কামৰূপ জিলাৰ বঙৰাৰ সমীপৰ ডাঙৰ কৈটাসিদ্ধি ৰাইজ গয়ৰহে পৰম্পৰাগত উদযাপন কৰি অহা তথা এইবেলি ৭৩ তম্ বৰ্ষত পদাৰ্পণ কৰা সুঁৱৰি উৎসৱটি অহা ১৯ আৰু ২০ এপ্রিলত “শ্ৰীশ্ৰী কৈটাসিদ্ধি সত্ৰ” প্ৰাঙ্গণত দুদিনীয়া কাৰ্যসূচীৰে উদযাপনৰ প্ৰস্তুতি চলাইছে বুলি গয়ৰহৰ সভাপতি প্ৰদীপ চন্দ্র নাথ আৰু সম্পাদক ৰত্নেশ্বৰ নাথে এক বিজ্ঞপ্তি যোগে জনাইছে। ১৯ এপ্রিলৰ পুৱা ৫ বজাত ঊষা কীৰ্তন পৰিচালনা কৰিব সত্ৰাধিকাৰ ৰজনীকান্ত নাথে। ৮ বজাত গোসাঁই স্থাপন, দিনৰ ১১ বজাত ধৰ্মধ্বজা উত্তোলন কৰিব প্ৰবীণ নাথ শাস্ত্ৰীয়ে। ১২বজাত সুঁৱৰি উৎসৱৰ মঞ্চ মুকলি কৰিব দক্ষিণ কামৰূপ জিলা সত্ৰ মহাসভাৰ সভাপতি অখিল মহন্তই।

১২:৩০ বজাত বন্তি প্ৰজ্বলন কৰিব নবীন নাথে, বিশিষ্ট অতিথি হিচাপে শিক্ষক গজেন বড়ো, বহুভাষিক সাহিত্য মঞ্চ, অসমৰ প্ৰধান সম্পাদক দীপক শৰ্মা, অৱসৰপ্ৰাপ্ত শিক্ষক প্ৰদীপ তালুকদাৰে অংশ ল’ব। ১ বজাত সম্বৰ্দ্ধনা অনুষ্ঠান, ২বজাত সুঁৱৰি উৎসৱ আৰম্ভ, নাট পৰিচালনা প্ৰাণেশ্বৰ নাথৰ, দল পৰিচালনা ললিত নাথৰ। নিশা ১০ বজাত “যুগান্তৰ নাট্য দল” ৰ দ্বাৰা যাত্রাভিনয়। ২০ এপ্রিলৰ পুৱা ৮বজাত প্ৰসাদ বিতৰণ, আবেলি ২বজাত শ্রীশ্রী চতুর্ভুজ গোসাঁই লৈ শোভাযাত্রা, নিশা ৯বজাত প্ৰসাদ বিতৰণ। দুয়োদিনৰ কাৰ্যসূচীত ধৰ্মপ্ৰাণ ৰাইজৰ উপস্থিতি উদ্যোক্তাসকলে কামনা কৰিছে।

বঙাইগাঁও জিলাৰ অভয়াপুৰী উত্তৰ সমষ্টিৰ ভাণ্ডাৰা বজাৰৰ পৰা জামদহা লৈ যোৱা ৰাস্তাৰ মাজৰ কাঠৰ দলঙত পাৰাপাৰ হোৱাত যথেষ্ট অসুবিধাৰ সন্মূখীন হৈছে বৃহত্তৰ অঞ্চল বাসি । বহু বছৰ পূৰ্বে ভাণ্ডাৰা জামদহা সংযোগী পথত এখন কাঠৰ দলং নিৰ্মাণ কৰি বৃহত্তৰ অঞ্চলৰ ৰাইজৰ যাতায়ত ব্যৱস্থা সুচল কৰি তুলিছিল যদিওঁ নিৰ্মাণৰ পিছৰ পৰাই দলঙৰ দুয়ো পাৰৰ মাটি খহি পৰে। দলঙৰ এপ্ৰোচ নথকাৰ বাবে স্থানীয় ৰাইজৰ লগতে ছাত্ৰ ছাত্ৰী সকলে দলঙত জখলা বগাই  পাৰাপাৰ হব লগা হৈছে।

উল্লেখ্য যে প্ৰতিবছৰে দলঙৰ এপ্ৰোচৰ বাবে চৰকাৰে বাৰে বাৰে ধন আবন্টন হয় যদিওঁ সকলো ধন একাংশ  জনপ্ৰতিনিধিৰ লগতে দালালে আত্মহাত কৰি পেলায় । দলংখন যেন সোনৰ কণী দিয়া হাহঁত পৰিনিত হৈছে একাংশ জনপ্ৰতিনিধিৰ বাবে। শীঘ্ৰেই দলংখনৰ এপ্ৰোচৰ কাম কৰি বৃহত্তৰ অঞ্চলৰ ৰাইজৰ যাতায়ত ব্যৱস্থা সুচল কৰি তুলিবলৈ চৰকাৰক দাবী জনাই ভান্ডাৰা বাসী ৰাইজে এক প্ৰতিবাদ কৰে।

বৰপেটা জিলাৰ কলগাছিয়াস্হিত ৰূপসী শিশু উন্নয়ন প্ৰকল্পত শিশু, প্ৰসূতি আৰু গৰ্ভৱতী মহিলাৰ খাদ্য যোগানৰ ক্ষেত্ৰত চৰম অনিয়ম হোৱাৰ এক গুৰুতৰ অভিযোগ উত্থাপিত হৈছে। যি সময়ত চৰকাৰে শিশু আৰু শিশুৰ মাতৃয়ে যাতে পুষ্টিহীনতাৰ অভাৱত কষ্ট কৰিবলগীয়া নহয় তাৰ বাবে বিভিন্ন আচঁনিৰ জৰিয়তে শিশু আৰু শিশুৰ মাতৃক পুষ্টিকৰ সামগ্ৰী যোগান দি থকা পৰিলক্ষিত হৈছে। তেনেক্ষেত্ৰত কলগাছিয়া ৰূপসী শিশু উন্নয়ন প্ৰকল্পত শিশু আৰু মহিলাৰ খাদ্য যোগান ধৰাৰ ক্ষেত্ৰত চৰম অনিয়মে একাংশ অঙ্গনবাড়ী কৰ্মী আৰু সচেতন মহলৰ মাজত তীব্ৰ প্ৰতিক্ৰিয়াৰ সৃষ্টি হৈছে।

জানিব পৰা মতে একে সমানে শিশু আৰু প্ৰসূতি আৰু গৰ্ভৱতী মহিলা থকা কেন্দ্ৰৰ বেংক একাউণ্টত টকা সোমাই দিয়াৰ ক্ষেত্ৰতো অনিয়ম হোৱা দেখা গৈছে। চাউল আৰু মটৰ যোগান ধৰাৰ ক্ষেত্ৰতো ৰূপসী সংহত শিশু উন্নয়ন প্ৰকল্পৰ কাৰ্যালয়ৰ পৰা বিভিন্ন ধৰণৰ খেলিমেলিৰ সৃষ্টি কৰাৰ অভিযোগ উত্থাপিত হৈছে। এই ক্ষেত্ৰত ৰূপসী সংহত শিশু উন্নয়ন প্ৰকল্পৰ ভিতৰ চৰাত দেখা দিয়া বিভিন্ন ধৰণৰ অনিয়ম সমূহ তদন্তৰ জৰিয়তে ব্যৱস্থা গ্ৰহণ কৰিবলৈ অসমৰ মুখ্যমন্ত্ৰী আৰু বিভাগীয় মন্ত্ৰীৰ দৃষ্টি কামনা কৰিছে অঙ্গনবাড়ী কৰ্মী তথা সচেতন মহলে।

অসম নাট্য সন্মিলনে এই বেলি “নাট্য সন্মিলন বঁটা“ প্ৰদান কৰিব নগাঁৱৰ জীৱেশ্বৰ দেৱ গোস্বামীক ৷ অসম সত্ৰ মহাসভাৰ প্ৰাক্তন প্ৰধান সম্পাদক , সত্ৰাধিকাৰ , শিক্ষাবিদ জীবেশ্বৰ দেৱ গোস্বামীৰ ঘৰ নগাঁৱত ৷ ইফালে “মহেন্দ্ৰ বৰঠাকুৰ বঁটা“ প্ৰদান কৰিব প্ৰকাশ মেধিক ৷ প্ৰয়াত প্ৰকাশ মেধি ৰাজ্যৰ এজন বলিষ্ঠ নাট্যকাৰ আৰু পৰিচালক আছিল ৷ অসম নাট্য সন্মিলনে নতুনকৈ প্ৰবৰ্তন কৰা নাট্যপ্ৰভাকৰ “সত্য প্ৰসাদ বৰুৱা নাট্যসমালোচক বঁটা“ নগাঁৱৰ ৰাজ্যিক অধিবেশন স্থলীতে এইবাৰ প্ৰদান কৰিব ৷ এই বঁটা প্ৰদান কৰা হ’ব নাট্য সমালোচক , শিক্ষাবিদ ড° শৈলেন ভড়াঁলীক ৷ অসমীয়া প্ৰতিদিন ডিজিটেলক এই কথা জনাইছে অসম নাট্য সন্মিলনৰ কেন্দ্ৰীয় সমিতিৰ প্ৰধান সম্পাদক গিৰিধৰ ৰয়ে ৷

প্ৰধান সম্পাদক ৰয়ে জনোৱা মতে, বঁটা সমূহ অধিবেশনৰ ১০ এপ্ৰিলৰ মুকলি সভাত প্ৰদান কৰা হ’ব ৷ মুকলি সভাতে সন্মিলনে শিল্পী নিপন গোস্বামী , বিদ্যা ৰাও , বলীন বৰগোহাঁই , ভোগী বৰ্মন, বাদল চৌধুৰী , কানু গোস্বামী ,প্ৰয়াত ড° দিলীপ কুমাৰ বৰুৱাক সম্বৰ্দ্ধনা জনাব ৷৬ এপ্ৰিলৰ পৰা কলঙৰ বাকৰি নেহৰুবালিত আৰম্ভ হোৱা ৬০ সংখ্যক অসম নাট্য সন্মিলনৰ ৰাজ্যিক অধিবেশনৰ শুকুৰবাৰৰ তৃতীয় দিনৰ কাৰ্যসূচী অনুসৰি পুৱাৰ ভাগত সাধাৰন পৰিষদৰ সভা অনুষ্ঠিত হয় ৷ দুপৰীয়াৰ পৰা একক অভিনয় প্ৰতিযোগিতা, শিশু নাট, এন এছ ডিৰ নাট প্ৰদৰ্শন, নাট প্ৰতিযোগিতা আদি কাৰ্যসূচী আছে ৷