প্রত্যেক বছৰৰ দৰে এই বছৰো সদ্যঘোষিত সৰ্বভাৰতীয় মেডিকেল প্রৱেশ পৰীক্ষাত(Neet) নগাঁৱৰ অগ্রনী শিক্ষানুষ্ঠান ডাছোৱানী ক্লাছেচ সফলতাৰ ধাৰা অব্যাহত ৰাখিবলৈ সক্ষম হৈছে । এইবাৰ শিক্ষা প্রতিষ্ঠান খনৰ পৰা মুঠ অৱতীৰ্ণ হোৱা ১২০ জন ছাত্ৰ-ছাত্রীৰ ভিতৰত ১০০ জনে মেডিকেল প্রৱেশ পৰীক্ষাত আৰু ২০ জনে ইঞ্জিনিয়াৰিং প্রৱেশ পৰীক্ষাত সফলতা লাভ কৰিবলৈ সক্ষম হৈছে । উল্লেখ্য যে Neet পৰীক্ষাত নগাঁৱৰ নীল আকাশ বৰদলৈয়ে ৬৫০ নম্বৰ লাভ কৰি সমগ্ৰ মধ্য অসমখনৰ ভিতৰত শীর্ষস্থান দখল কৰি প্রতিষ্ঠান খনৰ লগতে নগাঁও জিলালৈ সু-নাম কঢ়িয়াই আনিছে ।এইবাৰ NEET পৰীক্ষাত বিশেষ সফলতা লাভ কৰা ছাত্র-ছাত্ৰী সকল ক্ৰমে:- নীলআকাশ বৰদলৈ (৬৫০) , দিপাংকৰ বৰদলৈ (৬০৭) , অমনজ্যোতি মহন্ত (৫৭৯), মৃদুস্মিতা(৫২৯), অজয় মন্দল(৫২৭) ,
প্ৰতিষ্ঠান খনৰ পৰিচালক প্ৰাঞ্জল কুমাৰ বৰাই জনোৱা মতে NEET পৰীক্ষাত অৱতীৰ্ণ ছাত্ৰ-ছাত্ৰীৰ ভিতৰত 40 জন ছাত্ৰ-ছাত্ৰীয়ে চৰকাৰী চিকিৎসা মহাবিদ্যালয়ত আৰু ২১ জন ছাত্ৰ-ছাত্ৰীয়ে NIT আৰু চৰকাৰী ইঞ্জিনিয়াৰিং মহাবিদ্যালয়ত পঢ়িবৰ বাবে সুবিধা লাভ কৰিব । উল্লেখযোগ্য যে JEE পৰীক্ষাতো এইবছৰ প্ৰতিষ্ঠান খনৰ পৰা অৰুনাভ কাশ্যপে ৯৯% লাভ কৰি নগাঁৱৰ ভিতৰতে শীৰ্ষস্থান অধিকাৰ কৰিছে । প্ৰতিষ্ঠান খনৰ উত্তৰণৰ বাবে ৰাজস্থান কোটাৰ পৰা অহা ৮জন বিশেষ অভিজ্ঞ শিক্ষকে পাঠদান কৰে । ৰাতিপুৱা ৯বজাৰ পৰা আবেলি ৪বজালৈ নিয়মিত পাঠদান আৰু সাপ্তাহিক মূল্যায়নৰ ব্যৱস্থাই ছাত্ৰ-ছাত্ৰী সকলক আগুৱাই নিয়ে বুলি পৰিচালক জনে আমাক অৱগত কৰে।

ডাছোৱানীৰ এই সাফল্যই জিলাখনলৈ এক সুনাম কঢ়িয়াই অনাৰ লগতে শিক্ষা প্ৰতিষ্ঠান খনৰ ছাত্ৰ-ছাত্ৰী, শিক্ষক, অভিভাৱক সকলৰ মাজত এক আনন্দৰ পৰিৱেশ বিৰাজ কৰিছে । এগৰাকী ছাত্র বা ছাত্ৰীক সৰ্বভাৰতীয় পৰ্যায়ৰ এই পৰীক্ষাৰ বাবে প্ৰস্তুত কৰি তোলাৰ ক্ষেত্ৰত ডাছোৱানী ক্লাছেচে কঠোৰ অনুশীলনৰ আৰু ছাত্র ছাত্ৰী সকলক নিয়মিত শ্ৰেণী সমুহত উপস্থিতিৰ ওপৰত সদায়ে গুৰুত্ব দি আহিছে । সেয়ে বিগত কিছু বছৰৰ পৰা এই শিক্ষা প্ৰতিষ্ঠান খনে এশ শতাংশ সফলতাৰ ধাৰা অব্যাহত ৰাখিবলৈ সক্ষম হৈছে । আজিৰ এই ফলাফলে এক উৎসৱ মুখৰ পৰিবেশৰ সৃষ্টি কৰে নগাঁও চহৰত।

ভৃপেন হাজৰিকাৰ গীতেই হৈছে আমাৰ জীৱন যুঁজত আগুৱাই যোৱাৰ অমোঘ বাণী, প্ৰেৰণা।ৰাজ্য চৰকাৰৰ সাংস্কৃতিক বিভাগৰ উদ্যোগত জালুকবাৰীৰ ড০ভূপেন হাজৰিকা সমাধিক্ষেত্রত তেখেতৰ ৯৬তম জন্ম দিৱস উপলক্ষে আয়োজিত স্মৃতিচাৰণ অনুষ্ঠানত ভাষন প্ৰদান কৰি সাংস্কৃতিক বিভাগৰ মন্ত্রী বিমল বড়াই এইদৰে কয়। ভৃপেন দাই প্ৰতিটো দশকতে আমাক তেখেতৰ চিন্তা আৰু কৰ্মেৰে প্ৰেৰণা যোগাই যোৱাৰ লগতে আমাক সজাগ কৰি থৈ গৈছে বুলিও মন্ত্রী বড়াই উল্লেখ কৰে।সাংস্কৃতিক বিভাগৰ সচিব লয়া মাদুৰীৰ আদৰণি ভাষনেৰে আৰম্ভ হোৱা স্মৃতিচাৰণ অনুষ্ঠানটিত পৰ্যটন, জনস্বাস্থ্য কাৰিকৰী আদি বিভাগৰ মন্ত্রী জয়ন্ত মল্ল বৰুৱা আৰু হস্ত তাঁত বস্ত্ৰ বিভাগৰ মন্ত্রী ঊৰ্খাও গৌৰা ব্ৰহ্ম, ড০ভূপেন হাজৰিকাৰ ভাতৃ সমৰ হাজৰিকা আৰু অভিনেতা যতীন বৰা উপস্থিত আছিল। মন্ত্রী জয়ন্ত মল্ল বৰুৱাই অসমীয়াই কেতিয়াও ডঃভৃপেন হাজৰিকাক পাহৰিব নোৱাৰে বুলি তেওঁৰ ভাষণত উল্লেখ কৰে। আমি আজিও পদে পদে তেখেতৰ অভাৱ অনুভব কৰো বুলিও তেওঁ কয়।

অনুষ্ঠানত ডঃভৃপেন হাজৰিকাৰ ভাতৃ সমৰ হাজৰিকাই সুধাকণ্ঠৰ জিলিকাব লুইতৰে পাৰ- গীতটি পৰিৱেশন কৰে। গীত আৰু কথাৰে মুখৰিত অনুষ্ঠানটিত ৰূপম ভৃঞা, নিৰ্মালি দাস, গোবিন্দ বৈশ্য আদিয়ে ভূপেন্দ্র সংগীত পৰিৱেশন কৰে। ইয়াৰপৃ্ৰ্বে বিশিষ্ট অতিথি কেইগৰাকীয়ে ডঃ ভৃপেন হাজৰিকাৰ প্ৰতিমুৰ্তি আৰু সমাধিত পুষ্পাঞ্জলি অৰ্পণেৰে মহান শিল্পী গৰাকীৰ প্ৰতি শ্ৰদ্ধাঞ্জলি অৰ্পণ কৰে।

সমাগত দূৰ্গা পূজা উদযাপন উপলক্ষে আজি কামৰূপ জিলাৰ সংহত উপায়ুক্তৰ কাৰ্যালয়ৰ সভাকক্ষত এখন গুৰুত্বপূৰ্ণ সভাৰ আয়োজন কৰা হয়। অতিৰিক্ত উপায়ুক্ত ধ্ৰুৱজ্যোতি দাসৰ সভাপতিত্বত আয়োজিত এই সভাত জিলাৰ অতিৰিক্ত আৰক্ষী অধীক্ষক আছিফ আহমেদ, ৰাজহ চক্ৰ বিষয়াসকল, সহকাৰী আয়ুক্তসকল, অগ্নি নিৰ্বাপক বাহিনী, লোকনিৰ্মাণ বিভাগ, অসম শক্তি বিতৰণ কোম্পানী, এন ডি আৰ এফ, এছ ডি আৰ এফ আদিৰ জ্যেষ্ঠ বিষয়াববীয়াসকল তথা ৰঙিয়া মহকুমাকে ধৰি জিলাখনৰ বিভিন্ন প্ৰান্তৰ প্ৰায় ডেৰ শতাধিক পূজা সমিতিৰ প্ৰতিনিধিসকল উপস্থিত থাকে। সভাত অতিৰিক্ত উপায়ুক্ত তথা অতিৰিক্ত আৰক্ষী অধীক্ষকে পূজা সমিতিসমূহৰ কৰণীয় বিভিন্ন দিশ সম্পৰ্কে বিস্তৃতভাৱে অৱগত কৰাৰ লগতে অহা ২৫ ছেপ্টেম্বৰৰ ভিতৰত পূজা আয়োজনৰ যাৱতীয় অনুমতিৰ বাবে আৱেদন কৰিবলৈ আয়োজক সমিতিসমূহলৈ আহ্বান জনায়। পূজা মণ্ডপসমূহৰ বাবে অগ্নিনিৰ্বাপক বাহিনী, শক্তি বিভাগ আদিৰ আপত্তিবিহীন প্ৰমাণপত্ৰসমূহ আৱেদন কৰাৰ পিছত যথাসম্ভৱ সোনকালে প্ৰদান কৰাৰ ব্যৱস্থা গ্ৰহণৰ বাবেও তেওঁ সংশ্লিষ্ট বিভাগসমূহক অনুৰোধ জনায়।

উল্লেখ্যযোগ্য যে এইবাৰৰ পৰা কামৰূপ জিলা প্ৰশাসনে পূজা আয়োজনৰ অনুমতিৰ বাবে ই-ডিষ্ট্ৰিক্ট পৰ্টেলযোগে অনলাইনযোগে আৱেদনৰ প্ৰক্ৰিয়াও আৰম্ভ কৰিছে। আজিৰ সভাত ৰঙিয়াৰ সহকাৰী আয়ুক্ত অম্লান বৈশ্যই এই প্ৰক্ৰিয়াৰ বিষয়ে সবিশেষ অৱগত কৰে। তেওঁ অৱগত কৰা অনুসৰি পূজা সমিতিসমূহে পূজাৰ স্থান, অগ্নিনিৰ্বাপক বাহিনী আৰু শক্তি বিভাগৰ আপত্তিবিহীন প্ৰমাণপত্ৰ আগতীয়াকৈ সংগ্ৰহ কৰি লোৱাৰ পাছত স্থানীয় ৰাজহ চক্ৰ বিষয়াৰ কাৰ্যালয়ৰ ৰাজহুৱা সেৱা কেন্দ্ৰলৈ গৈ অনুমতিৰ বাবে অনলাইনযোগে আৱেদন জনাব পাৰিব তথা যাৱতীয় প্ৰক্ৰিয়া সমাপ্ত হোৱাৰ পাছত জিলা প্ৰশাসনে জাৰি কৰা প্ৰমাণপত্ৰ নিজৰ মোবাইলৰ জৰিয়তেই ডাউনলোড কৰিব পাৰিব।

আজিৰ সভাত অতিৰিক্ত উপায়ুক্ত তথা অতিৰিক্ত আৰক্ষী অধীক্ষকে সকলো পূজা মণ্ডপতে পুৰুষ আৰু মহিলাৰ বাবে পৃথককৈ প্ৰৱেশ আৰু প্ৰস্থানৰ ব্যৱস্থা কৰাৰ লগতে পুৰুষ-মহিলা উভয়ৰে বাবে সুকীয়া প্ৰস্ৰাৱাগাৰৰ সু-ব্যৱস্থা কৰিবলৈ পূজা সমিতিসমূহলৈ আহ্বান জনায়। সেইদৰে পূজা মণ্ডপসমূহত পৰ্যাপ্ত সংখ্যক স্বেচ্ছাসেৱক নিয়োগ কৰা, নৈশ পহৰাৰ ব্যৱস্থা সুনিশ্চিত কৰা, সম্ভৱস্থলত চিচিটিভি সংস্থাপন অন্যথা ভিডিঅ’গ্ৰাফীৰ ব্যৱস্থা কৰা, মাহ-প্ৰসাদ, ভোগ আদি প্ৰস্তুতিৰ ক্ষেত্ৰত প্ৰয়োজনীয় সাৱধানতা অৱলম্বন কৰাৰ বাবে আয়োজকসকলক অনুৰোধ জনোৱা হয়। ৰাজপথ অৱৰোধ কৰি পূজা মণ্ডপ নিৰ্মাণ, যান-বাহন, ব্যৱসায়িক প্ৰতিষ্ঠান আদিৰ পৰা বলপূৰ্বক চান্দা সংগ্ৰহ, নিশাৰ ভাগত উচ্চ স্বৰত অনুভাষ যন্ত্ৰৰ ব্যৱহাৰ তথা পূজা মণ্ডপৰ আশে-পাশে সুৰা আৰু জুৱাৰ আড্ডাৰ বিৰুদ্ধে আইন অনুসৰি কঠোৰ পদক্ষেপ গ্ৰহণ কৰা হ’ব বুলিও তেওঁলোকে জানিবলৈ দিয়ে। ইয়াৰ উপৰি প্ৰত্যেক পূজা পেণ্ডেলতে কাৰ্যবাহী দণ্ডাধীশ, আৰক্ষী, অগ্নিনিৰ্বাপক বাহিনী, এম্বুলেন্স আদি অত্যাৱশ্যকীয় ফোন নম্বৰ বেনাৰযোগে প্ৰদৰ্শন কৰিবলৈ সমিতিসমূহক আহ্বান জনায়। আনহাতে প্ৰতিমা বিসৰ্জ্জনৰ নীতি-নিয়ম তথা অন্যান্য বিষয়সমূহৰ সবিশেষ আলোচনাৰ বাবে স্থানীয় পূজা সমিতিসমূহ, আৰক্ষী, স্বাস্থ্য বিভাগ আদিৰ সৈতে অহা ২০ ছেপ্টেম্বৰৰ ভিতৰত বৈঠকত মিলিত হ’বলৈ সংশ্লিষ্ট ৰাজহ চক্ৰ বিষয়াসকলক দায়িত্ব অৰ্পণ কৰা হয়।

জিলাখনত শৃংখলাবদ্ধভাৱে তথা সম্পূৰ্ণ শান্তিপূৰ্ণভাৱে শাৰদীয় দুৰ্গোৎসৱ আয়োজনৰ ক্ষেত্ৰত জিলা প্ৰশাসনে পূজা সমিতিসমূহৰ লগতে সকলো স্তৰৰ ৰাইজৰ সহায়-সহযোগিতা কামনা কৰিছে।