৫ আগষ্ট আজি বিয়লি ৩ বাজি ৫৫ মিনিটত হঠাতে অহা এজাক তীব্ৰবেগী ধূলি বতাহে অতিষ্ঠ কৰি যায় সমগ্ৰ বোকাজানবাসী ৰাইজক। প্ৰায় ২০ মিনিট ধৰি চলা এই ধূলিৰ বতাহ জাকে বোকাজানৰ সমগ্ৰ পৰিবেশ ধূলিময় কৰি তোলাৰ লগতে পথেৰে খোজকাঢ়ি যোৱা পথচাৰীক আৰু ব‌্যৱসায়িক প্ৰতিষ্ঠানৰ ক্ৰেতা-বিক্ৰেতা সকলক অতিষ্ঠ কৰাৰ লগতে পথেৰে যোৱা লোকসকলে চকু মেলিব নোৱাৰা অৱস্থাৰ সন্মুখীন হয়। এই ধূলিৰ বতাহ জাকে বোকাজানৰ বহু কেইখন ব্যৱসায়িক প্ৰতিষ্ঠান আৰু বহু সংখ্যক ঘৰৰ টিনপাত উৰুৱাই নিয়াৰ ফলত ব্যৱসায়িক প্ৰতিষ্ঠানৰ সা-সামগ্ৰী সমূহ ধূলিৰে পুতি পেলায়।

লক্ষ্যনীয় কথা যে দীৰ্ঘদিন ধৰি পাহাৰীয়া জিলা কাৰ্বি আংলঙৰ লগতে বোকাজান মহকুমাত বৰষুণ নোহোৱাৰ ফলত ধূলিৰ প্ৰকোপ বৃদ্ধি পোৱাৰ লগতে মহকুমাটোৰ বিভিন্ন স্থানত শালী খেতিৰ পথাৰ সমূহতো চিৰালফাঁট মেলিছে। আনহাতে  বোকাজানস্থিত বিলাতী মাটি কাৰখানাৰ পৰা অহৰহ নিৰ্গত ধূলি প্ৰদূষণে বোকাজান বাসীক হাৰাশাস্তি কৰি আহিছে যদিও আজি পৰ্যন্ত বিলাতী মাটি কাৰখানাৰ কৰ্তৃপক্ষই ধূলি প্ৰদূষণ নিয়ন্ত্ৰণ কৰাৰ বিপৰীতে ধূমুহা বতাহৰ সুযোগ গ্ৰহণ কৰি অত্যধিক হাৰত বোকাজান বিলাতী মাটি কাৰখানাৰ পৰা ধূলি এৰি দি আহিছে । যাৰ ফলত বোকাজান অঞ্চলৰ বহু সংখ্যক লোকে চকু ৰোগ, হাওঁফাওঁ জনিত ৰোগ , চৰ্ম ৰোগত ভোগাৰ লগতে বহু লোকৰ ঘৰৰ টিনপাত ,আচ-বাব আদিও নষ্ট হৈ আহিছে।

অসমৰ ৰজাঘৰীয়া চাৰিসত্ৰৰ অন্যতম মাজুলীৰ শ্ৰীশ্ৰী গড়মূৰ সত্ৰৰ ৰজাদিনীয়া আপুৰুগীয়া সম্পদৰাজি সংৰক্ষণ কৰি ৰখা মাজুলীৰ প্ৰথমটো দুই মহলাযুক্ত “পীতাম্বৰদেৱ গোস্বামী স্মৃতি ভৱন“ৰ বেৰ ভাঙি পৰাত স্মৃতি ভৱনটোত সযতনে ৰখা সম্পদ সমূহৰ প্ৰতি ভাবুকি আহি পৰিছে ৷ ১৯৫৬ চনত স্থাপিত হোৱা আহোম ৰজা জয়ধ্বজ সিংহৰ পৃষ্ঠপোষকতাত প্ৰতিষ্ঠা হোৱা সত্ৰখনলৈ বহু আপুৰুগীয়া সম্পদ দান দিছিল ৷ সেই সমূহ সম্পদ মানৰ আক্ৰমণকে ধৰি নানান প্ৰাকৃতিক দুৰ্যোগৰ মুখামুখি হৈয়ো সত্ৰই এই আপুৰুগীয়া সম্পদ সযতনে ৰাখিছিল ৷ প্ৰৱাদ পুৰুষ সত্ৰাধিকাৰ , বিপ্লৱী ধৰ্মগুৰু শ্ৰীশ্ৰী পীতাম্বৰদেৱ গোস্বামীৰ পদৰেণুৰে ৰঞ্জিত সত্ৰখনত তেখেতৰ দূৰদৰ্শী চিন্তাৰ ফলত প্ৰায় ডেৰশ বছৰৰ পূৰ্বেই সত্ৰাধিকাৰ গৰাকীয়ে কাঠেৰে এটা দুই মহলা যুক্ত গৃহ নিৰ্মাণ কৰিছিল ৷ শতবৰ্ষ অতিক্ৰম কৰা গৃহটো অসম চৰকাৰৰ প্ৰত্নতাত্বিক বিভাগৰ অনুদানেৰে মেৰামতি সহ নৱীকৰণ কৰা হৈছিল আৰু উক্ত শতবৰ্ষ অতিক্ৰম কৰা গৃহটো “শ্ৰীশ্ৰীপীতাম্বৰদেৱ গোস্বামী স্মৃতি ভৱন”নামেৰে নামকৰণ কৰি ২০১২ বৰ্ষৰ ২৮ জানুৱাৰীত সেই সময়ৰ অসম চৰকাৰৰ জলসম্পদ মন্ত্ৰী ৰাজীৱ লোচন পেগুৱে উদ্ধোধন কৰিছিল ৷ প্ৰায় ন বছৰ হওঁতেই ঐতিহাসিক স্মৃতি ভৱনটোৰ সন্মুখ বেৰ খহি পৰাত সত্ৰখনত ভৱনটোত সংৰক্ষিত হৈ থকা আপুৰুগীয়া সম্পদখিনিক লৈ চিন্তিত হৈ পৰে ৷ ৫ আগষ্টৰ পূৱাৰ ভাগতে সংঘটিত এই অনাকাংক্ষিত ঘটনাটোত সত্ৰাধিকাৰ পৰমানন্দদেৱ গোস্বামী কিংকৰ্তব্যবিমূঢ় হৈ পৰে ৷ সম্পদ সমূহৰ সুৰক্ষাক লৈ চিন্তিত হৈ পৰা সত্ৰাধিকাৰ গৰাকীয়ে বৈষ্ণৱ সকলক গোটাই উন্মুক্ত হৈ পৰা গৃহৰ পৰা সম্পদ সমূহ অন্য এটা গৃহলৈ স্থানান্তৰ কৰে ৷ এই সম্পৰ্কে সত্ৰাধিকাৰ গৰাকীয়ে জিলা প্ৰশাসন আৰু আৰক্ষী প্ৰশাসনক অৱগত কৰি সম্পদ সমূহ সুৰক্ষাৰ বিষয়ে ব্যৱস্থা গ্ৰহণ কৰিবলৈ আহবান জনায় ৷ ঘটনাৰ খবৰ পাই জিলা প্ৰশাসনৰ হৈ সদৰ মহকুমাধিপতি ধৃতিমান দাস সত্ৰত উপস্থিত হৈ পৰিস্থিতিৰ বুজ লৈ প্ৰশাসনৰ তৰফৰ পৰা সহায়ৰ হাত আগবঢ়োৱাৰ আশ্বাস প্ৰদান কৰে ৷ ইফালে গৃহ নিৰ্মাণত হোৱা বিসংগতিৰ এক তদন্ত বিচাৰি সত্ৰাধিকাৰ গৰাকীয়ে জিলা উপায়ুক্তক এখন আবেদন অৰ্পণ কৰে ৷

উল্লেখ্য যে , সত্ৰৰ সম্পদ সমূহ ৰাখিবৰ বাবে এটা যাদুঘৰ নিৰ্মাণ কৰিছিল যদিও উক্ত গৃহ আপুৰুগীয়া সম্পদ সমূহ ৰাখিবৰ বাবে উপযুক্ত নোহোৱাত স্মৃতি ভৱনতে সম্পদ সমূহ ৰাখি দৰ্শনাৰ্থীয়ে চোৱাৰ ব্যৱস্থা কৰিছিল ৷ কিন্তু এতিয়া হঠাৎ স্মৃতি ভৱনটো ভাঙি যোৱাত সম্পদ সমূহৰ সুৰক্ষাক লৈ চিন্তিত হৈ পৰা সত্ৰাধিকাৰ সহ বৈষ্ণৱ সকলে চৰকাৰে এই ক্ষেত্ৰত তৎপৰতা গ্ৰহণ কৰি অত্যাধুনিক এটা যাদুঘৰ নিৰ্মাণ কৰি দিয়াৰ লগতে প্ৰৱাদ পুৰুষ গৰাকীৰ স্মৃতি ভৱনটোও সংৰক্ষণৰ ব্যৱস্থা কৰিবলৈ চৰকাৰক আহবান জনাইছে ৷ উল্লেখ যে , সত্ৰৰ আপুৰুগীয়া সম্পদ সমূহৰ ভিতৰত আহোম ৰজাৰ মহামন্ত্ৰী আতন বুঢ়াগোহাঁইয়ে সত্ৰলৈ দান কৰা ৰূপৰ শৰাই , ৰূপৰ বন কৰা ভৃঙ্গাৰ , ৰূপৰ কলহ , কাৰুকাৰ্য খচিত বাচন-বৰ্তন , হাতী দাঁত আৰু ইয়াৰে বনোৱা অলংকাৰ , আহোম যুগৰ বৰটোপ , সাঁচিপতীয়া পুথিকে ধৰি বহু সংখ্যক আপুৰুগীয়া সম্পদ সত্ৰখনত সংৰক্ষিত হৈ আছে ৷

গুৰু তেগ বাহাদুৰ মন্দিৰৰ সন্মুখত থকা ৬খনকৈ পান-তামুল, চাহৰ দোকানবোৰ ধুবুৰী প্ৰশাসনৰ সহযোগত ধুবুৰী পৌৰসভাই উচ্ছেদ কৰা পৰিলক্ষিত হয়। জানিব পৰামতে পৌৰসভাই বহু দিনৰ পৰা জাননী দিয়াৰ পিছতো দোকানীবোৰ কোনো গুৰুত্ব প্ৰদান নকৰাত আজি জিলা প্ৰশাসনৰ সহযোগত ধুবুৰী পৌৰসভাই উচ্ছেদ অভিযান চলায়। উক্ত পান-তামুল চাহৰ দোকানীবোৰ প্ৰায় ২০বছৰৰ পৰা উক্ত ঠাইত দোকান কৰি আছে যদিও পৌৰসভাক কোনোধৰণৰ কৰ নিদিয়াকৈ অবৈধ ভাবে দোকান খুলি ব্যৱসায় কৰা বুলি আজি ধুবুৰী জিলা উপায়ুক্ত অন্বামুথন এম পি জানিবলৈ দিয়ে। উপায়ুক্ত গৰাকীয়ে সাংবাদিকৰ আগত কয় যে, ধুবুৰীত যিমান অবৈধ দোকান পোহাৰ পৌৰসভাৰ ভূমি দখল কৰি ব্যৱসায় চলাই আছে সেই সকলোবোৰ দোকান আজিৰে পৰা উচ্ছেদ কৰা হ’ব বুলি জানিবলৈ দিয়ে। আনপিনে,আজি ধুবুৰী জিলা উপায়ুক্তই চহৰখনৰ ১ নং ৱাৰ্ডত থকা তেতুলতলাত নিজে উপস্থিত হৈ অবৈধভাবে পৌৰসভাৰ ভুমিত চাহ আৰু পান-তামুলৰ দোকানী সমুহক দিলে সাৱধান বানী। অহাকালিৰ ভিতৰত চৰকাৰী ভুমি খালি কৰি নিদিলে প্ৰশাসনৰ সহযোগত পৌৰসভাই উচ্ছেদ কৰাৰ বাধ্য হব বুলি উপায়ুক্ত গৰাকীয়ে জানিবলৈ দিয়ে। জানিব পৰামতে তেতুলতলাত বিউটি আঁচনিৰ অধীনত উক্ত ঠাইখনৰ কাম চলি থকা সময়তে অবৈধ ভাবে দখল কৰা চৰকাৰী ভুমি বেদখলৰ বাবে বহুবাৰ জাননী দিয়া সত্বেও দোকানীয়ে কোনোধৰণৰ গুৰুত্ব প্ৰদান নকৰাত আজি সাৱধান কৰাৰ বাধ্য হোৱা পৰিলক্ষিত হয় উপায়ুক্ত এন্বামুথন এম পি ক। আনপিনে গুৰু তেগ বাহাদুৰ মন্দিৰৰ সন্মুখতো থকা ৬খনকৈ পান-তামুল, চাহৰ দোকান ভাঙি চুৰ মাৰ কৰে বুলি জানিব পৰা গৈছে।

 ওদালগুৰি জিলাৰ ভেৰগাঁও মহকুমাৰ অন্তৰ্গত কলাইগাঁও বিধানসভা সমষ্টিৰ ভূঞাখাট গাঁৱৰ টংলা মহলীয়াপাৰা পথৰ পৰা গনকপাৰা চুবা হৈ হাতিবান্ধা, নিজ ভূঞাখাট সংযোগী পথটি কেইবাবছৰ ধৰি বিধ্বস্ত অৱস্থাতেই আছে যাৰ ফলত বিশেষকৈ ভূঞাখাট গাঁৱৰ গনকপাৰা চুবাৰ ৰাইজে ভুগিছে যমৰ যাতনা। বাৰিষা আহাৰ লগে লগে পথটিৰে গাড়ি মতৰ দুৰৰে কথা মানুহে খোজ কাঢ়ি অহা যোৱা কৰাও তান হৈ পৰে। শুকুৰবাৰে ভূঞাখাট গাঁৱৰ গনকপাৰা চুবাৰ কেইজনমান যুৱক লগ হৈ‌ পথটিৰ কিছু পৰিমাণে মেৰামতি কৰিবলৈ ওলাই আহি পথটিৰ মেৰামতি কৰে। এনে ক্ষেত্ৰত এই গুৰুত্বপূৰ্ণ পথটিৰ মেৰামতিৰ বাবে চৰকাৰক দাবী জনাই ভূঞাখাট গাঁৱৰ গনকপাৰা চুবাৰ ৰাইজে।

দীৰ্ঘ দিনৰ পাছত স্বাধীন  ভাৰতত উত্তৰ পূৰ্বাঞ্চলৰ  পৰা নাথ- যোগী সম্প্ৰদায়ৰ লোক ভাৰতৰ কেন্দ্ৰীয় মন্ত্ৰীসভাৰ পৰা বঞ্চিত,  স্বাধীনতাৰ ৭৫ বছৰ অতিক্ৰমৰ শেষত উত্তৰ পূৰ্বাঞ্চলৰ ত্ৰিপুৰাৰ  পশ্চিম  ত্ৰিপুৰা লোকসভা সমষ্টিৰ পৰা ১৭ তম্ লোকসভালৈ নিৰ্বাচিত হোৱা প্ৰতিমা ভৌমিকক প্ৰধানমন্ত্ৰী মোদীয়ে ভাৰতৰ কেন্দ্ৰীয় মন্ত্ৰীসভাত স্হান দি ” সামাজিক ন্যায় আৰু সৱলিকৰণ” বিভাগৰ ৰাজ্যিক মন্ত্ৰী হিচাবে  নিযুক্তি দিয়াত উৎফুল্লিত হৈ পৰিছে ভাৰতৰ বিভিন্ন প্ৰান্তত থকা  ‘নাথ -যোগী ‘ সকলৰ লগতে অসম আৰু উত্তৰ পূৰ্বাঞ্চলৰ ‘নাথ- যোগী ‘সকল ।

‘অখিল  ভাৰতীয় নাথ সমাজ ‘ , অসম -বংগ  নাথ- যোগী সন্মিলনী , ত্ৰিপুৰা নাথ- যোগী সমাজ  , অসম প্ৰাদেশিক যোগী সন্মিলনীৰ লগতে অসমৰ বিভিন্ন স্হানত বসবাস কৰা প্ৰায় ৪৩ লাখ নাথ- যোগীৰ বিভিন্ন সংগঠন  , ব্যক্তি বিশেষ উৎফুল্লিত হৈ পৰিছে । এই কামৰ বাবে প্ৰধান মন্ত্ৰীক ধন্যবাদ জনাইছে । অসমৰ পৰাও দুই লাখ  পোষ্ট কাৰ্ডত প্ৰতিমা ভৌমিকক মন্ত্ৰীত্ব দিয়াৰ বাবে প্ৰধানমন্ত্ৰী মোদীলৈ কৃতজ্ঞতা জ্ঞাপন কৰি পত্ৰ প্ৰেৰনৰ সিদ্ধান্ত গ্ৰহন কৰিছে । অসম প্ৰাদেশিক যোগী সন্মিলনীৰ সভাপতি ড. দিনেশ কাকতি নাথ আৰু সম্পাদক অজিত নাথে  জানিব দিয়া মতে  বৰাক- আৰু ব্ৰহ্মপুত্ৰ উপত্যকাৰ সকলো জিলাত থকা নাথ- যোগী সম্প্ৰদায়ৰ তৰফৰ পৰা প্ৰধানমন্ত্ৰী মোদীলৈ পত্ৰ প্ৰেৰণৰ সিদ্ধান্ত লৈ প্ৰায় ৭৫ হাজাৰ পোষ্টকাৰ্ড ইতিমধ্যে প্ৰেৰন কৰা হৈছে আৰু বাকী সকলো অতিসোনকালে পঠোৱা হব বুলি মন্তব্য কৰে ।

নগাওঁ জিলা যোগী সন্মিলনীৰ সভাপতি ঘনশ্যাম নাথ আৰু সম্পাদক পুস্পেন্দ্ৰ নাথে জনোৱা মতে নগাঁও জিলাত  নতুনকৈ ৩০ খন আঞ্চলিক সমিতি আৰু ১১০ প্ৰাথমিক গঠন কৰা হৈছে ।এই সমূহ সমিতিৰ জৰিয়তে দুই হাজাৰ পোষ্টকাৰ্ড প্ৰধানমন্ত্ৰী লৈ পঠোৱাৰ ব্যবস্থা কৰা হৈছে ।

সদৌ অসম বেচৰকাৰী নৈশ বাছ চালক সকলে গুৱাহাটীৰ ISBTত এখন সবল কমিটি গঠন কৰে। সদৌ অসম বেচৰকাৰী দিবা নৈশ বাছ চালক সন্থা নামেৰে বাছ চালক সকলে এটা সংগঠনৰ জন্ম দিয়ে। চালকসকলৰ অভাৱ অভিযোগ, শোষণ, প্ৰাপ্য মজুৰি আৰু দৰমহা আদিৰ এক সমাধানৰ বাবেই এই সংগঠনৰ জন্ম।

অনাগত দিনত বাছৰ মালিকসকলক সাঙুৰি এক বৃহৎ সংগঠন হিচাপে গঢ়ি তোলাৰ এক ইংগিত দি ৰূপম দত্তই কয় যে ‘ মালিক সকল আমাৰ ভগৱান, আমাৰ এই যুঁজ মালিক সকলৰ লগত নহয়, এই যুঁজ আমাৰ নিজৰ লগত।’
ৰূপম দত্তক সম্পাদক, মনোজ হালৈক সভাপতি হিচাপে কাৰ্যভাৰ দি উক্ত কমিটি গঠন কৰা হৈছে।

পোন প্ৰথম বাৰৰ বাবে অসমত বেচৰকাৰী দিবা নৈশ বাছ চালকসকল একগোট হৈ এক গঠনমূলক ভাবে এই সংগঠনৰ জন্ম দিয়া হৈছে। এই সমগ্ৰ প্ৰক্ৰিয়াৰ আঁত ধৰিছিল লাইফ অৱ এ ড্ৰাইভাৰ ৰ নামৰ কিতাপখনৰ লেখক ৰূপম দত্তই।

ৰাজ্যৰ বিভিন্ন অঞ্চলত চুলাই মদৰ ভাটীত বিয়লিৰ পৰা নিশালৈ হোৱা সুৰাপায়ীৰ ভীৰ আৰু এনে ভীৰৰ পৰাও  ক’ভিডৰ সংক্ৰমণ হয় বুলি মুখ্যমন্ত্ৰী ডঃ হিমন্ত বিশ্ব শৰ্মা আৰু কেবাজনো মন্ত্ৰীয়ে ঘোষণা কৰাৰ পাছত আৱকাৰী বিভাগে ৰাজ্যজুৰি চুলাই মদৰ ভাটীত অভিযান অভিযান চলাই আছে । আনহাতে ৰাজ্যৰ  আন আন কেবাখনো জিলাৰ দৰে   আবকাৰী বিভাগৰ  কামৰূপ মহানগৰ জিলাৰ আবকাৰী অধীক্ষক মানৱী দাস আৰু উপ আৱকাৰী অধীক্ষক মৌচুমী কোঁৱৰৰ নিৰ্দেশত  সোণাপুৰ আৰু  গুৱাহাটী সদৰ আৱকাৰী চক্ৰই  আজি  সোণাপুৰ আৰক্ষী থানাৰ সহযোগত অসম মেঘালয় সীমান্তৰ তামুলীকুছিত চুলাই মদ প্ৰস্তুত কৰা ভাটীত এক বৃহৎ  অভিযান চলায় ।  অভিযানত    ২৫০ লিটাৰ চুলাই মদ , ১০,৫০০  কেজি চুলাই মদ প্ৰস্তুত কাৰ্যত ব্যৱহৃত পাছ  আৰু ১৫ টা  বিভিন্ন সা – সঁজুলি জব্দ কৰা হয়  ।অৱশ্যে অভিযানৰ উমান পায়ে চুলাই মদ প্ৰস্তুত কার্যৰ লগত জড়িত দুস্কৃতিকাৰী সকল  পাহাৰীয়া অঞ্চল হোৱাৰ সুযোগ লৈ কৌশলৰে পলাই যাবলৈ সক্ষম হয় ।