বিহুৰ সময়ত উগ্ৰপন্থীয়ে কূটাঘাত সংঘটিত কৰাৰ আশংকা কৰিয়েই শিৱসাগৰত জাৰি কৰা হৈছে ১৪৪ ধাৰা। এই ধাৰা জলিা খনত দুমাহৰ বাবে বাহাল থাকিব বুলি জিলা প্ৰশাসনৰ সূত্ৰই প্ৰকাশ কৰিছে। জিলা প্ৰশাসনৰ সূত্ৰই প্ৰকাশ কৰা অনুসৰি শিৱসাগৰ জিলাত আজিৰ পৰা বলবৎ হোৱাকৈ ১৪৪ ধাৰা জাৰি কৰিছে অতিৰিক্ত জিলা দণ্ডাধীশ বিতোপন নেওগে। তৎকালে বলৱৎ হোৱাকৈ ভাৰতীয় ফৌজদাৰী কাৰ্যবিধিৰ ১৪৪ ধাৰাৰ অধীনত নিষেধাজ্ঞা জাৰি কৰিছে। ৰাজহুৱা স্থানত পাঁচ জন বা তাতোধিক লোকৰ সমাবেশ, সভা-সমিতি, শোভাযাত্ৰা উলিওৱা, শ্বহীদ বেদী নিৰ্মাণ, দেৱাল লিখন, শ্ল’গান ছপা কৰা, কোনো ব্যক্তি বা ব্যৱসায়িক প্ৰতিষ্ঠান, কাৰ্যালয় আদিত যি কোনো ধৰণৰ বৰঙণি সংগ্ৰহ নিষিদ্ধ কৰা হৈছে। অৱশ্যে ৬০ বছৰ উৰ্দ্ধৰ লোক, ১২ বছৰ বয়সৰ তলৰ ল’ৰা-ছোৱালী, মহিলা, চৰকাৰী বিষয়া-কৰ্মচাৰী আৰু আৰক্ষীৰ লোকক নিষেধাজ্ঞাৰ পৰা ৰেহাই দিয়া হৈছে৷ জিলাখনত অসামাজিক লোক তথা উগ্ৰপন্থীৰ আইন বিৰোধী কাৰ্যকলাপ, গুলীচালনা, হত্যা, অপহৰণ বা ধন লুটৰ আশংকা কৰি দুচকীয়া যান বাহনত দুজন বা তাতোধিক লোকৰ বিচৰণো নিষিদ্ধ কৰা হৈছে।

জনস্বাস্থ্যৰ প্ৰতি ভাবুকি স্বৰূপ ৫০ মাইক্ৰন ঘনত্বৰ কম প্লাষ্টিক কেৰীবেগ, যি কোনো ধৰণৰ ধঁপাত জাতীয় সামগ্ৰী যেনে গুটখা, শিখৰ আদি বেচা-কিনা সমগ্ৰ শিৱসাগৰ জিলাত নিষিদ্ধ কৰা হৈছে। জিলাখনৰ সীমামূৰীয়া অঞ্চলৰে উগ্ৰপন্থীৰ আহ-যাহ আৰু অসমাজিক কাৰ্যকলাপৰ প্ৰতি লক্ষ্য ৰাখি অসম-নগালেণ্ড সীমান্তত নৈশ সান্ধ্য আইন প্ৰৱৰ্ত্তন কৰি সীমান্তৰ ৫ কিলোমিটাৰ পৰিধিৰ ভিতৰত সন্ধিয়া ৬-০০ বজাৰ পৰা পুৱা ৬-০০ বজালৈ যি কোনো ব্যক্তি বা গোট আৰু গাড়ী-মটৰৰ চলাচল নিষিদ্ধ কৰা হৈছে। লালীগুড়ৰ পৰা থলুৱা মদ প্ৰস্তুতকৰণেৰে জনস্বাস্থ্য হানি হোৱাৰ আশংকা কৰি সমগ্ৰ জিলাখনত লালীগুৰ বেচা-কিনা নিষিদ্ধ কৰা হৈছে। আদেশ অমান্য কৰা সকল ভাৰতীয় দণ্ডবিধি আইনৰ ১৮৮ ধাৰা অনুসৰি দণ্ডণীয় হ’ব বুলি নিৰ্দেশনাত উল্লেখ কৰিছে।

জিলাখনত দুচকীয়া যানত দুজন বা তাতোধিক লোকৰ বিচৰণো নিষিদ্ধ কৰা হৈছে।জিলাখনৰ সীমামূৰীয়া অঞ্চলেদি উগ্ৰপন্থীৰ আহ-যাহ আৰু অসামাজিক কাৰ্যকলাপৰ প্ৰতি লক্ষ্য ৰাখি অসম-নগালেণ্ড সীমান্তত সীমান্তৰ ৫ কিলোমিটাৰ পৰিধিৰ ভিতৰত সন্ধিয়া ৬-০০ বজাৰ পৰা পুৱা ৬-০০ বজালৈ নৈশ সান্ধ্য আইন জাৰি কৰিছে।এই নিষেধাজ্ঞা সমূহ তৎকালীনভাবে বলৱৎ হৈছে আৰু পৰৱৰ্ত্তী ৬০ দিনলৈ বা পুনৰ আদেশ নিদিয়া পৰ্যন্ত বাহাল থাকিব। এই আদেশসমূহ অমান্য কৰা সকল ভাৰতীয় দণ্ডবিধি আইনৰ ১৪৪ ধাৰা অনুসৰি দণ্ডণীয় হ’ব বুলিও এই নিৰ্দেশনাত উল্লেখ কৰিছে। বিহুৰ বতৰত জাৰি কৰা এনে নিষেধাজ্ঞাই জিলা খনৰ সাধাৰণ জনতাৰ মাজত তীব্ৰ প্ৰতিক্ৰিয়াৰ সৃষ্টি কৰিছে।

তিনিচুকীয়া জিলাৰ অন্তৰ্গত লক্ষীপথাৰ অঞ্চলত অসম ৰাজ্যিক গ্ৰামীণ জীৱিকা অভিযান ,বিভিন্ন দল সংগঠন,জ্যেষ্ঠ নাগৰিক সন্থা,আত্মসহায়ক গোট তথা সমগ্ৰ লক্ষীপথাৰ বাসী ৰাইজৰ সহযোগত ড্ৰাগছ,কানি ইত্যাদি প্ৰচলন বন্ধ কৰি এক সুস্থ সমাজ গঢ়ি তোলাৰ বাবে এক সজাগতা মূলক বিশাল পদ-যাত্ৰা  লগতে এখন সজাগতা সভা আয়োজন কৰে।প্ৰতিকূল বতৰৰ মাজতে শতাধিক মহিলাই ৰাজপথত উলাই আহি মাদক দ্ৰব্যৰ প্ৰচলন বন্ধ কৰিবলৈ বিভিন্ন শ্লোগানেৰে ৰেলীত অংশগ্ৰহন কৰে।

সজাগতা সভাত উপস্থিত থাকে পঞ্চায়ত সভাপতি ললিত চন্দ্ৰ গগৈ  ,গাওঁ বুঢ়া ক্ৰমে চন্দ্ৰ কান্ত কুচ ,থানো গগৈ,ইবলাল শৰ্মা,প্ৰাক্তন শিক্ষক ফনিধৰ ৰাজখোৱা , ক্ষীৰবাহাদোৰ চেত্ৰী,ভূপেন্দ্ৰ নাথ গগৈ,জীৱিকা সখি অৰুনিমা দত্তৰ লগতে শতাধিক পুৰুষ-মহিলা। উক্ত সজাগতা সভাত সমাজৰ ক্ষতিকাৰক মাদক দ্ৰব্যৰ প্ৰচলন বন্ধ কৰাৰ বাবে আলোচনা কৰাৰ লগতে চৰকাৰৰ বিভাগীয় কৰ্তৃপক্ষক এই ক্ষেত্ৰত সহযোগিতা কৰিবলৈ আহ্বান জনায়।

অংকীয়া ভাওনা, হুঁচৰি, বৰপেটাৰ হলি গীত, বিহুৱতি প্ৰতিযোগিতা, অসম তথা উত্তৰ পূৰ্বাঞ্চলৰ জনজাতীয় খাদ্য সম্ভাৰ, অসমীয়া খাদ্য প্ৰকৰণ, থলুৱা পিঠাপনাকে ধৰি বিভিন্ন ব্যঞ্জন, জলপান, থলুৱা ৰন্ধন প্ৰকৰণ, হিপ হপ, ৰক মিউজিক, থলুৱা আৰু বিভিন্ন ৰাষ্ট্ৰীয় ব্ৰেণ্ডৰ বিপনি, সাজ পোচাক আদিকে ধৰি অসমৰ বাৰেৰহনীয়া সংস্কৃতি তথা সৃষ্টিশীলতা আৰু থলুৱা বজাৰ সৃষ্টিৰ লক্ষৰে মহানগৰীৰ খানাপাৰা পশু চিকিৎসা মহাবিদ্যালয়ত আজিৰ পৰা তিনিদিনীয়া কাৰ্যসূচীৰে আৰম্ভ হৈছে ৰঙৰ আলি হিচাপে স্বকীয়তা বহন কৰি অহা ৰঙালীৰ ষষ্ঠ সংস্কৰণ। ৰঙালীৰ বাকৰিত আজি সন্ধিয়া অনুষ্ঠানটো আনুষ্ঠানিক ভাবে উদ্ধোধন কৰে অসম চৰকাৰৰ স্বাস্থ্য আৰু পৰিয়াল কল্যাণ মন্ত্ৰী কেশৱ মহন্তই। অনুষ্ঠানত কৃষি মন্ত্ৰী অতুল বৰা, ক্ৰীড়া আৰু যুবকল্যান তথা সাংস্কৃতিক মন্ত্ৰী বিমল বৰা উপস্থিত থাকি ৰঙালীৰ মুখ্য আয়োজক শ্যামকানু মহন্তই গ্ৰহণ কৰা ভূমিকাৰ শলাগ লয় আৰু অনুষ্ঠানটোৰ উজ্বল ভৱিষ্যত কামনা কৰে।

অনুষ্ঠানটোৰ আৰম্ভণিতে মহানগৰীৰ গন্ধৰ্ব কলা কেন্দ্ৰৰ শিল্পীসকলে মাধৱদেৱ বিৰচিত চোৰধৰা নাটক খন মঞ্চস্থ কৰে। ইয়াৰ পিছতে যোৰহাটৰ মঞ্জুলা কলা কেন্দ্ৰই মহাপুৰুষ শঙ্কৰদেৱ বিৰচিত পত্নী প্ৰসাদ নাট খন মনস্থ কৰি দৰ্শকক আহ্লাদিত কৰি তোলে। এই অনুষ্ঠানতে মহানগৰৰ সাতগাঁও , দলবাৰিৰ সনাতন নামঘৰৰ মহিলা বৃন্দই বৰপেটাৰ হোলী গীত পৰিৱেশন কৰি ৰঙালীত আন ৰং প্ৰদান কৰে। তিনিদিনীয়াকৈ আয়োজন কৰা ৰঙালীৰ প্ৰতিযোগিতা মূলক কাৰ্যসূচী হিচাপে আজি অসমৰ বিভিন্ন ঠাইৰ পৰা অহা কেইবাটাও হুঁচৰি দলে হুঁচৰি প্ৰদৰ্শনৰ উপৰি বিহু নাচনীয়ে বিহুৱতী প্ৰতিযোগিতাত অংশগ্ৰহণ কৰে। ৰঙালীত প্ৰথম বাৰৰ বাবে অংশগ্ৰহণ কৰিছে বাহুবলি, কণ্যাকা আদিৰ দৰে খ্যাতনামা থলুৱা ব্ৰেন্দে। ৰঙালীত বেচৰকাৰী অসমীয়া থলুৱা খাদ্যৰ প্ৰতিষ্ঠান প্ৰিয়বন্ধুৰ উদ্যোগত থলুৱা খাদ্য প্ৰকৰণৰ প্ৰতিযোগিতা অনুষ্ঠিত হয়। প্ৰিয়বন্ধুৰ সঞ্চালক অৰ্চনা বৰঠাকুৰে পৰিচালনা কৰা মিঠা ব্যঞ্জন শীৰ্ষক প্ৰতিযোগিতা খনত অসমৰ বিভিন্ন অঞ্চলৰ ৩৮ গৰাকী মহিলাই অংশগ্ৰহণ কৰে। সমান্তৰাল ভাবে খাদ্য ব্লগাৰ ডাঃ গীতা দত্তৰ সঞ্চালনত মিচিং, বৰো, কাৰ্বি, তিৱা আদি বিভিন্ন জনজাতীয় আৰু থলুৱা খাদ্যৰ খাদ্য প্ৰদৰ্শনী অনুষ্ঠিত হয়। খাদ্য সম্ভাৰে দৰ্শকক বিশেষ আকৰ্ষণ প্ৰদান কৰাৰ লগতে গভীৰ জ্ঞান আৰু অনুপ্ৰেৰণা প্ৰদান কৰে।

ৰঙালিত দৰ্শকৰ বিশেষ আকৰ্ষণৰ কেন্দ্ৰ বিন্দু হৈ পৰিছে ইয়াৰ খাদ্য বিপণি সমূহ। নাগা, মণিপুৰী, খাচী, জয়ন্তীয়াকে ধৰি উত্তৰ পূৰ্বাঞ্চলৰ প্ৰায় সকলো বোৰ জাতি জনগোষ্ঠীৰ স্বকীয় খাদ্য বিপনী সমূহ হৈ পৰিছে দৰ্শকৰ আন এক আকৰ্ষণৰ কেন্দ্ৰ। আজিৰ দিনটোত অনুষ্ঠিত টেকেলি ভঙা খেল হৈ পৰিছিল ৰঙালীৰ বাকৰিত অনুষ্ঠিত অন্যতম দৰ্শনীয় খেল। সন্ধিয়ালৈ জনপ্ৰিয় শিল্পী জুবিন গাৰ্গকে ধৰি অন্যান্য বাচক বনীয়া শিল্পীৰ সৌজন্যত মনপৰশা সাংস্কৃতিক সন্ধিয়া অনুস্থিত হয়। অন্যহাতে ফেশ্বন ডিজাইনাৰ অনু মণ্ডলৰ নিৰ্দেশনাত এক মনোমোহা ফেশ্বন শ্ব অনুষ্ঠিত হয়।

গুৱাহাটীৰ পশ্চিম প্ৰান্তৰ আজাৰা কাঁহিকুছিস্থিত ৰাজ্যিক গ্ৰামোন্নয়ন আৰু প্ৰশিক্ষণ প্ৰতিষ্ঠান (এছ.আই. পি.আৰ.ডি) চৌহদৰ সম্প্ৰচাৰণ প্ৰশিক্ষণ কেন্দ্ৰই (ই. টি.চি) বিভাগীয় নিৰ্দেশনা অনুসৰি ৰাজ্যৰ মহিলা শিপিনী সকলৰ দক্ষতা বৃদ্ধিৰ বাবে বিভিন্ন ধৰণৰ প্ৰশিক্ষণ কাৰ্যসূচী গ্ৰহণ কৰি আহিছে । বিশেষকৈ মহিলা আত্মসহায়ক গোট সমূহৰ জৰিয়তে নিৰ্বাচিত মহিলা শিপিনী সকলক তেওঁলোকে যাতে নতুন নতুন কৌশন প্ৰয়োগ কৰি শেহতীয়া প্ৰযুক্তিৰ ডিজাইন তথা আৰ্হিৰে কম সময়, কম মূলধন, কম ঠাইত বৈজ্ঞানিক পদ্ধতিৰে অধিক উৎপাদন কৰি নিজৰ আয় বৃদ্ধি কৰিব পাৰে তাৰ বাবে ই.টি.চিয়ে প্ৰশিক্ষণ প্ৰদান কৰি আহিছে।আনহাতে বিভাগীয় নিৰ্দেশনা অনুসৰি ই.টি.চি চৌহদৰ শিপিনী কেন্দ্ৰত ২৮ ফেব্ৰুৱাৰীৰ পৰা চলি আছে এক ডেৰমহীয়া দক্ষতা বৃদ্ধিৰ প্ৰশিক্ষণ কাৰ্যসূচী। এই কাৰ্যসূচীত চৰাইদেউ জিলাৰ সোনাৰী, হোজাই জিলাৰ হোজাই আৰু কামৰূপ জিলাৰ ৰাণী উন্নয়ন খণ্ডৰ মহিলা আত্মসহায়ক গোটৰ নিৰ্বাচিত ৩০ জনী মহিলা শিপিনীয়ে ভাগ লৈছে।

ই.টি. চিৰ অধ্যক্ষ লালৰেম চিয়ামি গামলাইৰ তত্বাৱধানত অনুষ্ঠিত প্ৰশিক্ষণ কাৰ্যসূচীত উপ সঞ্চালক অনুপম দত্ত , গাণনিক হেমেন বৈশ্যকে ধৰি কেবাজনো কৰ্মচাৰীয়ে বিশেষ সহযোগিতা আগবঢ়াইছে  তেনেদৰে শিপিনী সকলক প্ৰশিক্ষণ প্ৰদান কৰিছে ক্ৰমে – প্ৰশিক্ষক ধীৰেশ্বৰ ডেকা, দীপিকা দেৱী মহন্ত, জলিনা পাচ্ছিকা, লাগিনপুইয়া ফৌনায়ে। শিপিনী সকলক গ্ৰাহকৰ ৰুচি অনুসৰি সকলো ধৰণৰ প্ৰশিক্ষণ দি অহা হৈছে। আনকি খানামুখ অঞ্চলৰ জ্ঞানমালিনী বিকশিত মহিলা দলকে ধৰি  ওচৰ পাজৰৰ কিছু  মহিলা আত্মসহায়ক গোটৰ শিপিনীয়েও মাজে সময়ে ই টি চি চৌহদলৈ আহি শিপিনী সকলৰ প্ৰশিক্ষণ কাৰ্যসূচীৰ বুজ লৈছে। জ্ঞানমালিনী  বিকশিত মহিলা দলৰ উপ- সভানেত্ৰী পূৰ্ণিমা কলিতাকে ধৰি কেবাটাও আত্মসহায়ক গোটৰ কর্মকর্তাই সদৰি কৰা অনুসৰি এনে ধৰণৰ প্ৰশিক্ষণ কাৰ্যসূচীয়ে দক্ষতা বৃদ্ধিৰ লগতে তেওঁলোকক একো একো গৰাকী নিপুণ শিপিনী হিচাপে গঢ় দিব আৰু   নিশ্চিতভাৱে ইয়াৰ বাবে ই.টি. চি কৰ্তৃপক্ষ ধন্যবাদৰ পাত্ৰ। উল্লেখযোগ্য যে, ডেৰমহীয়া  প্ৰশিক্ষণ কাৰ্যসূচীৰ অহা  ১৩ এপ্ৰিলত সামৰণি পৰিব। ইয়াৰ উপৰিও শিপিনী সকলৰ খোৱা বোৱা, থকা মেলাৰ ব্যৱস্থা সকলোখিনী ই টি চি চৌহদত বিনামূলীয়াকৈ কৰা হৈছে বুলি গাণনিক হেমেন বৈশ্যই জানিবলৈ দিছে।