ধুবুৰী পৌৰসভাৰ অধীনস্থ নদী ঘাটবোৰত নিয়ম বহিৰ্ভূত ভাৱে দুষ্ট চক্ৰই মাছুল সংগ্ৰহ কৰি আছে। আজি চহৰখনৰ ১নং ৱাৰ্ডৰ কাষেৰে বৈ যোৱা ব্ৰহ্মপুত্ৰৰ এটা নদীঘাটৰ সমীপত দুচকীয়া বাহন এখনক পাৰ্কিং কৰাক লৈ দুগৰাকীকৈ স্থানীয় সাংবাদিকক পৌৰসভাৰ মাছুল সংগ্ৰহ কৰাৰ দায়িত্বত থকা বুলি দাৱী কৰা দুগৰাকী ব্যক্তিয়ে দূৰ্বব্যৱহাৰ কৰাৰ এক ঘটনাক লৈ সাংবাদিকৰ দল এটাই চলোৱা অনুসন্ধানৰ পিছত উত্থাপিত হৈছে এই প্ৰশ্নৰ। তেওঁলোকৰ প্ৰশ্নত ধুবুৰী পৌৰসভাই দুয়োকে অঞ্চলটোৰ ‘লোকাল বোৰ্ড ঘাট’ত মাছুল সংগ্ৰহৰ অনুমতি দিয়া বুলি দাৱী কৰে যুৱক দুজনে। ইপিনে উপস্থিত সাংবাদিকৰ সন্মুখত অঞ্চলটোৰ নদীঘাটটোৰে নাওেঁৰে বিভিন্ন চৰাঞ্চললৈ যোৱা বয়বস্ত লৈ অহা ঠেলা চালকসকলে তেওঁলোকে দিয়া মাছুলৰ বিনিময়ত দুয়ো কোনো ধৰণৰৰ ৰছিদ নিদিয়া বুলিয়েই উল্লেখ কৰে। সেই বিষয়টো লৈ কৰা সাংবাদিকৰ প্ৰশ্নত পৌৰসভাৰ মাছুল সংগ্ৰহৰ দায়িত্বত থকা বুলি দাৱী কৰা সেই দুজন যুৱকে কোনো সদুত্তৰ দিবলৈ সক্ষম নোহোৱাৰ বিপৰীতে ধুবুৰী পৌৰসভাৰ মোহৰ অথৱা স্বাক্ষৰ নথকা এখন ৰছিদ দেখুৱাই সেয়া দিয়া হয় বুলি দাৱী কৰে দুয়োয়ে। উল্লেখ্য যে, ধুবুৰী পৌৰসভাৰ অধীনস্থ বিভিন্ন নদীঘাট আৰু বজাৰসমূহৰ দায়িত্ব পোৱা লেছীসকলৰ সময়সীমা ইতিমধ্যে উকলি গৈছে আৰু বিষয়টোলৈ পৌৰসভা কৰ্তৃপক্ষই ইতিমধ্যে নিবিদাও আহ্বান কৰিছে। ফলত পৌৰসভাৰ কৰ্মচাৰীৰ ঠাইত অইনৰ হতুৱাই এইদৰে নদীঘাটটোৰ পৰা মাছুল সংগ্ৰহ কৰি থকা হৈছে নেকি সন্দেহত সাংবাদিকৰ দলটোৱে ধুবুৰী পৌৰসভাৰ কাৰ্যৱাহী বিষয়াগৰাকীৰ সৈতে যোগাযোগ কৰে আৰু তেতিয়াহে উৰহি গছৰ ওৰ ওলায়। বিষয়াগৰাকীয়ে পোনছাটেই সাংবাদিকদ্বয়ক দূৰ্বৱ্যহাৰ কৰা সেই ব্যক্তিদ্বয়ক চিনি নাপায় বুলি কয় আৰু পৌৰসভাৰ ‘‘টেক্স দাৰোগা’’ৰ পৰা প্ৰতিবেদন লোৱাৰ পিছত বিহীত ব্যৱস্থা লোৱা হ’ব বুলিও আশ্বাস দিয়ে।

ইপিনে আজিৰ এই ঘটনাৰ পিছত ‘লোকাল বোৰ্ড ঘাট’ৰ উপৰিও ধুবুৰী পৌৰসভাৰ অধানস্থ অইন নদীঘাট আৰু বজাৰসমূহৰ পৰা কোনো চক্ৰই পৌৰসভাৰ গইনা লৈ নিয়ম বহিভূৰ্ত ভাৱে মাছুল সংগ্ৰহ কৰি আছে নেকি বুলি এক প্ৰশ্ন উত্থাপিত হৈছে আৰু বিষয়টোলৈ জিলা প্ৰশাসনে ভালদৰে তদন্ত কৰাৰ প্ৰয়োজনীয়তা থকা বুলিও মত প্ৰকাশ কৰা পোৱা গৈছে স্থানীয় মহল একাংশই।

আৰক্ষীৰ গুলিয়ে ৰোধিব পৰা নাই ড্ৰাগছ সৰ্বৰাহকাৰীক। মৰিগাঁও আৰক্ষীৰ পুনৰ ড্ৰাগছ জব্দ।মৰিগাঁও চহৰৰ মাজ মজিয়াত জব্দ ১৮ তা ড্ৰাগছ ভৰ্তি কন্টেনাৰ।জাগীৰোডৰ মহিজুৰ ইছলাম নামৰ ব্যক্তি জনে বৰচলাৰ পৰা জাগীৰোডৰ চেনিমাৰীলৈ বুলি কঢ়িয়াই আনোতে ড্ৰাগছসহ হাতেলুতে জব্দ মৰিগাঁও আৰক্ষীৰ।

বৃহস্পতি বাৰৰ নিশা মৰিগাঁও আৰক্ষীয়ে ড্ৰাগছ সৰ্বৰাহকৰিক গুলিয়াইছিল যদিও আৰক্ষীক যেন কেৰেপেই নকৰে ড্ৰাগছ সৰবৰাহীয়ে।

সমাগত বাৰিষাত হ’বলগীয়া সাম্ভাব্য বান পৰিস্থিতিৰ মোকাবিলা কৰাৰ পৰিকল্পনা প্ৰস্তুত কৰিবলৈ আজি ধুবুৰী জিলা উপায়ুক্ত কাৰ্যালয়ৰ সভাকক্ষত উপায়ুক্ত অন্বামুথন এম পিৰ অধ্যক্ষতাত জিলা পৰ্যায়ৰ বান প্ৰস্তুতিৰ এখন বৈঠক অনুষ্ঠিত হয়৷ জিলা পৰিষদৰ মুখ্য কাৰ্যবাহী বিষয়া বিশ্বজিত গোস্বামী, অতিৰিক্ত উপায়ুক্ত মানস শইকীয়া, চক্ৰ বিষয়াসকল আৰু বিভিন্ন বিভাগৰ জিলা পৰ্যায়ৰ মুৰব্বী বিষয়াসকলৰ উপস্থিতিত অনুষ্ঠিত বৈঠকত পূৰ্বৰ অভিজ্ঞতাৰ ভিত্তিত আৰু ৰাজ্যিক দুৰ্যোগ ব্যৱস্থাপনা কৰ্তৃপক্ষৰ নিৰ্দেশৰ আধাৰত গ্ৰহণ কৰিবলগীয় আগতীয়া পদক্ষেপবোৰৰ বিষয়ে আলোচনা কৰা হয়৷ বৈঠকত জিলা উপায়ুক্তই বান সাহাৰ্য, ক্ষতিগ্ৰস্থক এককালিন সাহাৰ্য প্ৰদানত কোনো সমস্যা নহয় বুলি মন্তব্য কৰি বান ক্ষতিগ্ৰস্থ চিনাক্তকৰণৰ ক্ষেত্ৰত সতৰ্ক হ’বলৈ চক্ৰ বিষয়াসকলক নিৰ্দেশ দিয়ে৷ তেওঁ কয় যে প্ৰকৃত ক্ষতিগ্ৰস্থই সাহাৰ্য পাব লাগিব৷ মণ্ডলে বুজাবুজিৰে ভুৱা হিতাধিকাৰী সৃষ্টি কৰাৰ দৰে অভিযোগ এইবাৰ যাতে উত্থাপন নহয় তাৰ বাবে চক্ৰ বিষয়া, ক্ষেত্ৰ বিষয়া সকলোকে সতৰ্ক হ’বলৈ কৈ জিলা উপায়ুক্তই কয় যে ক্ষতিগ্ৰস্থ গৃহৰ ফটো ৰাখিবই লাগিব৷ এশ শতাংশ ক্ষতিগ্ৰস্থ গৃহৰ ক্ষেত্ৰত বানৰ পৰৱৰ্তী সময়ত অনুসন্ধান কৰা হ’ব৷ লোকনিৰ্মাণ বিভাগক কাৰো হেঁচাত পৰি বানত পথ নষ্ট হোৱাৰ প্ৰতিবেদন নিদিবলৈ তেওঁ সতৰ্ক কৰি দিয়ে৷ বানে পথ উটুৱাই নিয়া বা নষ্ট কৰাৰ দৰে ঘটনাৰ খবৰ চক্ৰ বিষয়াক লগে লগে অৱগত কৰিবলৈ আৰু পৰিদৰ্শনৰ অন্তত চক্ৰ বিষয়াই চহী কৰা প্ৰতিবেদনহে জমা দিবলৈ তেওঁ নিৰ্দেশ দিয়ে৷ মীন পালন বিভাগকো ভুৱা ক্ষতিগ্ৰস্থৰ নাম নপঠাবলৈ তেওঁ নিৰ্দেশ দিয়ে৷ অনহাতে চক্ৰ বিষয়াকে ধৰি সকলো বিভাগৰ বিষয়াক উদ্ধাৰ কাৰ্যৰ সময়ত পাৰত ৰৈ চাই থকাৰ পৰিৱৰ্তে পানীৰ মাজত থকা বানাক্ৰান্তৰ কাষত থিয় দিবলৈ পৰামৰ্শ দিয়ে জিলা উপায়ুক্তই৷ বৈঠকত চক্ৰ বিষয়াসকলে ৰাজহ চক্ৰ পৰ্যায়ত কৰা বান প্ৰস্তুতিৰ বিষয়ে সদৰি কৰে৷ ধুবুৰীৰ চক্ৰ বিষয়া অভিজিত গগৈয়ে জনায় যে ১৮ খন গাঁও পঞ্চায়তৰ বাবে ১৭ টা ছেক্টৰ গঠন কৰা হৈছে৷

এটা পৃথক ছেক্টৰ গঠন কৰি ধুবুৰী টাউনৰ বান পৰিস্থিতিৰ বাবে বিশেষভাৱে পৰিকল্পনা কৰা হৈছে৷ বৈঠকত আগতীয়াকৈ প্ৰতিৰোধমূলক ব্যৱস্থা লোৱাৰ বাবে খহনীয়াত আক্ৰান্ত হোৱাৰ সম্ভাৱনা থকা শিক্ষানুষ্ঠান, অংগনবাড়ী কেন্দ্ৰবোৰ চিনাক্ত কৰি দিবলৈ শিক্ষা বিভাগ, সমাজ কল্যাণ বিভাগক কোৱা হয়৷বান সাহাৰ্য শিবিৰ স্থাপন হ’বলগীয়া শিক্ষানুষ্ঠানবোৰৰ পৰিস্কাৰ-পৰিচ্ছন্নতা, খোৱাপানীৰ সুবিধা আদি নিশ্চিত কৰিবলৈ শিক্ষা বিভাগক, পৰ্যাপ্ত ঔষধ মজুত ৰাখিবলৈ আৰু ভ্ৰাম্যমান চিকিৎসা গোট সাজু ৰাখিবলৈ স্বাস্থ্য বিভাগক, ধুবুৰী-পাতামাৰিকে ধৰি খহনীয়া হ’ব পৰা মথাউৰিবোৰ ৰক্ষাৰ বাবে আগতীয়া ব্যৱস্থা ল’বলৈ জলসম্পদ বিভাগক, ব্লিছিং পাইদাৰ, দমকল আদি মজুত ৰাখিবলৈ জনস্বাস্থ্য কাৰিকৰী বিভাগক নিৰ্দেশ দিয়া হয়৷

ব্ৰহ্মপুত্ৰ আৰু লালী নৈ পাৰত কৃষকৰ ফচল পানীৰ তলত। কৃষকৰ একমাত্ৰ জীৱন-জীৱকাৰ সম্বল হিচাপে ব্যৱহাৰ কৰি আহিছে নহৰু খেতিকে। তেনে স্থলত কৃষকৰ সপোন এইবাৰ চূৰমাৰ কৰিলে চ’ততে অহা আবতীয়া বানে। হাত নাও লৈ নহৰু উঘলাৰ চেষ্টা কৃষকৰ। বিষেশকৈ ৰাজ্যত নেৰেনেপেৰা বৰষুণৰ ফলত ধেমাজি জোনাই সমষ্টিৰ চমকং গাঁও পঞ্চায়ৰ লালী নৈ পাৰৰ অপ্সৰা, চিভিল কৈৱৰ্ত, লামা আদি কেইবাখনো গাঁৱত নহৰু, সৰিয়হ,আলু খেতি এআঁঠু-একঁকাল পানীৰ মাজত গেলিবলৈ ধৰিছে ফচলসমূহ। নহৰু খেতিৰ বাবে বিখ্যাত ব্ৰহ্মপুত্ৰ পাৰৰ এই গাঁও অঞ্চলৰ লোকৰ বাবে এইবাৰৰ অকস্মাতে অহা বানে কাল হৈ পৰা বুলি উল্লেখ কৰে ভূক্তভূগী খেতিয়কে। কাৰণ চ’ত মাহতে কেতিয়াও বানপানী হোৱা নাছিল উক্ত গাঁও অঞ্চলত। এইক্ষেত্ৰত অকস্মাতে এই বান ক’ৰ পৰা আহিল ইয়াক লৈ সন্দেহ প্ৰকাশ কৰিছে খেতিয়ক ৰাইজে। এয়া চীন আৰু অৰুণাচল প্ৰদেশৰ নদীবান্ধৰ অতিৰিক্ত পানী এৰি দিয়াৰ ফল বুলিও সন্দেহ কৰে ৰাইজে। কৃষি প্ৰধান গাওঁ কেইখনত গত বছৰৰ দৰে নহৰু বিক্ৰী কৰি ৰঙালী বিহু আনন্দ লোৱা পৰিৱৰ্তে,এই সকল খাঁটি খোৱা গঁঞা ৰাইজে মূৰে কপালে হাত দিব লগাত পৰিছে।

আনহাতে এই খবৰ জনপ্ৰতিনিধি তথা জিলা কৃষি বিভাগক খবৰ দিয়াৰ পিছতো গেলি-পচি যোৱা খেতিয়কৰ ফচল চাবলৈ নহাত ক্ষুব্ধ হৈ পৰে ৰাইজে। আনহাতে সোঁনাৰিঘাট, মেদিপমুৱা , দীঘলী পামতো জৈৱিক পদ্ধতিৰে উৎপাদন কৰা শ শ বিঘা নহৰু খেতি আৱতৰিয়া বানে নষ্ট কৰাৰ খবৰ আমালৈ আহে। মুক্তিয়াৰ গাঁও পঞ্চায়ত মেদি পমুৱা, সোণাৰীঘাট, দেউৰীঘাট, দিঘলিপাম, চুমনিয়াকে ধৰি দহখন গাঁৱৰ কৃষক ৰাইজেও বাৰিষাৰ পূৰ্বেই ব্ৰহ্মপুত্ৰ নদীৰ প্ৰথমটো বানত  শ শ হেক্টৰ  নহৰু, সৰিয়হ খেতি নষ্ট হোৱা বুলি কয়। এই ক্ষেত্ৰত প্ৰকৃত খেতিয়কৰ নষ্ট হোৱা পথাৰ তদন্ত কৰি চৰকাৰ প্ৰশাসনক একালীন ক্ষতিপূৰণ দিবলৈ কৃষক নেতা ভৱেন হালৈ, অৰূপ গগৈ আৰু প্ৰকৃতি কৰ্মী টিকেন কাকতিয়ে আহ্বান জনাইছে।