰ পূৰ্বে নাৰেংগীৰ অমৰ দে’ ৰ সৈতে প্ৰেম বিবাহ হৈছিল বন্দনাৰ। বিয়াত দুয়োখন ঘৰৰ মত নথকাত কিছু সমস্যাত পৰিছিল নৱ বিবাহিতা দম্পতীয়ে। বন্দনাই কল চেন্টাৰত কাম কৰি ঘৰ চলাইছিল। আনহাতে অমৰ আছিল সুৰাপায়ী। পিছলৈ নিষিদ্ধ ড্ৰাগছ সেৱনত ধৰাৰ লগতে নাৰীৰ প্ৰতি গঢ়ি উঠিছিল আন এক আসক্তিয়ে। বন্দনাৰ মতে অমৰে মেঘালয়ৰ কোনোবা যুবতীক ভাল পাইছিল। এই লৈ দুয়োৰে মাজত সৃষ্টি হৈছিল বাক বিতণ্ডাৰ। ক্ৰমে অত্যাচাৰ বাঢ়ি দুয়োৰে মাজত ব্যৱধানো বৃদ্ধি হৈছিল। অমৰ ইমান তললৈ গৈছিল যে নিজৰ পত্নীৰ সম্মুখত আন যুৱতীৰ সৈতে অন্তৰংগ মূহুৰ্ত কটাবলৈ দ্বিধা কৰা নাছিল। উপায়হীন হৈ বন্দনাই শাহু শংকৰী দে’ক সকলো জনাইছিল যদিও পুত্ৰস্নেহৰ বাবে পোটছাটেই অগ্ৰাহ্য কৰিছিল বন্দনাৰ অভিযোগ। লাহে লাহে স্বামীৰ অবহেলা আৰু নষ্ট চৰিত্ৰৰ লগতে শাহুৱেকৰ কাৰ্যই ক্ষোভৰ জন্ম দিছিল বন্দনাৰ হৃদয়ত। বন্দনাৰ ভাষ্যমতে অমৰৰ অভিষাৰৰ দৃশ্য ৰেকৰ্ডিং কৰি মাকক দেখুৱাই দিয়াৰ পিছত বন্দনাক ধৈয্য ধৰিবলৈ দিয়া উপদেশে গুলী খোৱা বাঘল ৰূপান্তৰ কৰিছিল বন্দনাক। এই সময়ত বন্দনাৰ দুখৰ সমভাগী হৈছিল একালৰ কলেজীয়া সহপাঠী ধনটি ডেকা। দিনবোৰ পাৰ হৈ গৈছিল তেনেদৰে। ইফালে অবস্হা শোচনীয় হৈ আহিছিল অমৰৰ।

শংকৰী দে’ পুত্ৰৰ খাটিৰত বন্দনাক আকোৱালি লৈছিল যদিও বন্দনাই লব পৰা নাছিল। শাহুৱেকৰ দুৰ্বলতাৰ সুযোগ লৈ শংকৰী দে’ৰ পৰা ধন সৰকোৱাৰ নামি পৰিছিল বন্দনা। ইতিমধ্যে তেওঁলোকৰ লগ লাগিছিল অৰূপ ডেকা। ধনটিক গাড়ী কিনিবলৈ টকা দিয়াৰ লগতে ভনীয়েকৰ বিয়াৰ বাবেও দিছিল ধন। একেদৰে অৰূপৰ বিয়াৰ বাবেও দিছিল দুই লাখ টকা। ধনটিৰ ঘৰতেই এই হত্যাকাণ্ডৰ পৰিকল্পনা কৰিছিল বন্দনাই। বন্দনাৰ হত্যাকাণ্ডৰ আৰত প্ৰতিশোধ নে পৰকীয়া প্ৰেম সেয়া আৰক্ষীৰ তদন্ত পোহৰলৈ আহিব। এই হত্যাকাণ্ডত ধনৰ লালসা লুকাই আছিল নেকি সেইটোও নুই কৰিব নোৱাৰি। অবশ্যে এই সকলো জল্পনা কল্পনাৰ ওৰ পৰিব আৰক্ষীৰ নিৰপেক্ষ তদন্তত।

ৰাজ্যত চলি আছে উচ্চতৰ মাধ্যমিকৰ চূড়ান্ত পৰীক্ষা। আকৌ ৩ মাৰ্চৰ পৰা আৰম্ভ হব হাইস্কুল শিক্ষান্ত চূড়ান্ত পৰীক্ষা। শিলসাঁকোৰ বেদখল মুক্ত কৰিবলৈ পূৰ্বে সময় নোপোৱা মহানগৰ উন্নয়ন প্ৰাধিকৰণৰ কৰ্তৃপক্ষই আজি বিশাল আৰক্ষী বাহিনী, বুলড’জাৰ লৈ এফালৰ পৰা ধ্বংস কৰি যায় বেদখলকাৰীৰ বাসগৃহ। উচ্ছেদিত জনতাৰ কৰুণ বিননী, ছাত্ৰ ছাত্ৰীৰ অনুৰোধেও তিলমাত্ৰ সহানুভূতি আদায় কৰিব নোৱাৰিলে। চৰকাৰে চৰকাৰী কাম কৰিছে।

কবলৈ একো নাই। কিন্তু প্ৰশ্ন হৈছে কিয় ইতিপূৰ্বেও শিলসাঁকোত উচ্ছেদ চলোৱাৰ সময়ত চৰকাৰে সংস্হাপন দিয়াৰ কথা কৈছিল উচ্ছেদিত সকলক। প্ৰশাসনে পূৰ্বে শিলসাঁকোত বেদখল হোৱা দৃষ্টি খোচৰ হোৱা নাছিল নেকি । একেদৰে চৰকাৰী ভূমিত কি আইনৰ অধীনত শক্তি বিভাগে বিদ্যুত সংযোগ কৰিছিল। অবৈধ দখলকাৰীক অবৈধ ভাবে বিদ্যুত যোগান দিয়া বাবে দোষী বিষয়া আমোলাৰ বিৰুদ্ধে চৰকাৰে কি ব্যৱস্হা গ্ৰহন কৰিব। একেদৰে দীৰ্ঘদিন ধৰি শক্তি বিভাগে আদায় কৰি অহা মাচুল ওভোটাই দিবনে দুৰ্ভগীয়া সকলক। এইয়া সচেতন মহলৰ লগতে আজি সৰ্বত্ৰে চৰ্চিত হোৱা বিষয়। চৰকাৰ প্ৰশাসনে ৰাইজক উত্তৰ দিয়ে নে নাই সেয়া সময়ত পোহৰলৈ আহিব।