যোৰহাট জিলাৰ টীয়ক ৰাজহচক্ৰৰ অন্তৰ্গত ভূঞাহাটৰ বৈছাহাবি পথ আৰু ধোদৰ আলি সংযোগী বাইলুং গাওঁ -হাতীমুৰীয়া  পথটো এতিয়া জাঁজী নদীৰ খহনীয়াৰ কৱলত পৰি নিচিহ্ন হৈছে। উল্লেখযোগ্য যে, পথটোৰ হাতীমুৰীয়াত ২০১১ চনতে খহনীয়াৰ সৃষ্টি হৈছিল। পৰবৰ্তী সময়ত পথটোৰ খহনীয়াগ্ৰস্ত অংশ মেৰামতিৰ ব্যৱস্থা কৰা হৈছিল যদিও  উক্ত স্থানৰ চাহবাগনৰ নলাৰ পানী নদীলৈ নিগৰি নিগৰি পৰি থকাত পথটো দুদিনৰ পূৰ্বে নদীৰ গৰ্ভত জাহ যায়। সম্প্ৰতি পথটো  পিএমজিএছ ৱাই আঁচনিৰ অধীনত নিৰ্মান কৰা হৈ আছিল আৰু নিৰ্মান কাৰ্য চলি থকাৰ সময়তে পথটোৰ উক্ত অংশ প্ৰৱল বৰষুণৰ ফলত নদীৰ গৰ্ভলৈ খহি পৰে। ফলত ১৫ /২০ খন গাঁৱৰ জনসাধাৰণৰ আমগুৰি নগৰলৈ যাতায়তৰ চমু পথ হিচাপে ব্যৱহৃত পথটো সম্পূৰ্ণ বন্ধ হৈ পৰাত স্থানীয় ৰাইজে সংশিষ্ট পক্ষক আবেদন কৰাত কিছুদিন পূৰ্বে পথটো ঠিকাদাৰে যাতায়তৰ উপযোগী কৰি তুলিছিল। পথটো উপযোগী কৰাৰ পিছত যোৱা দুদিন ধৰি হোৱা বৰষুণৰ ফলত আজি পুৱাৰ ভাগত পথটো পুনৰ প্ৰায় সম্পূৰ্ণ ৰূপে খহি পৰাত এতিয়া ৰাইজ পনবন্দী হৈ পৰিছে। এতিয়া  স্থানীয় ৰাইজে তৎকালেই পথটোৰ খহনীয়া ৰোধৰ ব্যৱস্থা গ্ৰহণ কৰি পথটো পুণৰ যাতায়তৰ উপযোগী কৰি তুলিবলৈ প্ৰশাসনক দাবী জনাইছে।

বৃটিছৰ গুলীত মৃত্যুবৰণ কৰা ঢেকিয়াজুলিৰ শ্বহীদ দয়াল দাস পানীকাৰ নামত অসম চৰকাৰে আদিবাসী সকলৰ বাবে  ঘোষনা কৰা স্বনিয়োজন আচঁনিৰ ধন  আজিও নাপালে ওদালগুৰি জিলাৰ যুবক যুবতী সকলে । উল্লেখযোগ্য যে ঢেকিয়াজুলিত বৃটিছৰ গুলীত প্ৰানহুতি দিয়া শ্বহীদ গৰাকীৰ নামত অসম চৰকাৰে প্ৰতি বছৰে ২৫ হাজাৰকৈ  টকা শিক্ষিত নিবনুৱা যুৱক যুৱতী সকলক আগবঢ়াই আহিছে ।কিন্তু  এই স্বনিয়োজনৰ এককালীন সাহাৰ্য্য আজিও পাবলৈ সক্ষম নহল ওদালগুৰি জিলাৰ যুবক যুবতী সকলে । অক্টোবৰ মাহতে এই স্বনিয়োজন আচঁনিৰ বাবে শিক্ষিত নিবনুৱা যুৱক যুৱতী সকলৰ পৰা আবেন গ্ৰহণ কৰা হৈছিল ।সেই অনুসৰি ওদালগুৰি জিলাৰ শিক্ষিত নিবনুৱা যুৱক যুৱতী সকলেও অনলাইনযোগে প্ৰ-পএ জমা দিছিল । জানিব পৰা মতে ৰাজ্যখনৰ বিভিন্ন জিলাৰ এই স্বনিয়োজনৰ আচঁনৰ বাচনি তালিকা খন  প্ৰকাশ পোৱাৰ লগতে বিটিএডিৰ  অইন তিনিখন জিলাতো বাচনি তালিকা খন প্ৰকাশ পোৱাৰ লগতে দয়াল দাস পানীকা স্বনিয়োজন আচঁনিৰ ধন পাবলৈ সক্ষম হৈছে ।কিন্তু ওদালগুৰি জিলাত এই ধন শিক্ষিত নিবনুৱা যুৱক যুৱতী সকলে পোৱাটো দূৰৈৰ কথা  তালিকা খনে আজিলৈকে প্ৰকাশ নহল ।তদুপৰি আচঁনি খনৰ নামত ঘোষনা কৰা ২৫ হাজাৰ টকাৰ বিপৰীতে এইবেলি ১২ হাজাৰ ৫০০ টকাকৈহে  দিয়া বুলি অভিযোগ উথাপিত হৈছে। চৰকাৰৰ ঘোষিত স্বনিয়োজনৰ  ২৫ হাজাৰ টকাৰ  আচঁনিৰ পৰা এইবেলি ১২ হাজাৰ ৫০০ টকা কলৈ গল বুলি নিবনুৱা যুৱক যুৱতী সকলে প্ৰশ্ন উত্থাপন কৰিছে ।সেয়েহে অতি শীঘ্ৰে ওদালগুৰি জিলাৰ দয়াল দাস পানীকা স্বনিয়োজন আচঁনিৰ বাচনি তালিকা খন প্ৰকাশ কৰি চৰকাৰে ঘোষনা কৰা  ২৫ হাজাৰকৈ টকা শিক্ষিত নিবনুৱা যুৱক যুৱতী সকলক দিবলৈ চৰকাৰক দাবী জনাইছে ।

কৈৱৰ্ত্ত নৱ জাগৰণ সাহিত্য আৰু সামাজিক মঞ্চ অসমৰ সৌজন্যত আজি ঢকুৱাখনাৰ বাঁহপৰাৰ ড০ বি আৰ আম্বেদকাৰ উচ্চ মাধ্যমিক বিদ্যালয়ৰ প্ৰাংগণত গুৱাহাটীৰ পূৰ্বায়ণ প্ৰকাশনে প্ৰকাশ কৰা ঢকুৱাখনাৰ এগৰাকী প্ৰতিভাবান লেখক পৰেশ দাসৰ ‘শব্দই কথা কয়’ গ্ৰন্থৰ উন্মোচন কৰা হয়।গ্ৰন্থখনিৰ উন্মোচন কৰে লেখক,সাংবাদিক ৰাজীৱ বৰুৱাই।এই সভাতেই মেট্ৰিকত সুখ্যাতিৰে উত্তীৰ্ণ হোৱা-বিদিশা দাস,প্ৰীতিশ প্ৰীতম কাশ্যপ দাস,ধৰণীকান্ত দাসক সম্বৰ্ধনা জনোৱা হয়।ইফালে সামাজিক আৰু সাংস্কৃতিক জীৱনলৈ আগবঢ়োৱা অৱদানৰ শিল্পী কমল দাস আৰু যুৱ উদ্যোগী জিতু মণি দাসকো সম্বৰ্ধনা জনোৱা হয়।এই গ্ৰন্থ উন্মোচনী সভাত উপস্থিত থাকি-কৈৱৰ্ত নৱজাগৰণ সাহিত্য আৰু সামাজিক মঞ্চ,অসম’ৰ মুখ্য উপদেষ্টা ভদ্ৰেশ্বৰ দাস,মুখ্য প্ৰশাসক প্ৰণৱ দাস,মডাৰেটৰ নয়নমণি দাস,শিক্ষাবিদ-ৰমা হাজৰিকা, অনন্ত দাস,তুলশী প্ৰভা দাস শিল্পী-কমল দাস,মিনু বড়া দাস,কৈৱৰ্ত্ত যুৱ ছাত্ৰ সন্থাৰ,মাজুলী জিলাৰ সম্পাদক সঞ্জীৱ মেধি,আৰু ঢকুৱাখনা মহাবিদ্যালয়ৰ অধ্যাপক-টবেন্দ্ৰ দাস আদিয়ে বক্তব্য ৰাখে।

স্বাধীনতাৰ ৭৪ বছৰৰ পিছতো এনে এক পথ আছে য’ত একেৰাহে দুখনকৈ বাঁহৰ দলং আছে। বিটি আৰ ওদালগুৰি জিলাৰ  ৩১নং খৈৰাবাৰী পৰিষদীয় সমষ্টিৰ অন্তৰ্গত দাৰোগাখাট গাঁ‌ৱৰ পৰা কুকুৰাকাটা মহলিয়াপাৰা-ঘাই পথলৈ সংযোগ হোৱা পথছোৱাৰ দুৰৱস্থাই অঞ্চলবাসীক প্ৰতিবছৰে জলা-কলা খোৱাই আহিছে।এখন চাৰিচকীয়া বাহন আনিব নোৱাৰা পথছোৱা পকি কৰণৰ কথা বাদেই  ৰাইজে গাঁ‌থীৰ ধন খৰছ কৰি প্ৰতিবছৰে বাঁহেৰে দলং নিৰ্মাণ কৰি অহা যোৱা কৰিবলগীয়া হয়।অতি দুখৰ বিষয় কোনোদিনেই এখন চাৰিচকীয়া বাহন আনিব নোৱাৰা পথছোৱা বাৰিষা আহিলে পথছোৱা গৰু অনা বাটলৈ পৰিণত হয়।

মডেল বিটিচিৰ শাসক হাগ্ৰামা মহিলাৰী চৰকাৰৰ অধিনত ৩১ নং খৈৰাবাৰী পৰিষদীয় সমষ্টিত ১৫ বছৰে দখলত থকা বিটিচি কাৰ্যবাহী সদস্য লৌমশ্ৰাও দৈমাৰীৰ দিনত ৰাইজে কেইবাবাৰু পথ পকীকৰণৰ বাবে আবেদন দাখিল কৰিছিল যদিও প্ৰায় পাঁ‌চখনকৈ গাঁ‌ৱৰ মানুহ অহা যোৱা কৰা একমাত্ৰ পথছোৱা পকীকৰণৰ কথা বাদেই দুখনকৈ বাঁ‌হৰ দলং থকাৰ তৎস্বত্তেও পথছোৱা কোনোধৰণে সুচল কৰাৰ ব্যৱস্থা কৰি নিদিলে।যাৰ ফলত অঞ্চলবাসীৰ যাতায়তৰ ব্যৱস্থা যমৰ যাতনাতকৈ কোনো গুনে কম নহয়।সেয়েহে ৰাইজে পুনৰ বাৰ পৰিৱৰ্তনকামী চৰকাৰলৈ পথ সুচল কৰাৰ আহ্বান জনাইছে।

ওদালগুৰি জিলাৰ ভেৰগাঁও মহকুমাৰ অন্তৰ্গত খৈৰাবাৰী ষ্টেচনত প্ৰায় এক বছৰ ধৰি ট্ৰেইন নৰখোৱাকলৈ অসন্তুষ্ট হৈ পৰিছে বৃহত্তৰ খৈৰাবাৰী অঞ্চলৰ বিভিন্ন দল সংগঠনৰ লগতে ব্যৱসায়ী আৰু স্হানীয় ৰাইজ।
খৈৰাবাৰী ষ্টেচনৰ দৈনিক শ শ লোক আহ যাহ কৰে আনফালে খৈৰাবাৰী ব্যৱসায়ীক প্ৰধান অঞ্চল হোৱা বাবে ব্যৱসায়ীক লোক সকল অকল ট্ৰেইনৰ যাতায়তৰ অসুবিধাৰ বাবেই লোকচানৰ সন্মুখীন হ’বলগীয়া হৈছে। বিটিচি নিৰ্বাচন আৰু বিধানসভাৰ নিৰ্বাচনৰ সময়ত ৰাইজৰ মাজত ভোট ভিক্ষা কৰিবলৈ আহি অসমৰ বিভিন্ন নেটা মন্ত্ৰীয়ে খৈৰাবাৰী ষ্টেচনত ট্ৰেইন ৰখাব বুলি ৰাইজৰ আগত প্ৰতিশ্ৰুতিৰ বন্যা বোবাইছিল যদিও আজিলৈকে নিয়মীয়াকৈ খৈৰাবাৰী ষ্টেচনত ট্ৰেইন নৰখালে।সেয়ে অসন্তুষ্ট খৈৰাবাৰীৰ ৰাইজে চৰকাৰৰ বিৰুদ্ধে তীব্ৰ প্ৰতিবাদ সাব্যস্ত কৰিব বুলি জানিবলৈ দিয়ে। 
ৰবিবাৰে খৈৰাবাৰী ব্যৱসায়ীক সন্থাৰ সাধাৰণ সম্পাদক বাপী সৰকাৰ আৰু স্হানীয় ছাত্ৰ নেতা মাধৱ মন্দলকে ধৰি খৈৰাবাৰীৰ কেইবাজনো জ্যেষ্ঠ নাগৰিক লগ হৈ সংবাদ মাধ্যমৰ আগত চৰকাৰ আৰু ৰে’ল বিভাগক অতি কম সময়ৰ ভিতৰতে খৈৰাবাৰী ষ্টেচনত ট্ৰেইন ৰখোৱাৰ ব্যৱস্থা কৰিবলৈ অনুৰোধ জনাই আৰু পোন্ধৰ দিনৰ ভিতৰত খৈৰাবাৰীত ট্ৰেইন নৰখালে তীব্ৰ প্ৰতিবাদ সাব্যস্ত কৰিব বুলি জানিবলৈ দিয়ে।

পশ্চিম গুৱাহাটী সমষ্টিৰ এটা  গুৰুত্বপূৰ্ণ পথ হিচাপে পৰিচিত অসম – মেঘালয় সীমান্তৰ জীৱনৰেখা স্বৰূপ ৰাণীৰ পৰা শুকুৰবৰীয়া সংযোগী প্ৰায় ১০ কিঃমিঃ দৈৰ্ঘ্যৰ এন ই চি পথটো সম্প্ৰতি যাতায়তৰ অনুপযোগী হৈ পৰিছে । বিশেষকৈ পথটোৰ বহন ক্ষমতাৰ বিপৰীতে অধিক বহন ক্ষমতাযুক্ত ডাম্পাৰ – ট্ৰাক বা তেনে জাতীয় আন গধুৰ বাহন চলাচল কৰাৰ ফলত পথছোৱাৰ বহু অংশত সৰু বৰ পুখুৰী সদৃশ গাঁতৰ সৃষ্টি হৈ পৰিছে । আনকি  ৰাণী চকৰ পৰা মাত্ৰ এশ  মিটাৰ নিলগত পথচোৱা দুদিনমান  পূৰ্বে ভাগি গৈ বিতুমিন আৰু শিলৰ প্ৰলেপ এৰাই যোৱাত মাটি সমুহ ওলাই পৰিছে । সমান্তৰালভাৱে বিগত কেইদিনত মাজে সময়ে হৈ থকা বৰষুণৰ ফলত তাত বাৰিষাৰ পথাৰৰ দৰে বোকাময় হৈ পৰিছে । সম্প্ৰতি মৰণত শৰণ দিহে দুচকীয়া আৰু চাৰি চকীয়া বাহন সমূহ চলাচল কৰে আছে। কিন্তু শীঘ্ৰে পথছোৱা মেৰামতি বা পুনৰ্নিমান নকৰিলে যিকোনো মুহূৰ্ততে পথচোৱা দুচকীয়া – চাৰিচকীয়া  বাহনৰ চলাচল বন্ধ হৈ পৰাৰ আশংকা আছে । পথচোৱাৰ কেবাস্থানত  ইতিমধ্যে মাৰুতি কাৰ বা আন তেনেজাতীয় লঘু বাহনৰো তলভাগ তেনে গাঁতত লাগি ধৰে আৰু ঠেলিহে পাৰ কৰাব লগীয়া অৱস্থাৰ সৃষ্টি হৈছে ।

এই সন্দৰ্ভত অঞ্চলটোৰ সচেতন লোক সকলে জানিবলৈ দিয়া মতে ৰাণীৰ গাতে লগা মেঘালয়ৰ ৰি ভয় জিলাৰ জিৰাং সমষ্টিৰ অধীনৰ পাহাৰ সমূহৰ পৰা দৈনিক শতাধিক শিল , মাটি লৈ  শতাধিক ডাম্পাৰ , ট্ৰাক ৰাণীৰ কাষৰীয়া অঞ্চললৈ চলাচল কৰে ।  উত্তৰ পূৱ পৰিষদৰ ( এন ই চি ) অধীনত পৰিচালিত আৰু অসম – মেঘালয়ৰ অন্যতম সংযোগী ৰাণী – শুকুৰবৰীয়া পথচোৱাৰে নিৰ্দিষ্ট বহন ক্ষমতাতকৈ অধিক ওজনৰ বাহন চলাচল কৰা বাবেহে পথচোৱা বহু অংশত  বিতুমিন , শিলৰ তৰপ বখলা বখলাকৈ এৰাই গৈ মাটি সমূহ ওলাই পৰিছে । ফলত ৰদ দিলে ধূলি আৰু বৰষুণ দিলে বোকাৰ লগত সহাৱস্থান কৰিব লগা হৈছে পথচোৱাৰে অহা যোৱা কৰা  লোকে । বিধ্বস্ত হৈ পৰা অংশখিনিকে  ধৰি গোটেই  পথচোৱা যদি  শীঘ্ৰে  মেৰামতি বা পুনৰ্নিমান কৰা নহয় তেন্তে  অহা খৰালীৰ  সময়ত  পথচোৱা দুচকীয়া আৰু মাৰুতি কাৰ বা তেনে লঘুবাহন চলাচলৰ ক্ষেত্ৰত বন্ধ হৈ পৰাটো নিশ্চিত ।  সচেতন নাগৰিক সকলে ব্যক্ত কৰা অনুসৰি বিগত ২০২০  বৰ্ষত লকডাউন ঘোষণা কৰাৰ পুর্বে স্থানীয় বিধায়ক ৰমেন্দ্ৰ নাৰায়ণ কলিতাৰ বিশেষ তৎপৰতাত ৰাণীগেটৰ পৰা ৰাণী হৈ শুকুৰবৰীয়ালৈকে প্ৰায় ১৯ কিঃমিঃ দৈৰ্ঘ্যৰ এন ই চি পথছোৱা মেৰামতি কৰা হৈছিল । আনকি শেহতীয়াভাবে বিধায়ক কলিতাৰ আহ্বানৰ প্ৰতি সঁহাৰি দি মেঘালয় চৰকাৰে  পশ্চিম খাচী পাহাৰ জিলাৰ মাইৰাঙৰ  পৰা ৰিভয় জিলাৰ জিৰাং ,  অসমৰ শুকুৰবৰীয়া , ৰাণী  হৈ আজাৰাৰ ৰাণীগেটলৈকে শ্বিলঙৰ পৰা বৰঝাৰ বিমান বন্দৰলৈকে বিকল্প পথ হিচাপে ঘোষণা কৰিছে । যাৰ বাবে ৰাণী অঞ্চলৰ ৰাইজে পথচোৱা মেৰামতিৰ ক্ষেত্ৰত আগভাগ লবলৈ স্থানীয় বিধায়ক ৰমেন্দ্ৰ নাৰায়ণ কলিতাৰ তাৎক্ষণিক হস্তক্ষেপ কামনা কৰিছে ।

গোলাঘাট নগৰৰ চ’ক বজাৰত আজি ক’ভিড নীতি-নিয়ম ভংগ কৰি খুলি ৰখা কেইবাখনো ইলেক্ট্ৰনিকচ ষ্ট’ৰ ছীল কৰিবলৈ বাধ্য হয় গোলাঘাট জিলা প্ৰশাসন। অত্যাৱশ্যকীয় সামগ্ৰীৰ ব্যৱসায়ী প্ৰতিষ্ঠানক ৰেহাই দি আন সকলো ধৰণৰ ব্যৱসায়ী প্ৰতিষ্ঠান খোলাত চৰকাৰৰ নিষেধাজ্ঞা থকাৰ পাছতো নীতি বহিৰ্ভূত ভাৱে নগৰখনৰ এইকেইখন ব্যৱসায়ী প্ৰতিষ্ঠান খুলি ৰাখে। সেয়েহে উক্ত স্থানত যাতে জনসমাগৰ সৃষ্টি নহয় তাৰ প্ৰতি লক্ষ্য ৰাখি জিলা প্ৰশাসনে তৎকালীনভাৱে ব্যৱসায়ী প্ৰতিষ্ঠান কেইখন ছীল কৰে।

ইং ৩১ জুলাই তাৰিখে ৰাজ্যখনৰ জল জীৱন মিছন আঁচনিৰ অধীনত প্রায় ১,০০,০০০ (এক লাখ) ঘৰতকৈ অধিক হিতাধিকাৰীক বিশুদ্ধ পানী যোগান ধৰাৰ বাবে নিৰ্মাণ কৰা ব্যক্তিগত পানী পৰিবাহী পাইপ সংযোগ (FHTC) আনুষ্ঠানিক ভাৱে অর্পণ কৰা হয়। বিশ্বনাথ জিলাতো প্রতাপগড় পানী যোগান আঁচনি , বিশ্বনাথ নতুন গাওঁ পানী যোগান আঁচনি , ২ নং আমলাইগুৰি পানী যোগান আঁচনি , শান্তিপুৰ মাজগাওঁ পানী যোগান আঁচনিৰ দ্বাৰা প্রায়। ৪০০ (চাৰিশ) ঘৰতকৈও অধিক হিতাধিকাৰীক বিশুদ্ধ খোৱা পানী যোগান ধৰাৰ বাবে নিৰ্মাণ কৰা ব্যক্তিগত পানী পৰিবাহী পাইপ সংযোগ আনুষ্ঠানিক ভাৱে অর্পণ কৰা হয়। এই দিনটোতে শান্তিপুৰ মাজগাওঁ পানী যোগান আঁচনিৰ অধীনত প্রায় ১৯৭ ঘৰ হিতাধিকাৰীক বিশুদ্ধ খোৱা পানী যোগান ধৰাৰ বাবে নিৰ্মাণ কৰা ব্যক্তিগত পানী পৰিবাহী পাইপ সংযোগ আনুষ্ঠানিক ভাৱে অৰ্পণ কৰা অনুষ্ঠানত অংশ গ্রহণ কৰে বিহালী সমষ্টিৰ মাননীয় বিধায়ক শ্ৰীযুত ৰঞ্জিত দত্তদেৱ, জনস্বাস্থ্য কাৰিকৰী বিভাগৰ কাৰ্যবাহী অভিযন্তা মইনুল হক আৰু সহকাৰী অভিযন্তা তুলসী নাৰায়ণ কলিতা। প্রতাপগড় পানী যোগান আঁচনিৰ অন্তৰ্গত সুনীল তাঁতীৰ ঘৰত ব্যক্তিগত পানী পৰিবাহী পাইপৰ প্লেটফৰ্ম আৰু শোষক গাঁত নিৰ্মাণৰ শুভাৰম্ভ কৰে বিশ্বনাথ জিলাৰ মাননীয় উপায়ুক্ত শ্ৰীযুত প্ৰণৱ কুমাৰ শৰ্মাদেৱে। এইখিনিতে উল্লেখ কৰিব পাৰি যে, জল জীৱন মিছন আঁচনিৰ নির্দেশনা মতে কোনো পানী যোগান আঁচনিৰ প্ৰকল্পৰ খৰচৰ ৫% হিতাধিকাৰীসকলে বহন কৰিব লাগে আৰু নিজৰ ঘৰত পানী পৰিবাহী পাইপৰ সংযোগ স্থলত প্লেটফৰ্ম আৰু শোষক গাঁত নির্মাণ কৰি ল’ব লাগে। বিশ্বনাথ জিলাত প্রথম প্লেটফৰ্ম আৰু শোষক গাঁত নিৰ্মাণৰ আঁত ধৰে বিশ্বনাথ জিলাৰ তথ্য, শিক্ষা আৰু যোগাযোগ (IEC) বিষয়ৰ পৰামৰ্শক স্বাতী হাজৰিকাই। স্বাতী হাজৰিকাই তেওঁৰ চমু ভাষণত হিতাধিকাৰীসকলক তেওঁলোকৰ ঘৰৰ পানী পৰিবাহী পাইপৰ সংযোগস্থলত পকী প্লেটফৰ্ম আৰু শোষক গাঁত নির্মাণ কৰি জল জীৱন আঁচনি সফল কৰিবলৈ আহ্বান জনায়। এই শুভাৰম্ভ অনুষ্ঠানত বিশ্বনাথ জিলাৰ অতিৰিক্ত উপায়ুক্ত ড: সূৰ্য কমল বৰা , জনস্বাস্থ্য কাৰিকৰী বিভাগৰ সহকাৰী কাৰ্যবাহী অভিযন্তা ক্রমে প্রবীণ কুমাৰ সন্দিকৈ, শৰৎ চন্দ্র শইকীয়া, সহকাৰী অভিযন্তা দিব্যজ্যোতি চাংমাই, কাৰিকৰী বিষয়া অবিনাশ ডেকা আৰু অবিনাশ শর্মা, জিলা পানী আৰু অনাময় মিছনৰ পৰামৰ্শক শৰৎ বৰা আৰু পঞ্চায়তৰ বিভিন্ন পৰ্য্যায়ৰ কর্মকর্তা আৰু স্থানীয় ৰাইজ উপস্থিত থাকে।

 যি সময়ত এটা সাধাৰণ চাকৰিৰ বাবে বহু নিৱনুৱা যুৱক-যুৱতীয়ে বহি:ৰাজ্যলৈ ঢাপলি মেলিচে সেই সময়তে  নলবাৰীৰ এজন যুৱকে চাকৰি বাদ দি কেচুসাৰ উৎপাদনেৰে স্বাবলম্বিতাৰ এক সুন্দৰ নিদৰ্শন দাঙি ধৰিছে  । গুজৰাটৰ ওৰগেনিক বায়োফাৰ্মত তিনিবছৰ চাকৰি কৰা   নলবাৰীৰ   মাক্ৰাপাৰৰ যুবক তপন ডেকাই চাকৰি বাদ দি  ঘৰতে কেচুসাৰৰ খেতিৰে স্বাবলম্বীতাৰ  উৎকৃষ্ট নিদৰ্শন দাঙি ধৰিছে । গুজৰাটৰ কৃষি বায়’টেক লিমিটেডত ৬ মাহ প্ৰশিক্ষণ লৈ তাত ৩ বছৰকাল চাকৰি কৰা তপনে  কেচুসাৰ কিদৰে উৎপাদন  কৰিব পাৰি তাৰ বাবেই অশেষ কষ্ট কৰিব লগীয়া হৈছিল ।

  চল্লিশ (৪০)  বছৰীয়া তপন ডেকাই ২০০৭ চনত Bikas Vermi Compost নাম দি একক প্ৰচেষ্টাৰে নিজ কৰ্মত নামি বৰ্তমান দুজন কৰ্মচাৰীৰ সহিতে পত্নী- পুত্ৰৰ লগত সুখেৰে জীবন নিৰ্বাহ কৰি আছে । সম্প্ৰতি কেচুৱাৰ বিক্ৰী কৰি মাহিলি  ত্ৰিশ হেজাৰ টকা পোৱা বুলি জানিব দিয়ে তপন ডেকাই । তপন ডেকাৰ কৃষি কৰ্মই এতিয়া উৎসাহিত কৰিছে নিবনুৱা যুৱক-যুৱতী সকলক । নিবনুৱাৰ বাবে তপন ডেকা হৈ পৰিছে এতিয়া  আদৰ্শ স্বৰূপ  । 

অসম-মিজোৰাম সীমান্তত অসমৰ ভূমি অধিগ্ৰহণ কৰা মিজোক প্ৰতিৰোধ কৰিবলৈ যাওতে যোৱা ২৬ জুলাইত যি নৃশংস ভাবে মিজো দূৰ্বৃত্তই অসম আৰক্ষীৰ ওপৰত বৰ্বৰ আক্ৰমণ কৰি ছজনকৈ অসম আৰক্ষীৰ জোৱানক হত্যা কৰিলে তাক কেন্দ্ৰ কৰি যোৱা ২৮ জুলাই  তাৰিখে সদৌ বিটিআৰ বেংগলী যুব ছাত্ৰ ফেডাৰেশনৰ চিৰাং জিলাৰ সভাপতি শুভ মজুমদাৰে প্ৰেছ বিবৃতি যোগে মিজো দূৰ্বৃত্তক তীব্ৰ ভাষাৰে নিন্দা কৰে আৰু উক্ত ঘটনাত নিহত অসমৰ বীৰ শ্বহীদ আৰক্ষী জোৱানৰ শোক সন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰে। ইয়াৰ পিছত যোৱা ২৯ জুলাইত সদৌ বিটিআৰ বেংগলী যুব ছাত্ৰ ফেডাৰেশনৰ বাসুগাঁও আঞ্চলিক কাৰ্যালয়ত সীমিত সংখ্যক উপস্থিতিৰে আনুষ্ঠানিক ভাৱে বন্তি প্ৰজ্বলন,পুষ্পান্জলি  নিবেদন আৰু এক মিনিট মৌনব্ৰত পালনেৰে অসমৰ ছজন বীৰ শ্বহীদলৈ শ্ৰদ্ধাঞ্জলি জ্ঞাপন কৰে। উক্ত শ্ৰদ্ধাঞ্জলি অনুষ্ঠানত বাসুগাঁও আৰক্ষী থানাৰ সহকাৰী উপ পৰিদৰ্শকৰ উপস্থিতিত শ্ৰদ্ধাঞ্জলি অনুষ্ঠানটো গাম্ভীজ্যপূৰ্ণ হৈ উঠে।  অসমৰ ইমান খিনি ক্ষতি হোৱাৰ পিছতো মিজো চৰকাৰে অসমৰ মুখ্যমন্ত্ৰীৰ ওপৰত দিয়া ভিত্তিহীন গোচৰৰ বিৰুদ্ধে সংগঠনটোৰ জিলা সভাপতি শুভ মজুমদাৰ আৰু বাসুগাঁও আঞ্চলিক সভাপতি উত্তম চৌধুৰীয়ে সাংগঠনিক ভাৱে তীব্ৰ ভাষাৰে গৰিহণা দিয়ে আৰু অনতি পলমে অসমৰ মুখ্যমন্ত্ৰীৰ ওপৰত দিয়া এই গোচৰ উঠাই লোৱাৰ বাবে আহ্বান জনায়।