আজি পবিত্ৰ ঈদ-উল-ফিটৰ। এমাহ ৰোজাৰ অন্তত আজি ইছলাম ধৰ্মালম্বী লোকসকলে পালন কৰা এই পবিত্ৰ ঈদৰ উৎসৱ ম্লান পৰা দেখা গৈছে। জাক জমকতাৰ বিপৰীতে ঈদগাহ ময়দান সমূহত দেখা গল এক নিমাও মাও পৰিবেশ। ৰাজ্য চৰকাৰৰ নিৰ্দেশৰ প্ৰতি সন্মান জনাই প্ৰতি গৰাকী ইছলাম ধৰ্মালম্বী লোকে ঘৰুৱাভাবে আদায় কৰিলে ঈদৰ নামাজ। দৰঙৰ ছিপাঝাৰ সমষ্টিৰ অন্তৰ্গত ঐতিহাসিক মাৰুৱাচকী ইদগাহ ময়দানত কোনো  লোক উপস্থিত নোহোৱা পৰিলক্ষিত হৈছে। ইয়াৰ  বিপৰীতে ঘৰৰ পৰাই ঈদৰ নামাজ আদায় কৰিছে বুলি জানিব পৰা গৈছে।যাৰবাবে বৃহত্তৰ দুমুনীচকী অঞ্চলৰ ৰাইজৰ একমাত্ৰ ইদগাহ ময়দানত সূচনা হৈছে এক নিমাওমাও পৰিবেশ।

বিটিআৰ’ৰ ওদালগুৰি জিলাত যিবোৰ নতুন পৰিয়ালৰ মাজত পৰিয়াল পৰিচয় পত্ৰ বিতৰণ কৰা হৈছে তাত অসমীয়া ভাষাক এলাগি কৰি বড়ো আৰু বাঙালী ভাষাহে ব্যৱহাৰ কৰা হৈছে বুলি অসম জাতীয়তাবাদী যুৱ ছাত্ৰ পৰিষদৰ ওদালগুৰি জিলা সমিতিয়ে তীব্ৰ ভাষাৰে প্ৰতিবাদ জনাই  ওদালগুৰি জিলা উপায়ুক্তৰ জৰিয়তে বিটিআৰ প্ৰধান প্ৰমোদ বড়োলৈ ১৩মেত এখনি স্মাৰকপত্ৰ প্ৰদান কৰে।জিলা সমিতিৰ সভাপতি কন্ঠ কুমাৰ দাস আৰু ভাৰপ্ৰাপ্ত সাধাৰণ সম্পাদক মন্টু কুমাৰ তালুকদাৰে স্মাৰক পত্ৰত উল্লেখ কৰি কয়- বিটিআৰ’ৰ দ্বিতীয় জিলা ওদালগুৰিত পৰিয়াল পৰিচয় পত্ৰত অসম চৰকাৰৰ স্বীকৃতিপ্ৰাপ্ত ৰাজ্যিক অসমীয়া ভাষাটোক বিটিআৰ চৰকাৰে অবহেলা কৰাত আমি সংগঠন হিচাপে দুখ প্ৰকাশ কৰিছোঁ আৰু বৰ্তমান সময়ত এয়া এক উদ্বেগজনক ,প্ৰৰোচনামূলক কথা।সেয়ে বিটিআৰ প্ৰশাসনে অতি স্পৰ্ষকাতৰ বিষয়টো গুৰুত্ব সহকাৰে মৰ্যদা অক্ষুন্ন ৰাখি অসমীয়া ভাষা সন্নিবিষ্ট কৰি নতুনকৈ পৰিয়াল পৰিচয় পত্ৰ ছপা কৰি বিতৰণ কৰিবলৈ দাবী জনাই।অন্যথা জাতীয়তাবাদী যুৱ ছাত্ৰ পৰিষদ ওদালগুৰি জিলা সমিতিয়ে গনতান্ত্ৰিকভাবে তীব্ৰ আন্দোলন গঢ়ি তোলা হব বুলি ১৩মেত স্মাৰক পত্ৰ যোগে বিটিআৰ প্ৰধানলৈ সকিয়াই দিয়ে।

 যোৰহাট জিলা হোলোঙাপাৰ গাঁও পঞ্চায়তৰ সমবায় সমিতিৰ অন্তৰ্গত কাকজান চাহ বাগিচাৰ সুলভ মূল্যৰ সামগ্ৰীৰ এজেণ্ট অনিল কুমাৰ গুপ্তাৰ বিৰুদ্ধে সদৌ অসম আদিবাসী ছাত্ৰ সন্থা ( আছা) ই যি অভিযোগ আনিছে সেইখিনি ভিত্তিহীন বুলি স্থানীয় ৰাইজে জানিবলৈ দিয়ে । জানিবলৈ দিয়া মতে কাকজান চাহ বাগিচাৰ বাসিন্দা তথা সমবায় এজেন্ট অনিল কুমাৰ গুপ্তাৰ বাসগৃহত যোৱা ৭ মে’ তাৰিখে সুলভ মূল্যৰ দোকানৰ এখন অসামৰিক খাদ্য সামগ্ৰী বিতৰণ তথা তদাৰক সমিতিৰ গঠনৰ উদ্দেশ্য এখন সভা স্থানীয় ৰাইজৰ মাজত অনুষ্ঠিত হয়। সভাত উত্তম  কালন্দীক সভাপতি,সঞ্জু তাঁতীক উপ-সভাপতি আৰু অনিল কুমাৰ গুপ্তাক সম্পাদক হিচাপে লৈ এখন খাদ্য বিতৰণ সমিতি গঠন কৰে । উল্লেখ যে ইয়াৰ আগতে ৩০/১/২০২০ তাৰিখে স্থানীয় ৰাইজৰ উপস্থিতিত সমবায় সমিতি খনৰ খেলিমেলি সন্দৰ্ভত এখন সভা অনুষ্ঠিত হৈ স্থানীয় গ্ৰাহক ৰাইজে এজেন্ট অনিল কুমাৰ গুপ্তাক ভৱিষ্যতে কোনো খেলিমেলি নকৰিবলৈ সতৰ্ক কৰি সকলো ক্ষমাদান  কৰে । গ্ৰাহক সকলে জনোৱা মতে বাগিছা অঞ্চলৰ সমবায় সমিতি খন বনুৱা ৰাইজৰ দ্বাৰা পৰিচালনা হয় । বৰ্তমান ক’ভিড পৰিস্থিতিত চাউল আৰু অন্যান্য সামগ্ৰী ৰাইজে নাপালে জীয়াতু ভুগিব লগীয়া হ’ব । সেয়েহে ৰাইজৰ সিদ্ধান্ত অনুসৰি সমবায় খনৰ  কামকাজ চলি থাকিব লাগিব । কোনো সংগঠনে  ব্যক্তিগত লাভালাভৰ বাবে  সমিতি খনৰ  সামগ্ৰী বিতৰণ  কাৰ্য বন্ধ কৰিবলৈ দিয়া ন’হব ।  ইতিমধ্যে দুয়োখনৰ  সভাৰ প্ৰতিলিপি  খাদ্য আৰু অসামৰিক যোগান বিভাগৰ যোৰহাট কাৰ্যালয়ক  জমা দিয়া আছে। সেয়েহে কোনো সংগঠনৰ মিছা অভিযোগত বিভাগীয় বিষয়া সকলে গ্ৰাহক আৰু স্থানীয় ৰাইজৰ মাজত  অশান্তি সৃষ্টি নকৰিবলৈ আহ্বান জনায় ।

ক’ভিডৰ নতুন প্ৰটʼকল বলৱৎ কৰিবলৈ ব্যপক তৎপৰ হৈ পৰিছে কামৰূপ জিলা প্ৰশাসন ।  কামৰূপ জিলাৰ আৰক্ষী অধিক্ষক হিতেশ চন্দ্ৰ ৰয় আৰু বিষয়া আচিফ মহম্মদ হুচেইন,ৰঙিয়া মহকুমা আৰক্ষী বিষয়া মৃগাক্ষী ডেকাৰ সহযোগত ৰঙিয়া থানাৰ ভাৰপ্ৰাপ্ত আৰক্ষী বিষয়া ৰতন দাস সহ আৰক্ষীৰ এক বৃহৎ দলে আজি দিনৰ ২:००বজাৰ পৰা ৰঙিয়া চহৰৰ মাজমজিয়াৰে তিনিআলী হৈ গোগমালাচা ,বিহাপাৰা পুনৰ ষ্টেচন ৰোডৰ পৰা উদিয়ানাহৈ ৩১ নং ৰাষ্ট্ৰীয় ঘাইপথত সামৰণী মাৰে । ৰঙিয়াৰ গাৱে গাৱে অভিযান চলাই প্ৰথম বাৰৰ বাবে নিয়মনমনা লোক সকলক বুজনি দিয়া দেখা যায় । আনহাতে এই অভিযান কালত একাংশ অসচেতন লোকে দোকান পোহাৰ খুলি ৰখা পৰিলক্ষিত হয় , একাংশ মাক্স পৰিধান নকৰা লোকক বিনামূলীয়াকৈ মাক্স বিতৰণ কৰাৰ ওপৰিও অভিযান কালত ৰঙিয়াৰ নিকটৱৰ্তী উদিয়ানা কাদিমী মছজিদৰ ইমামক সাক্ষাৎ কৰি ঘৰে ঘৰে ঈদৰ নামাজ আদায় কৰাৰ বাবে আহ্বান জনাই। কামৰূপ জিলাৰ আৰক্ষী অধিক্ষক গৰাকীয়ে। অহাকালিৰ পৰা অধিক কঠোৰ হʼব বুলি ঘোষণা কৰে কামৰূপ জিলাৰ আৰক্ষী অধিক্ষক গৰাকীয়ে ।

 অসম চৰকাৰৰ প্ৰথমখন কেবিনেটৰ পিছত যি নতুন এচ .অ. পি. প্ৰকাশ কৰিছিল তাৰ পিছত বিশ্বনাথ আৰক্ষী আজি কঠোৰ হোৱা পৰিলক্ষিত হৈছে । দিনৰ দুই বজাৰ পিছত ব্যক্তিৰ চলাচলত যি বাধা প্ৰদান কৰা হৈছিল তাক লৈ সক্ৰিয় হৈছে বিশ্বনাথ চাৰিআলি আৰক্ষী থানাৰ ভাৰপ্ৰাপ্ত আৰক্ষী বিষয়া দিপুল কুমাৰ বড়ো। যি সকল ব্যক্তি বিনা কাৰণত  নিয়ম উলংঘা কৰি ওলাই আহিছে  তেওঁলোকক সোধ পোচ কৰাৰ লগতে নতুন নিয়মাৱলীৰ বিষয়ে বুজাই পঠিয়ায়। এনেদৰে যদি বিশ্বনাথবাসীয়ে আইন উলংঘা কৰে তেনেহলে আৰক্ষীয়ে কঠোৰ ব্যৱস্থা লব বুলিও জনায়।

 তিনিচুকীয়া জিলাৰ মাৰ্ঘেৰিটাত কৃষিভূমি বিনষ্ট কৰি অবৈধ ভাবে ইটাভাটা স্থাপনৰ এক গুৰুতৰ অভিযোগ উত্থাপন কৰিছে ছাত্ৰমুক্তি সংগ্ৰাম সমিতিয়ে। মাৰ্ঘেৰিটা নগৰৰ পৰা কেই কিলোমিটাৰ মান নিলগৰ ঐতিহ্যমণ্ডিত ৰাজখোৱা পথাৰৰ কৃষিভূমি ধ্বংস কৰি একমাত্ৰ ব্যক্তিগত মুনাফা লুটাৰ স্বাৰ্থতেই  “এ বি” নামেৰে এটা ইটাভাটা স্থাপন কৰাৰ অভিযোগ তুলিছে ছাত্ৰ মুক্তি সংগ্ৰাম সমিতিৰ তিনিচুকীয়া জিলা সমিতিয়ে। মাৰ্ঘেৰিটাৰ আৰক্ষীৰ থানাৰ অন্তৰ্গত কেটেতং গাও পঞ্চায়তৰ অধীনৰ ঐতিহ্যমণ্ডিত ৰাজখোৱা পথাৰত “এ বি” নামেৰে এটা ইটাভাটা খোলাক লৈ তীব্ৰ প্ৰতিক্ৰিয়া প্ৰকাশ কৰিছে ছাত্ৰমুক্তি সংগ্ৰাম সমিতিয়ে।যি সময়ত কৃষিভূমি ৰক্ষাৰ বাবে নতুনকৈ ভূমি আইন প্ৰৱৰ্ত্তন কৰা  হৈছে তেনে সময়তে কাৰ সাহসত চৰকাৰী কোনো ধৰণৰ নথি পত্ৰ অবিহনে শ শ বিঘা ৰোপিত মাটিৰ ধ্বংস কৰি ইটাভাটা স্থাপন কৰিছে বুলি চি এম এচ এচৰ তিনিচুকীয়া জিলা সমিতিৰ সভাপতি পাপু দত্তই প্ৰশ্ন উত্থাপন কৰিছে।অবৈধ ভাবে নিৰ্মাণ কৰা ইটাভাটা বন্ধ কৰিবৰ বাবে দাবী উত্থাপন কৰাৰ লগতে মহকুমাধিপতি আৰু ৰাজহ চক্ৰ বিষয়াকো নিৰ্মীয়মান অৱস্থাত থকা ভাটাটো অনতিপলমে বন্ধ কৰাৰ  বাবে ব্যৱস্থা গ্ৰহণৰ দাবী জনাইছে।