থলুৱা নাৰিকলৰ বিপৰীতে অসমত শেহতীয়াকৈ বৃদ্ধি পাইছে আমদানিকৃত নাৰিকলৰ চাহিদা। এনে সময়তে নাৰিকলৰ ওপৰত গৱেষণা কৰি ভাৰত চৰকাৰৰ কৃষি আৰু কৃষক কল্যাণ মন্ত্ৰালয়ৰ অধীনৰ নাৰিকল বিকাশ বোৰ্ডৰ দ্বাৰা ৰাষ্ট্ৰীয় সন্মানেৰে সন্মানিত হৈছে হাজো পানীপাৰাৰ পংকজ দাস। কেৰেলাত অনুষ্ঠিত বিশ্ব নাৰিকল দিৱসৰ অনুষ্ঠানত এই সন্মান লাভ কৰে হাজোৰ যুৱ খেতিয়ক গৰাকীয়ে। ইয়াৰ পূৰ্বেও ৰাষ্ট্ৰীয় বঁটাৰে সন্মানিত হৈছে পংকজ দাস। বিগত ৩০ বছৰে নাৰিকলৰ খেতি কৰি স্বাৱলম্বী হোৱাৰ লগতে পংকজ দাসে গৱেষণা চলাই গৈছে নাৰিকলৰ ওপৰত। প্ৰায় ৪ বছৰ সময় চোৱা-চিতা কৰাৰ পাছত ৫০বছৰ ধৰি ইয়াৰ ফল পোৱাৰ লগতে ১বিঘা মাটিত নাৰিকলৰ খেতিৰে বছৰি ২ৰ পৰা ৩লাখ টকা উপাৰ্জন কৰি নিৱনুৱা যুৱক-যুৱতীসকল স্বাৱলম্বী হ’ব পাৰিব বুলি মন্তব্য কৰে যুৱ খেতিয়ক গৰাকীয়ে।

উল্লেখ্য যে প্ৰয়াত পিতৃ ঋষভ দাসৰ পদাংক অনুসৰণ কৰি শিক্ষিত যুৱক পংকজ দাসে নাৰিকল খেতিৰ ওপৰত মনোনিৱেশ কৰে। গুৱাহাটীৰ কাঁহিকুছিৰ উদ্যান শস্য গৱেষণা কেন্দ্ৰৰ বিশেষজ্ঞসকলৰ সৈতে বিভিন্ন সময়ত নাৰিকলৰ উৎপাদন বৃদ্ধি কৰাৰ ক্ষেত্ৰত দিহা পৰামৰ্শ লোৱা বুলি জানিবলৈ দিয়ে ৰাষ্ট্ৰীয় বঁটাৰে সন্মানিত পংকজ দাসে। অসমত থলুৱাভাৱে নাৰিকলৰ উৎপাদন কম হোৱাৰ বাবেই প্ৰতিটো নাৰিকল দাম ৫০ৰপৰা ১০০টকা পৰ্যন্ত হোৱাৰ বিপৰীতে অসম তথা ভাৰতৰ বাহিৰৰ পৰা আমদানিকৃত নাৰিকল ১০ ৰ পৰা ২০টকাত বজাৰত উপলব্ধ হৈছে। ৰাজ্যৰ নিবনুৱা যুৱক-যুৱতীসকলক নাৰিকলৰ খেতি কৰি স্বাৱলম্বী হ’বলৈ আহ্বান জনাই ৰাষ্ট্ৰীয় বঁটা প্ৰাপক, গৱেষক পংকজ দাসে।

শিৱসাগৰৰ দৌলমুখ চাৰি আলিত দিখৌপৰীয়া সন্মিলিত যুৱ সংঘৰ উদ্যোগত তথা শিৱসাগৰ প্ৰেছ ক্লাৱৰ সহযোগত ড° ভূপেন হাজৰিকাৰ প্ৰতিমূৰ্ত্তি স্থলিত বৰণ্য শিল্পী গৰাকীৰ জন্মদিৱস উদযাপন কৰা হয়।এই উপলক্ষে পুৱাই ড° ভূপেন হাজৰিকাৰ প্ৰতিমূৰ্ত্তিত মাল্যপৰ্ণ তথা বন্তি প্ৰজ্বলন কৰে গঁড়গাঁও মহাবিদ্যালয়ৰ অধ্যক্ষ ড° সব্যসাচী মহন্ত, জেষ্ঠ্য সাংবাদিক মনিৰুল ইছলাম বড়া, জাতীয় সংগ্ৰামী সেনাৰ সভাপতি চিটু বৰুৱাকে ধৰি বহুসংখ্যক অনুৰাগীয়ে।

অনুষ্ঠানত বক্তৃতা প্ৰদান কৰি ড° ভূপেন হাজৰিকা এগৰাকী প্ৰকৃত গণ শিল্পী, সমাজৰ পথ প্ৰদৰ্শক আছিল বুলি মন্তব্য কৰে ড° সব্যসাচী মহন্তই ।উল্লেখযোগ্য যে দিখৌপৰীয়া সন্মিলিত যুৱ সংঘই ১৯৯০ চনৰ পৰাই বছৰি উদযাপন কৰি আহিছে ড° ভূপেন হাজৰিকাৰ জন্ম দিন ।সন্ধ্যা বৰ্ণাঢ্য কাৰ্য্যসুচীৰে শিৱসাগৰ যুৱদ’লত অনুষ্ঠিত হব কথা গীতৰ ছন্দ নামেৰে এক সাংস্কৃতিক অনুষ্ঠান | যি অনুষ্ঠানত গীত পৰিবেশন কৰিব সংগীতা কাকতি , আশা শৰ্মা কাকতি , বিপুল কাথাৰ , কমল কাটকী , লগতে অডিঅ চিটি সাংস্কৃতিক গোষ্ঠীয়ে।

আজি অসম প্ৰশাসনিক পদাধিকাৰী মহাবিদ্যালয়ত বাৰানসী কনক্লেভৰ খতিয়ানৰ অংশ হিচাপে অসমত ৰাষ্ট্ৰীয় শিক্ষা নীতি ২০২০ ৰূপায়ণ সম্পৰ্কে এখন সন্মিলন আয়োজন কৰা হয়। এএ সন্মিলনত অংশগ্ৰহণ কৰে মুখ্যমন্ত্ৰী হিমন্ত বিশ্ব শৰ্মাই।শিক্ষাৰ গুণগত আৰু গাঁথনিগত বিকাশৰ বাবে ৰাষ্ট্ৰীয় শিক্ষা নীতি ২০২০ ৰূপায়ণ কৰিবলৈ অসম চৰকাৰ প্ৰতিশ্ৰুতিবদ্ধ। স্বাস্থ্য আৰু শিক্ষাৰ বাবে ৬% এছ জি ডি পি নিৰ্ধাৰণেৰে স্বাস্থ্য আৰু শৈক্ষিক দিশত উন্নয়নৰ ক্ষেত্ৰত আমাৰ চৰকাৰৰ প্ৰতিশ্ৰুতিৰ কথাকে সূচায়।

ৰাষ্ট্ৰীয় শিক্ষা নীতি ২০২০ৰ প্ৰতি লক্ষ্য ৰাখি প্ৰতিখন বিশ্ববিদ্যালয়ে নীতিৰ উপাদানসমূহ গ্ৰহণ কৰি ছাত্ৰ-ছাত্ৰীসকলৰ বাবে সেইসমূহ কাৰ্যকৰী কৰাত গুৰুত্ব প্ৰদান কৰিব লাগে। প্ৰতিখন বিশ্ববিদ্যালয়ে শিক্ষা নীতিৰ সফল ৰূপায়ণৰ ক্ষেত্ৰত বিশ্ববিদ্যালয়ৰ বিভিন্ন বিষয় সমাধানৰ বাবে এখন মূল সমিতি গঠন কৰাটো প্ৰয়োজন। এই সন্মিলন আয়োজন কৰা বাবে ৰাজ্যপাল সচিবালয়ক ধন্যবাদ জনাই মুখ্যমন্ত্ৰীয়ে।অনুষ্ঠানত ৰাজ্যপাল অধ্যাপক জগদীশ মুখী, সতীৰ্থ মন্ত্ৰী ডাঃ ৰণোজ পেগু, অসম চৰকাৰৰ উচ্চ শিক্ষাৰ জ্যেষ্ঠ বিষয়াসকলৰ লগতে বিভিন্ন বিশ্ববিদ্যালয়ৰ মাননীয় উপাচাৰ্যসকল উপস্থিত থাকে।