এখন দীঘলীয়া যুঁজৰ যেন অন্ত পৰিছে! সাময়িক সকাহ লাভ কৰিছে খান পৰিয়ালে। বাদ-বিবাদ,আইনী জটিলতাৰ অন্তত নিজ পুত্ৰক ঘৰলৈ ওভতাই আনিছে শ্বাহৰুখ-গৌৰীয়ে। আৰিয়ানৰ আগমনৰ পাছতে হেৰুৱা ছন্দ ওভতি আহিছে ‘মন্নত’লৈ। ছবিখনৰ দৃশ্যগ্ৰহণৰ কামত মনোনিৱেশ কৰিছে বলীউড বাদশ্বাহে। কিং খানৰ পাছত এইবাৰ গৌৰী খানেও কামত লগাৰ মন মেলিছে। উল্লেখ্য যে, নিজ পুত্ৰৰ গ্ৰেপ্তাৰৰ পাছৰ পৰাই ৰাজহুৱা স্থানত দেখিবলৈ পোৱা নাই গৌৰীক। ‘মন্নত’ৰ বন্ধ কোঠাত সন্তানৰ বাবেই দিনে-ৰাতি প্ৰাৰ্থনা কৰিছিল গৌৰীয়ে। পুত্ৰ উভতি অহাৰ পাছত শ্বাহৰূখ পত্নীৰ মুখত বিৰিঙিছে হাঁহি। ন-উদ্যমেৰে পুনৰ কামত ধৰিব গৌৰীয়ে।

আভ্যন্তৰীণ সজ্জা বিশেষজ্ঞ গৌৰীয়ে ব্যৱসায়ী ফাল্গুনী আৰু শ্বেনৰ নতুন বিপনীখন আটকধুনীয়াকৈ সজাই তোলা দেখিবলৈ পোৱা গৈছে। দুই ব্যৱসায়ীৰ সৈতে মত বিনিময়ো কৰিছে গৌৰীয়ে। অলপতে, এটা ভিডিঅ’ ইনষ্টাগ্ৰামত পোষ্ট কৰিছে গৌৰীয়ে। গৌৰীৰ হাতৰ পৰশত প্ৰাণ পাই উঠা বিপনীখনৰ বিষয়ে দুই-এটা টিপছো শ্বেয়াৰ কৰিছে ভিডিঅ’টোত। শ্বাহৰূখৰ প্ৰিয়ভাজন পৰিচালক ফাৰহা খানে গৌৰীক এনেদৰে স্বাভাৱিক ছন্দলৈ উভতি অহা দেখি উৎসাহিত হৈছে।

উল্লেখ্য যে, এতিয়া ক্ৰমাত্‍ স্বাভাৱিক অৱস্থালৈ ঘুৰি আহিছে খান পৰিয়াল। বুধবাৰে বোম্বাই উচ্চ ন্যায়ালয়ে এনচিবিৰ কাৰ্যালয়ত আৰিয়ানৰ সাপ্তাহিক উপস্থিতি সন্দৰ্ভত গুৰুত্বপূৰ্ণ ৰায় প্ৰদান কৰিছিল। জামিনৰ পূৰ্বৰ চৰ্ত বাতলিৰ বাবেই বোম্বাই উচ্চ ন্যায়ালয়ৰ কাষ চাপিছিল তাৰকা তনয় আৰিয়ানে। সেয়েহে, অতীতৰ তিক্ততাক পাহৰি পুনৰ হাঁহিমুখে নিজ নিজ কৰ্মত মনোনিৱেশ কৰিছে শ্বাহৰূখ-গৌৰীয়ে।

বলীউডৰ সবাটোকৈ চৰ্চিত দুই যুটিৰ এটা যুটি ইতিমধ্যে বিবাহ পাশত আৱদ্ধ হ’ল। কেটৰিনাক জীৱন সংগী ৰূপে বাচ‌নি কৰি ল’লে বিকী কৌশলে। পাছে বলীউদ কুইন আলিয়া ভাট কেতিয়া বিবাহ পাশত আৱদ্ধ হ’ব? সাম্প্ৰতিক সময়ত এয়া হৈ পৰিছে কোটিটকীয়া প্ৰশ্ন। উল্লেখ্য যে, ৰণবীৰে আলিয়াক বিয়া কৰাবলৈ সাজু বুলি ৰণবীৰে পূৰ্বেই জনাইছিল। কিন্তু ক’ৰ’না মহামাৰীৰ বাবেই তেওঁলোকৰ বিয়াৰ দিন পিছুৱাই দিয়া হৈছিল বুলি সংবাদ মাধ্যমতো প্ৰকাশ পাইছিল। ইফালে, অ’মিক্ৰনৰ সংক্ৰমণৰ মাজতে বিকী-কেট বিবাহ পাশত আৱদ্ধ হ’ল। সেইবাবে আলিয়া-ৰণবীৰে কেতিয়া বিবাহ পাশত আৱদ্ধ হ’ব তাৰ বাবে অধীৰ আগ্ৰহেৰে বাট চাই ৰৈছে অনুৰাগীয়ে।

এতিয়া আৰু পলম কৰিব বিচৰা নাই আলিয়াই ! এনডিটিভিৰ প্ৰকাশিত প্ৰতিবেদনত আলিয়া-ৰণবীৰ অভিনীত ‘ব্ৰহ্মাস্ত্ৰ’ৰ মোচন পোষ্টাৰ, আটাইতকৈ চৰ্চিত প্ৰথমখন চলচ্চিত্ৰ বুধবাৰে মুকলি কৰা হৈছিল। ৰণবীৰ-আলিয়া আৰু চলচ্চিত্ৰ পৰিচালক আয়ন মুখাৰ্জী নতুন দিল্লীত অনুষ্ঠিত বিশাল অনুষ্ঠানৰ বাবে মঞ্চত উপস্থিত আছিল। অনুষ্ঠানটোত উপস্থিত এজন অনুৰাগীয়ে ৰণবীৰক সুধিছিল যে, ‘আপুনি কেতিয়া আলিয়াক বিয়া কৰাব? আলিয়াক বিয়া কৰাব নে আন কাৰোবাক? যদি আপোনালোক দুয়ো বিবাহপাশত আৱদ্ধ হয় তেন্তে আমি সুখী হ’ম।’ অনুৰাগীজনৰ প্ৰশ্নত হতবাক হৈছিল ৰণবীৰ।

ৰণবীৰে নিজকে নিয়ন্ত্ৰণ কৰি আলিয়াৰ চকুলৈ চাই ক’লে, ‘আমাৰ বিয়া কেতিয়া?’ ৰণবীৰৰ এই প্ৰশ্নত হাঁহিৰ ৰোল উঠা দেখা যায়। ৰণবীৰৰ প্ৰশ্নৰ উত্তৰত আলিয়াই কয়, ‘আপুনি মোক এই প্ৰশ্নটো কিয় সুধিছে? পাছত, ‘ব্ৰহ্মাস্ত্ৰ’ ছবিখনৰ পৰিচালকৰ ফালে চাই কৌতুক কৰি কয়, ‘মই এই প্ৰশ্নটো আপোনাক নহয়, আয়ন মুখাৰ্জীক সুধিছো।’ পৰৱৰ্তী সময়ত পৰিচালকজনে বিবাহৰ প্ৰসংগক সামৰি কয়, ‘আজি ব্ৰহ্মাস্ত্ৰৰ মুক্তিৰ বিষয়ে আলোচনা হ’ব, নায়ক নায়িকাৰ বিবাহৰ বিষয়ে নহয়।ৰণবীৰ কাপুৰ আৰু আলিয়া ভাট দীৰ্ঘদিন ধৰি প্ৰেমত আছে। তেওঁলোকৰ বিগত বৰ্ষতে বিবাহ পাশত আৱদ্ধ হোৱাৰ পৰিকল্পনা আছিল। মহামাৰীৰ বাবেহে ৰণবীৰ-আলিয়াৰ বিবাহৰ তাৰিখ পিছুৱাই দিয়া হৈছে।’ সেয়া যি কি নহওক, অনুৰাগীৰ মাজত এতিয়া তীব্ৰ কৌতুহলে ক্ৰিয়া কৰা দেখা গৈছে। প্ৰিয় ৰণবীৰ-আলিয়াক দৰা-কইনা ৰূপত চাবলৈ বিচাৰিছে অনুৰাগীয়ে। এতিয়া অনুৰাগীৰ আশা-আকাংক্ষাক ৰণবীৰ-আলিয়াই কেতিয়া পূৰ কৰে সেয়াহে হ’ব লক্ষ্যণীয়!