৫ মে’২০২৫: INDIA । ভাৰত আৰু পাকিস্তানৰ মাজত শেহতীয়াকৈ বৃদ্ধি পোৱা উত্তেজনাৰ প্ৰেক্ষাপটত আজি ৰাষ্ট্ৰসংঘৰ নিৰাপত্তা পৰিষদৰ মজিয়াত এক গুৰুত্বপূৰ্ণ ৰুদ্ধদ্বাৰ বৈঠক অনুষ্ঠিত হ’ব। ৫ মে’ সোমবাৰে সন্ধিয়া অনুষ্ঠিত হ’ব লগা এই বৈঠকত অঞ্চলটোৰ স্থিতি লৈ গভীৰ আলোচনা হ’ব বুলি আশা কৰা হৈছে।
উল্লেখযোগ্য যে, পাকিস্তানে এই বৈঠক আহ্বান কৰাৰ দাবী জনাইছিল আৰু গ্ৰীচে মে’ মাহৰ বাবে নিৰাপত্তা পৰিষদৰ সভাপতিত্ব গ্ৰহণ কৰি উক্ত আহ্বানত সন্মতি জনায়। গ্ৰীচৰ স্থায়ী প্ৰতিনিধি তথা চলিত মাহৰ পৰিষদৰ সভাপতি ইভানজেলছ চেকেৰিছে এক বিবৃতিত কয়, “আমি সকলো ধৰণৰ সন্ত্ৰাসবাদৰ কড়া নিন্দা কৰোঁ। একে সময়তে অঞ্চলটোৰ উদ্বেগজনক পৰিস্থিতি লৈ আমি গভীৰভাৱে চিন্তিত।”
পাকিস্তান বৰ্তমান নিৰাপত্তা পৰিষদৰ অস্থায়ী সদস্যৰূপে কাৰ্যৰত আছে। সেই পৰিপ্ৰেক্ষিতত, এই দেশখনে ৰুদ্ধদ্বাৰ বৈঠকৰ অনুৰোধ জনাইছিল, য’ত তেওঁলোকে ভাৰতৰ ওপৰত বিভিন্ন অভিযোগ উত্থাপন কৰিব বুলি অনুমান কৰা হৈছে। আনহাতে, ভাৰতেও সন্ত্ৰাসবাদ আৰু সীমান্ত লঙ্ঘনৰ বিষয়বস্তু উত্থাপন কৰাৰ সম্ভাৱনা আছে।
নিৰাপত্তা পৰিষদত ১৫ জন সদস্য আছে, যাৰ ভিতৰত ৫ জন স্থায়ী সদস্য—আমেৰিকা, ৰাছিয়া, চীন, ফ্ৰান্স আৰু ব্ৰিটেইন—ভেটোৰ অধিকাৰ প্ৰাপ্ত। অস্থায়ী সদস্যৰ ভিতৰত এইবাৰ আছে: পাকিস্তান, গ্ৰীচ, ডেনমাৰ্ক, আলজেৰিয়া, গায়ানা, পানামা, দক্ষিণ কোৰিয়া, স্লোভেনিয়া, ছিয়েৰা লিয়ন আৰু ছোমালিয়া।
যিহেতু বৈঠক ৰুদ্ধদ্বাৰ, গতিকে আনুষ্ঠানিক প্ৰস্তাৱ বা সিদ্ধান্ত গ্ৰহণৰ সম্ভাৱনা কম। তথাপি, এই বৈঠক দুয়ো পক্ষৰ বাবে আন্তঃৰাষ্ট্ৰীয় মঞ্চত নিজৰ স্থিতি আৰু বক্তব্য প্ৰকাশ কৰাৰ এক গুৰুত্বপূৰ্ণ সুযোগ হিচাপে বিবেচিত হৈছে।
