ছিপাঝাৰ ৰাজহ চক্ৰ অন্তৰ্ত খলিহৈ পথাৰৰ কিৰিংবৰি গাঁৱলৈ ননৈ নদীৰ ওফন্দি অহা বাঢ়নী পানীয়ে ভাবুকি কঢ়িয়াই আনিছে।
ননৈ নৈয়ে বৃহত্তৰ খলিহৈ, কিৰিংবৰীলৈ ভাবুকি কঢ়িয়াই অনাৰ সমান্তৰালভাবে গৰাখহনীয়াই ভয়াবহ ৰূপ ধাৰণ কৰিছে।
খহনীয়া ৰোধৰ বাবে তাৎক্ষণিক ব্যৱস্থা গ্ৰহণ নকৰিলে কৃষিভূমি খিনিও চিৰ দিনলৈ হেৰুৱাব অঞ্চলটোৰ কৃষক ৰাইজে।
আজি কেইবাদিনো ধৰি হৈ থকা নেৰানেপেৰা বৰষুণৰ ফলত তামুলপুৰৰ বাল্টি, মটঙা, পাগলাদিয়া,বৰলীয়া আদি উপ নৈ সমূহ ফেনেফোটোকাৰে বাঢ়ি অহাই নহয় নৈৰ বাঢ়নি পানীয়ে কেবাখনো ঠাই জলমগ্ন কৰি ৰাখিছে। ভুটানৰ পৰা বৈ অহা খৰস্ৰোতা উপ নৈ কেইখনৰ জলপৃষ্ঠ বৃদ্ধি পোৱাৰ সমান্তৰাল ভাবে নেৰানেপেৰা বৰষুণে কৃত্ৰিম বানৰ সৃষ্টি কৰাৰ ফলত ভাৰত-ভূটান সীমান্তৰ গুৱাবাৰী, কাউলী আদি অঞ্চলৰ গাও সমূহৰ বাদেও খোদ তামুলপুৰ জিলা সদৰৰ ডিমিলাপাৰ,ভকতপাৰা,বৰখোপা আদি গাঁৱৰ আলি পদূলি জলমগ্ন হৈ পৰিছে ।
কৃত্ৰিম বানত বুৰ গৈছে কাউলী চন্দনপুৰ এছ এছবিৰ শিবিৰো। বহু ঠাইত ভাঙি গৈছে নিৰ্মীয়মান গ্ৰাম্য পথ।মটঙা আৰু বাল্টি নৈৰ বাঢ়নী পানীৰ ফলত বন্ধ হৈ পৰিছে কাউলীকে আদি বহু অঞ্চলৰ যাতায়ত ব্যৱস্থা। নৈ দুখনৰ ওপৰত কোনো দলং নথকাত পাৰ হব পৰা নাই কোনো লোকে। ইফালে নেৰানেপেৰা বৰষুণৰ ফলত বৰলীয়া নৈৰ বাঢ়নি পানীয়ে বৰবালিশিহাত বৰলীয়া নৈৰ ওপৰত থকা বৰবালিশিহা লতিবাৰী সংযোগী একমাত্ৰ বাঁহৰ দলংখন বাঢনী পানীয়ে উটুৱাই লৈ যোৱাত বৃহত্তৰ অঞ্চলটোৰ যোগাযোগ বিচ্ছিন্ন হৈ পৰাৰ খবৰ আহিছে। বৰলীয়া নৈৰ ওপৰত ঝাৰকোণা গান্ধীবাৰী পথত থকা এখন লোহাৰ দলং বাঢ়নি পানীয়ে মাজডোখৰ ভাঙি উটুৱাই লৈ যায়। বৰলীয়া নৈৰ বাঢ়নি পানীয়ে বৰলেণ্ড চ’ক জলমগ্ন কৰাৰ শেহতীয়া বাতৰি আহিছে।
আজি পুৱা ৬ বাজি ৩০ মিনিটত চেঙেলীআটি অঞ্চলৰ শিক্ষাবিদ, অসম আন্দোলনৰ সংগ্ৰামী আৰু অসম গণ পৰিষদ দলৰ জন্মলগ্নৰ পৰাই দলৰ হৈ নি:স্বাৰ্থ ভাৱে সেৱা আগবঢ়াই অহা বিভিন্ন সামাজিক কৰ্মত জড়িত ধৰ্মপ্ৰাণ ব্যক্তি দেউৰাম শইকীয়াৰ এশ তিনি বছৰ বয়সত বাৰ্ধক্যজনিত কাৰণত পৰলোক প্ৰাপ্তি ঘটে । অগপ দলৰ ৩৯ নং পঞ্চায়ত পৰিষদৰ সক্ৰিয় সদস্য অভিজিত শইকীয়াৰ পিতৃ দেউৰাম শইকীয়া।
দেৰগাঁও সমষ্টিৰ বিধায়ক ভবেন্দ্ৰ নাথ ভৰালীয়ে এক শোক বাৰ্তাত কয় যে “আমাৰ অভিভাৱক স্বৰূপ দেউৰাম শইকীয়া ছাৰৰ মৃত্যু এক অপূৰণীয় ক্ষতি”। বিধায়ক ভবেন্দ্ৰ নাথ ভৰালীয়ে শোক সন্তপ্ত পৰিয়ালবৰ্গলৈ সমবেদনা জ্ঞাপন কৰাৰ লগতে দেউৰাম শইকীয়াৰ বিদেহ আত্মাৰ সদগতি কামনা কৰিছে।
ৰহা ৰাজহ চক্ৰৰ অন্তৰ্গত জৰাবাৰী মৌজাৰ বিস্তৃৰ্ণ অঞ্চল কপিলী আৰু বৰপানী নদীৰ বানৰ কৱলত পৰিছে। কপিলী আৰু বৰপানী নদীৰ বানৰ ফলত খতিপথাৰ বুৰাই পেলাইছে আৰু অঞ্চলটোৰ হাজাৰ হাজাৰ বিঘা বৰো ধানৰ খেতি পানীত ডুব গৈছে। কষ্টৰ ফচল চপাবলৈ নাপাওঁতে অহা বানে খেতিয়কৰ সপোন তচনচ কৰি পেলালে। অঞ্চলটো কেউদিশে কেৱল পানী আৰু পানী হৈ পৰাত মৌজাটোৰ কমাৰগাওঁ , আমতলা , প্ৰমিলা আৰু মাগুৰগাওঁ পঞ্চায়তৰ চেঙাজান, জ্বৰডোবা , খাফৰিজাৰণি , চিউগুৰি ,শালমৰা , পুথিমাৰি ১, পুথিমাৰি ২, ১ আৰু ২ নং মিছামাৰী , কৃষ্ণ নগৰ , বৰুনগুৰি , হাতীগড় , গৰুবন্ধা , মৰিসুঁতি , ত্ৰিপুৰাবস্তি আদিৰ শ শ হেক্টৰ বৰোধানৰ খেতি বৰপানী নদীৰ বাঢ়নী পানীৰ তল গৈছে ।
নিশাটোৰ ভিতৰতে পকাধান পানীৰ তল যোৱাত কৃষকৰ হাহাকাৰ লাগিছে ।সেইদৰে মীনপালকসকলৰো বিস্তৰ ক্ষতিসাধন হৈছে। পুখুৰীসমূহো এতিয়া পানীৰ তলত। স্থানীয় লোকসকলে ওখ ভেটিত থকা ঘৰত আশ্ৰয় লোৱা দেখিবলৈ পোৱা গৈছে।
আজিও অপৰিৱৰ্তীত হোজাই জিলাৰ বান পৰিস্থিতি।বিগত দুটা দিন মুষলধাৰ বৰষুণৰ ফলত কপিলী আৰু যমুনানৈয়ে ফেনে ফোটোকাৰে বাঢ়িছে ।ফলত বানৰ কবলত পৰিছে হোজাই জিলাৰ যমুনামুখ সমষ্টিৰ বহুকেইখন গাঁও।হোজাই আৰু পশ্চিম কাৰ্বি আংলংৰ মাজত যোগাযোগ বিচ্ছিন্ন পৰিছে।বানৰ কবলত জলবন্দীহৈ পৰিছে বহু পৰিয়াল। যমুনামুখ সমষ্টিৰ চাংজুৰাই-পটিয়াপাম গাঁৱৰ কপিলী নৈৰ এটা মথাউৰি বানে চিঙি নিয়ে।সেই চিঙা মথাউৰিৰে হুৰাহুৰে পানী সোমাইছে।চাংজুৰাই, পটীয়াপাম, কহাৰগাওঁ, কাটকটীয়া ভকতগাঁৱৰ লগতে জংঘল ব্লক ৰোডৰ মথাউৰি চিগি চাৰ্লক,জংগল ব্লক,আদি কৰি কেইবাখনোগাওঁ বানৰ কৱলত পৰিছে।
হাজাৰ হাজাৰ বিঘা বড়ো ধানৰ খেতিৰ লগতে মৰাপাটখেতিও বানত বুৰ যায়।পাব্লিত হৈছে ন ন অঞ্চল।কালামণিজান মথাউৰিৰ ওপৰেৰে পানী বাগৰিছে ।যমুনাচিত মথাউৰিৰো ফাট মেলিছে ।যিকোনো সময়তে যমুনাচিত মঠাউৰি চিগাৰ আশংকাই দেখা দিছে। লংকাৰ কাৰিখানা মঠাউৰিও চিঙাৰ আংশকাই দেখা দিছে ।আজি বিয়লি হোজাই জিলাৰ উপায়ুক্ত অনুপম চৌধুৰী,আৰক্ষী অধীক্ষক বৰুন পুৰকায়স্থ ,আৰু যমুনামুখৰ বিধায়ক চিৰাজ উদ্দিন আজমলৰ ৰাজনৈতিক সচিব আকবৰ আলীয়ে যমুনামুখ সমষ্টিৰ বান পৰিস্থিতিৰ বুজ লয়।হোজাই জিলাৰ উপায়ুক্তই জনোৱামতে ৮ টা আশ্ৰয় শিবিৰৰ ব্যৱস্থা কৰা হৈছে।তদুপৰি বহুলোকে ওখ স্থানত আশ্ৰয় লৈছে।পৰিস্থিতিৰ পৰিবৰ্তন নহলে হোজাই জিলাত বানে ভয়াবহ পৰিস্থিতি সৃষ্টি কৰাৰ আশংকাই দেখা দিছে।হোজাই জিলা প্ৰশাসন সষ্টম হৈ পৰিছে৷
নগাঁও জিলাৰ হাতীচোং মৌজাৰ চকলাঘাটত দুদিনীয়াকৈ চকলাঘাট কাৰাটে একাডেমীৰ সৌজন্যত অনুষ্ঠিত ষষ্ঠ সদৌ অসম কুনিবা কাই কাৰাটেৰ ৰাজ্যিক ভিত্তিক উচ্চ পৰ্যায়ৰ প্ৰশিক্ষণ শিবিৰৰ আজি সফলতাৰে সমাপ্তি ঘটিছে।চকলাঘাট ৰাস মন্দিৰৰ প্ৰেক্ষাগৃহত অনুষ্ঠিত এই প্ৰশিক্ষণ শিবিৰটোত শিক্ষাৰ্থীসকলক প্ৰশিক্ষণ প্ৰদান কৰে জাপান কাৰাটে ড’ কুনিবা কাই ইণ্ডিয়া হনব’ৰ মুখ্য প্ৰশিক্ষক কিউচি নাৱাল দত্তই। ৰাজ্যখনৰ বিভিন্ন প্ৰান্তৰ ডেৰ শতাধিক কাৰাটেকাই ভাগ লোৱা শিবিৰটোত কাৰাটেড’ৰ কুমিটে আৰু কাটাৰ বিভিন্ন কৌশলৰ প্ৰশিক্ষণ দিয়া হয়। বিশিষ্ট ক্ৰীড়া সংগঠক সমীৰ হাজৰিকাই কালি আনুষ্ঠানিকভাৱে শুভাৰম্ভ কৰা শিবিৰটোত মুখ্য প্ৰশিক্ষক নৱাল দত্তৰ লগতে চিহান বিপুল দাস,চেনচেই বিপুল ভড়ালী,চেনচেই পংকজ কুমাৰ মুদৈ,বসন্ত নাথ,জগত কলিতা,গোপাল শীল আৰু নিত্য কুমাৰ পাটৰে প্ৰশিক্ষণত সহযোগিতা আগবঢ়াই।
প্ৰশিক্ষণৰ শেষত চকলাঘাট কাৰাটে একাডেমীৰ সভাপতি বিপ্লৱজ্যোতি ডেকা আৰু সম্পাদক তথা চেনচেই পংকজ কুমাৰ মুদৈৰ সামগ্ৰিক পৰিচালনাত কবি সঞ্জীৱ সাগৰ চৌধুৰীয়ে আঁত ধৰা সামৰণি অনুষ্ঠানত কিউচি নৱাল দত্ত,ক্ৰীড়া সংগঠক সমীৰ হাজৰিকা,সাংবাদিক জয়ন্ত মুদৈ আৰু কল্যান কুমাৰ বৰাই ভাষণ প্ৰদানৰ লগতে সমাজকৰ্মী দিপেন বৰা,ৰিণ্টু শৰ্মা,ভাৰত ভূঞা,ৰিঞ্জুমনি বনিয়া,জোন হাজৰিকা আদি উপস্থিত থাকে । শিবিৰটোতে অনুষ্ঠিত গ্ৰেডিং পৰীক্ষাত পঞ্চম ডান ব্লেকবেল্টধাৰী চেনচেই পংকজ কুমাৰ মুদৈক চিহান উপাধি প্ৰদান কৰা হয়। ইয়াৰোপৰি সেই অনুষ্ঠানত প্ৰশিক্ষাৰ্থীসকলক জাপান কাৰাটে ড’ কুনিবা কাই ইণ্ডিয়া হনব’,অসমৰ তৰফৰ পৰা বিভিন্ন শাখাৰ বেল্ট তথা প্ৰশংসাপত্ৰ বিতৰণ কৰা হয়।
তেওঁৰ খোলা হাঁহিটোৱে আজিও কাশ্মীৰৰ কন্যাকুমাৰালৈকে পীড়িত কৰে। তেওঁ আজিও অনুৰাগীৰ হৃদয়ত মন জয় কৰিবলৈ সক্ষম হৈছে। তেওঁ হ`ল বলীউড অভিনেত্ৰী মাধুৰী দীক্ষিত। বলীউডত তেওঁ ইখনৰ পাছত সিখন ছবি দৰ্শকক উপহাৰ দি গৈছে। কিন্তু মাধুৰী দীক্ষিত কেতিয়াও এগৰাকী অভিনেত্ৰী হ`ব বিচৰা নাছিল। তেন্তে মাধুৰী দীক্ষিতে কি হ’ব বিচাৰিছিল? মাৰাঠী পৰিয়ালৰ যুৱতীগৰাকীয়ে ১৭ বছৰ বয়সত বলীউডত আত্মপ্ৰকাশ কৰিছিল। তাপস পালৰ বিপৰীতে ‘অবোধ’ বোলছবিখনৰে তেওঁ বলীউডত যাত্ৰা আৰম্ভ কৰিছিল। তাৰ পিছত আহে “ষাঁড়”! ‘এক দো থ্ৰী গাৰ্লছ’ৰ বাবে তেওঁ পিছলৈ ঘূৰি চাব লগা হোৱা নাছিল। ‘ৰাম লাখন’, ‘সাজন’, ‘খলনায়ক’, হাম আপকে হে কৌন’, ‘দিল তো পাগল হে’, ‘দিল তো পাগল হে’- বলীউডৰ বহুতো ছবিয়ে মাধুৰীৰ স্পৰ্শত স্বৰ্ণ অৰ্জন কৰিছে।
তাৰ পিছত,নায়িকাগৰাকী হঠাতে যেন হেৰাই গ’ল।
বিদেশীৰ এজন চিকিৎসক শ্ৰীৰাম নেনেৰ সৈতে বিবাহ পাশত আৱদ্ধ হল। অভিনেত্ৰীগৰাকীয়ে তেওঁৰ দুই পুত্ৰ ডাঙৰ হোৱাৰ পিছত আকৌ বলীউডলৈ উভতি আহিছে। মাধুৰীৰ সপোন সম্পূৰ্ণ বেলেগ আছিল। তেওঁ কেতিয়াও অভিনয়ত সোমাব বিচৰা নাছিলো। মাধুৰীয়ে মাইক্ৰ’বায়োলজী আৰু পেথলজীৰ পৃথিৱীত কেৰিয়াৰ গঢ়িব বিচাৰিছিল। ই কেৱল এটা শখ নহয়, মাধুৰীৰ ইয়াৰ ওপৰত শিক্ষা ও আছে। মাধুৰীৰ মাইক্ৰ’বায়োলজীত ডিগ্ৰী আছে। এক সাক্ষাৎকাৰত, নায়িকাগৰাকীয়ে নিজেই এই কথা কৈছিল। তেওঁ কৈছিল, “খুব কম বয়সতে হঠাতে অভিনয় কৰাৰ সুযোগ আহিল। কিন্তু প্ৰথম খন চলচ্চিত্ৰৰ বিফলতাৰ বাবে মই অলপ হতবাক হৈছিলো। মই ভাবিছিলো মোৰ সিদ্ধান্তটো সঠিক নাছিল নেকি? তাৰ পিছত, মাতৃয়ে বুজায় যে মই যিয়েই নকৰোঁ, কঠোৰ পৰিশ্ৰম কৰা আৰু অধ্যৱসায় কৰাটো অতি গুৰুত্বপূৰ্ণ। সেইটোৱেই মই সদায় মনত ৰাখিছো। ” অভিনেত্ৰীগৰাকীয়ে বৰ্তমান অ’টিটিত তেওঁৰ পৰৱৰ্তী কাম কৰি আছে। তাইক আনন্দ তিৱাৰীৰ দ্বাৰা পৰিচালিত ‘ফান মা’ত দেখা যাব।
ভাগৰুৱা! সকলো মানুহৰে এটা ৰোগ বুলিয়ে ক’ব পাৰি । এই ভাগৰ বা দুৰ্বল ভাৱ মানুহৰ তেতিয়া হয় যেতিয়া দেহত নিউট্ৰিএন্স কমে, সঠিক খাদ্য নোখোৱাৰ ফলতো এই দুৰ্বল অনুভৱ হয়। আনহাতে ভাগৰুৱা বা দুৰ্বল অনুভৱ হোৱাৰ আৰু বহু কাৰণ আছে। তাৰ ভিতৰত শৰীৰে সঠিক খাদ্য গ্ৰহণ নকৰা, ব্যায়াম নকৰা, অনবৰতে শুই থকা বা বহি থকা অভ্যাসেও ভাগৰ আৰু এলাহ ভাৱ আনে । এনেক্ষেত্ৰত পাচন ক্ৰিয়া নিম্নগামী হয়, ফলত ভাগৰ আৰু দুৰ্বল অনুভৱ বাঢ়ি যায়। ভালদৰে ৰাতি টোপনি পূৰ নহ’লেও ভাগৰ আৰু দুৰ্বল লাগি থাকে আৰু যাৰবাবে গোটেই দিনটো হামিয়াই থকা দেখা যায়। ভাগৰ লগা বা দুৰ্বল লগাৰ মূল কাৰণ হৈছে খাদ্য। কিয়নো আমি খাদ্যতে সকলো ভিটামিন পাঁও।
শৰীৰৰ এই ভাগৰুৱা বা দুৰ্বল ৰোগ দুৰ কৰিবলৈ কি কি খাদ্য খাব আপুনি?
১) এইৰোগৰ বাবে বাদাম উপকাৰী খাদ্য। বজাৰত উপলব্ধ সকলো ধৰণৰ বাদাম খাব পাৰে। প্ৰত্যেক দিনে এনে ধৰণৰ ইঞ্চটেন্ট এনার্জি দিয়া খাদ্য খালে আমাৰ ভাগৰুৱা অনুভৱ নহয়। সহজতে পোৱা ৰঙালাওৰ গুটি, ভিন্ন বতৰত পোৱা ৰাজমাহ, ফ্ৰেন্সবিণ, তিল ,সূৰ্যমূখী ফুলৰ গুটি খাব লাগে।
২) কণী বহুতে বহুত বেমাৰৰ বাবে নাখায় যদিও ইয়াত বহু পৰিমাণৰ ভিটামিন থাকে আৰু প্ৰত্যেক দিনে এটা সিজোৱা কণী আপুনি খাব পাৰে।
৩) দৈ যিহেতু গাখীৰৰ দ্বাৰা প্ৰস্তুত কৰে সেয়ে দৈ ত যথেষ্ট শক্তি থাকে, ভাগৰ বা দুৰ্বল লাগিলে দৈ খাব পাৰে।
৪)এটা কল যদি খোৱা হয় তেনেহ’লে সেই কলে আধা ঘন্টাৰ ভিতৰত শক্তি দিয়ে আৰু ভাগৰ ভাৱ আঁতৰায়।
ভাৰতীয় চলচ্চিত্ৰ জগতত খলকনিৰ সৃষ্টি কৰা কেজিএফ চেপ্তাৰ-২এ ১ মাহ পূৰ্বে মুক্তি লাভ কৰিছিল। ছবিখনে ইতিমধ্যে বক্স অফিচত সফল ছবিৰূপে পৰিগণিত হৈছে। আৰু এই ছবিখনৰ বাবে দক্ষিণৰ ছুপাৰষ্টাৰ য়শ দেশৰ আইকন হৈ পৰিছিল। মধ্যবিত্ত পৰিয়ালৰ পুত্ৰ য়শে সংগ্ৰাম কৰি সফলতা অৰ্জন কৰিছে। য়শৰ দেউতাক পেছাত এজন বাছ চালক আছিল। তাৰ মাজতে এতিয়া আন এক ৰহস্য পোহৰলৈ আহিছে! যশৰ দেউতাক অৰুণ কুমাৰে তেওঁৰ পুত্ৰ ছুপাৰষ্টাৰ হোৱা পিছতো বাছ চলাবলৈ এৰি দিয়া নাছিল। অৰুণ কুমাৰ এতিয়াও কেৰেলা ৰাজ্যিক পৰিবহণ বিভাগৰ এজন বাছ চালক।
এই কথাটো শেহতীয়াকৈ পৰিচালক এছ এছ ৰাজামৌলীয়ে ৰাজহুৱা কৰিছে। এক অনুষ্ঠানত RRRৰ পৰিচালকজনে কয়, য়শৰ দেউতাক এজন বাছ চালক। তেওঁ এতিয়ালৈকে চাকৰি এৰা নাই। মোৰ মতে, তেওঁহে হৈছে এজন প্ৰকৃত তাৰকা। য়শতকৈ তেওঁৰ অধিক কৃতিত্ব আছে। পুত্ৰ ছুপাৰষ্টাৰ হোৱাৰ পিছতো তেওঁ নিজৰ পৰিচয় পাহৰি নোযোৱাটোৱেই বহুতক অনুপ্ৰাণিত কৰিছে। নবীন কুমাৰ গৌড়া ওৰফে য়শৰ জন্ম ১৯৮৬ চনৰ ৮ জানুৱাৰীত মহীশূৰত হৈছিল। য়শে সৰুৰে পৰা নায়ক হোৱাৰ সপোন দেখি আছিল। যাৰ বাবে তেওঁ স্কুল আৰু কলেজতো অভিনয় কৰিছিল। উল্লেখযোগ্য যে, য়শে ছবিজগতলৈ অহাৰ সুযোগ লাভ কৰাৰ সময়ত মাত্ৰ ৩০০ টকা লৈ ঘৰ এৰিছিল।
দেখাত সাইলাখ আলিয়া ভাট! প্ৰায় একেই ৰূপ, একেই সৌন্দৰ্য। শেহতীয়াকৈ ইণ্টাৰনেটত আকৰ্ষণৰ কেন্দ্ৰবিন্দু হৈ পৰিছে এই যুৱতী গৰাকী। আলিয়া ভাটৰ দৰে দেখাত সাইলাখ এই যুৱতী গৰাকী অসমৰ চেলেষ্টী বৈৰাগী বুলি জানিবলৈ পৰা গৈছে। ইতিমধ্যে, বলিউডৰ অভিনেত্ৰী আলিয়া ভাটৰ দৰে দেখাত একে হোৱাৰ বাবে ছ’চিয়েল মেডিয়াত ভাইৰেল হৈ পৰিছে চেলেষ্টী বৈৰাগী।
চেলেষ্টী বৈৰাগীক বহুতে এতিয়া দ্বিতীয় আলিয়া ভাট বুলি অভিহিত কৰিছে। কেৱল ইনষ্টাগ্ৰামতে নহয়, চেলেষ্টী বৈৰাগীক ইউটিউবত Vlog আৰু চুটি ছবি কৰাও দেখা যায়। আৰু আলিয়া ভাটৰ সৈতে সাদৃশ্য থকা এই যুৱতী গৰাকীৰ ইনষ্টাগ্ৰামত ৩ লাখৰো অধিক অনুৰাগী আছে। উল্লেখ্য যে, চেলেষ্টী বৈৰাগীয়ে গঙ্গুবাই কাঠিয়াৱাড়ীৰ ফিল্মী গেট আপত অভিনয় কৰি ইনষ্টাগ্ৰামত ৰিল পোষ্ট কৰাৰ পিছতে সকলোৰে দৃষ্টি আকৰ্ষণ কৰিবলৈ সক্ষম হয়।
