বঙাইগাঁও জিলাৰ কোকিলা আৰক্ষী নিৰীক্ষণ চকীৰ অন্তৰ্গত বাংলাপাৰাৰ মানাহ নৈত জে ছি পিৰে অবৈধ ভাবে বালি খনন কাৰ্য্য অব্যাহত ৰাখিছে ৩নং গোলাপাৰা বাংলাপাৰা গাওঁ পঞ্চায়তৰ প্ৰাক্তন সভাপতি আকবৰ আলীৰ পুত্ৰ আহম্মদ আলীৰ লগতে পঞ্চায়ত খনৰ বাংলাপাৰা খণ্ডৰ পঞ্চায়ত সদস্য সোনা মিঞাই।আহম্মদ আলীয়ে পঞ্চায়ত সদস্য সোনা মিঞা আৰু শ্বহিদুল ইছলামৰ সহযোগত বন বিভাগক অংগুষ্ঠ দেখুৱাই অব্যাহত ৰাখিছে এই খনন কাৰ্য্য।

জানিব পৰা মতে মাণিকপুৰস্থিত আই বন সংমণ্ডল  বিভাগৰ লগতে স্থানীয় ৰাইজে খনন কাৰ্য্য বন্ধ কৰিবলৈ নিষেধ কৰাৰ পিছতো দীৰ্ঘদিন ধৰি জে ছি পিৰ সহায়ত  ট্ৰেক্টৰেৰে অবৈধ ভাৱে উক্ত খনন কাৰ্য্য অব্যাহত ৰাখিছে।যাৰ ফলত শংকিত হৈ পৰিছে নৈপৰীয়া ৰাইজ।এনেদৰে খনন কাৰ্য্য অব্যাহত থাকিলে নৈপৰীয়াৰ ঘৰবাৰী বাৰিষাৰ সময়ত নৈৰ বুকুত জাহ যোৱাটো নিশ্চিত । স্থানীয় ৰাইজে বন বিভাগক অৱগত কৰাৰ পিছত বন বিভাগৰ লোক উপস্থিত হৈ জে ছি পি সহ ট্ৰেক্টৰবোৰ জব্দ কৰিবলৈ চেষ্টা কৰে যদিও পঞ্চায়তখনৰ প্ৰাক্তন সভাপতিৰ পুত্ৰ আহম্মদ আলীৰ লগতে বৰ্তমান পঞ্চায়ত খনৰ সদস্য আৰু তেওঁৰ কিছুমান চামুণ্ডাই বন বিভাগৰ লোকৰ লগত বাক বিতণ্ডাত লিপ্ত হৈ জেছেপি সহ ট্ৰেক্টৰবোৰ লৈ পলায়ন কৰে।আহম্মদ আলীৰ লগতেপঞ্চায়ত সদস্য সোনা মিঞাই নথিপত্ৰ বিহীন কেইবাটাও ট্ৰেক্টৰ নৈৰ খনন কাৰ্য্যত ব্যৱহাৰ কৰা বুলি জানিব পৰা গৈছে।শীঘ্ৰেই প্ৰাক্তন পঞ্চায়ত সভাপতিৰ পুত্ৰ আহম্মদ আলী,পঞ্চায়ত সদস্য আৰু অবৈধ খনন কাৰ্য্যত লিপ্ত থকা সকলৰ বিৰুদ্ধে ব্যৱস্থা গ্ৰহণৰ দাবী জনাইছে সচেতন মহলে।

অসমৰ অন্যান্য জিলাৰ লগত সংগতি ৰাখি আজি হােজাই জিলাতাে হােজাই জিলা প্রশাসনৰ উদ্যোগত শংকৰদেৱ নগৰ স্থিত কাছাৰি ময়দানত অসম চৰকাৰৰ নৱৰূপত স্বামী বিবেকানন্দ যুৱ সৱলীকৰণ যােজনাৰ ( স্বয়ম ) আনুষ্ঠানিক ভাবে শুভাৰম্ভ কৰা হয়। 
এই শুভাৰম্ভ অনুষ্ঠানত অসম চৰকাৰৰ পার্বত্য উন্নয়ন আৰু খনি বিভাগৰ মন্ত্রী শ্ৰীযুত চুম ৰংহাং মুখ্য অতিথি হিচাবে উপস্থিত থাকি হােজাই জিলাৰ বাছনিকৃত বিভিন্ন আত্মসহায়ক গােটৰ ১২০০ গৰাকী হিতাধীকাৰিৰ মাজত অসম চৰকাৰৰ ফালৰ পৰা আগবঢ়োৱা অনুমােদন পত্র বিতৰণৰ আনুষ্ঠানিক শুভাৰম্ভ কৰে । 
মন্ত্রী গৰাকীয়ে উপস্থিত যুৱক- যুৱতী সকলক উদেশ্যে ভাষণ প্রসংগত উল্লেখ কৰি কয় যে অসমৰ মুখ্যমন্ত্রী সর্বানন্দ সােণােৱাল  আৰু বিত্ত মন্ত্রী হিমন্ত বিশ্বশর্মাৰ একক প্রচেষ্টাৰ ফলত নৱৰূপত এই স্বয়ম আঁচনি গ্ৰহণ কৰা হৈছে । 
তেওঁ আৰু উল্লেখ কৰে যে , এই আঁচনিৰ উদেশ্য হল স্থানীয় উদ্যোগ আৰু গ্ৰাম্য অর্থনীতিক সৱলীকৰণৰ লগতে যুৱক যুৱতী সকলে আর্থিক দিশত সবল আৰু অত্মনিৰ্ভৰশীল হৈ নিজৰ জীবিকাৰ লগতে আনৰাে নিয়ােগ সৃষ্টিৰ ক্ষেত্ৰত সবল ভূমিকা গ্রহণ কৰিব পাৰে। 
এই অনুষ্ঠানত হােজাই সমষ্টিৰ বিধায়ক শিলাদিত্য দেৱ , লামডিং সমষ্টিৰ বিধায়ক  শিবু মিশ্র বিশিষ্ট অতিথি হিচাবে উপস্থিত থাকি ভাষণ প্রসংগত যুৱক – যুৱতী সকলে যাতে অসম চৰকাৰে আগবঢ়োৱা এই আর্থিক পুজিৰ সঠিক ব্যৱহাৰ কৰি আত্মনিৰ্ভৰশীল হৈ নিজৰ লগতে দেশখনকো প্ৰগতিৰ পথত আগুৱাই লৈ যােৱাৰ লক্ষ্যৰে কাম কৰি যাবলৈ আহবান জনায়। 
উক্ত অনুষ্ঠানত উপায়তু ডাঃ সদনেক সিং , আই.এ.এচ য়ে আঁচনিখনৰ বিষয়ে বহলাই আলােকপাত কৰে । এই অনুষ্ঠানত অতিৰিক্ত উপায়ক্তদ্বয় ক্রমে জয়ন্ত কুমাৰ বৰা , গৌৰী শংকৰ দাস , হােজাই জিলা পৰিষদৰ সভানেত্রী শ্রীমতী ৰমাবালা দেৱী আৰু বিশিষ্ঠ সমাজকর্মী তথা ভাৰতীয় জনতা পাৰ্টীৰ হােজাই জিলাৰ সভাপতি অনুপ দে প্রমুখ্যে জিলাখনৰ বাছনিকৃত যুৱক – যুৱতী সকলৰ উপৰিও স্থানীয় সমাজ জীৱনৰ বিশিষ্ঠ ব্যক্তি সকল উপস্থিত থাকে।

গ্ৰন্থগাৰ বিশ্বদৰ্শনৰ মূলদ্বাৰ এই লক্ষ্য শিৰোগত কৰি ১৯৮৫ চনৰ ২৭ জানুৱাৰীত গঠন হোৱা সদৌ অসম গ্ৰাম্য পুথিভঁৰাল সন্থাই ইতিমধ্যে ৩৬ বছৰত ভৰি দিছে। ৩৬ বছৰ পুৰ্তি উপলক্ষে কালিৰ পৰা ২ ফেব্ৰুৱাৰী লৈকে ৩৬ সংখ্যক প্ৰতিষ্ঠা দিৱস আৰু পুথিভঁৰাল সপ্তাহ উদযাপন কৰা হৈছে। ৭ দিনীয়াকৈ আয়োজন কৰা এই কাৰ্যসূচী কালি পুৱা পতাকা উত্তোলনৰে সন্থাৰ উপ-সভাপতি হিমাদ্ৰীজ্যোতি দত্তই শুভাৰম্ভ কৰে। ইয়াৰ পিছতে স্মৃতি তৰ্পণ, শোভাযাত্ৰা, বাটৰ নাট পৰিৱেশন আৰু ড° ভূপেন হাজৰিকা আদৰ্শ পুথিভঁৰাল মুকলি কৰা হয়। দিনৰ ১২ বজাত প্ৰাচীৰ পত্ৰিকা মুকলি কৰে প্ৰাক্তন বিধায়ক হৰেন বৰাই। গ্ৰন্থ আৰু প্ৰদৰ্শনী দ্বাৰ মুকলি কৰাৰ পাছত নৱ- নিৰ্মিত সুধাকন্ঠ ড° ভূপেন হাজৰিকা‌ মুকলি মঞ্চ মুকলি কৰে নগাঁও সদৰ সমষ্টিৰ বিধায়ক ৰূপক শৰ্মাই। মুকলি মঞ্চ মুকলি কৰি দিয়া ভাষণত বিধায়ক শৰ্মাই কয়- সদৌ অসম গ্ৰাম্য পুথিভঁৰাল সন্থাই গ্ৰামাঞ্চলত পুথিভঁৰাল আন্দোলন গঢ়ি তোলাত গুৰুত্বপূৰ্ণ ভূমিকা গ্ৰহণ কৰি আহিছে। আধুনিক প্ৰযুক্তিবিদ্যাৰ উত্তৰণৰ সময়তো গ্ৰন্থৰ চাহিদা কমা নাই। গ্ৰন্থই জ্ঞান প্ৰসাৰত উল্লেখনীয় ভূমিকা গ্ৰহণ কৰি আহিছে। তেওঁ নৱ-প্ৰজন্মক‌ গ্ৰন্থ অধ্যয়নৰ প্ৰতি গুৰুত্ব দিবলৈ আহ্বান জনায়। বিয়লি দুই বজাৰ পৰা ভূপেন হাজৰিকা মুকলি মঞ্চত পুথিভঁৰাল সপ্তাহৰ উদ্ধোধনী অনুষ্ঠান অনুষ্ঠিত কৰা হয়। কলংপাৰ কাকতৰ মুখ্য সম্পাদক ড° আবু হানিফাই উদ্ধোধন কৰা সভাত অৱসৰপ্ৰাপ্ত অধ্যাপক ড° জ্যোতিৰ্ময় জানা আৰু সত্ৰাধিকাৰ যুগল গোস্বামীয়ে বিশিষ্ট অতিথি হিচাপে অংশগ্ৰহণ কৰি পুথিভঁৰাল আন্দোলনৰ প্ৰয়োজনীয়তাৰ বিষয়ে উল্লেখ কৰে। সভাত ৰাজনীতি বিদ তথা প্ৰাক্তন বিধায়ক বানেশ্বৰ শইকীয়া, সাহিত্যিক উপন্দ্ৰ বৰকটকি, শিক্ষাবিদ ড° খগেশ্বৰ ভূঞা সমাজকৰ্মী কাৰ্তিক সাহাকে ধৰি বহু কেইজন বিশিষ্ট ব্যক্তিয়ে অংশগ্ৰহণ কৰে।  হিমাদ্ৰী জ্যোতি দত্তই সভাপতিত্ব কৰা আৰু সন্থাৰ প্ৰধান সম্পাদক বল্লদেৱ শৰ্মাই আতধৰা সভাখনত নগাঁও জিলাৰ সমাজ জীৱনলৈ বিভিন্ন ক্ষেত্ৰত সেৱা আগবঢ়োৱা ২৪ গৰাকী লোকক সম্বৰ্দ্ধনা জনোৱা হয়। সন্ধিয়া সাংস্কৃতিক সম্পাদিকা অনিমা বৰুৱা শৰ্মাৰ পৰিচালনাত সাংস্কৃতিক অনুষ্ঠান অনুষ্ঠিত হয়। উদ্বোধনী অনুষ্ঠানৰ বিভিন্ন কাৰ্যসূচী পৰিচালনা কৰে সন্থাৰ সহকাৰী সম্পাদক দ্বয় খগেন চন্দ্ৰ নাথ আৰু দিলীপ বৰাই। সন্থাৰ প্ৰতিষ্ঠা দিৱসৰ আন কাৰ্যসূচী ক্ৰমে আজি হোজাই জিলা গ্ৰাম্য পুথিভঁৰাল সন্থাৰ উদ্যোগত শিশু সুৰক্ষা আৰু মহিলা সবলীকৰণৰ আলোচনা চক্ৰ অনুষ্ঠিত হয়। কাইলৈ গোলাঘাট জিলা গ্ৰাম্য পুথিভঁৰাল সন্থাৰ উদ্যোগত বদন শৰ্মা স্মাৰক বক্তৃতা অনুষ্ঠান, ৩০ জানুৱাৰীত তিনিচুকীয়া জিলা গ্ৰাম্য পুথিভঁৰাল সন্থাৰ উদ্যোগত জেষ্ঠ নাগৰিক কল্যাণ সম্পৰ্কীয় সজাগতা সভা, ৩১ জানুৱাৰীত মৰিগাঁও জিলা গ্ৰাম্য পুথিভঁৰাল সন্থাৰ  উদ্যোগত যুৱ সমাৰোহ, ১ ফেব্ৰুৱাৰীত শোণিতপুৰ আৰু দৰং জিলা গ্ৰাম্য পুথিভঁৰাল সন্থাৰ উদ্যোগত মহিলা সবলীকৰণৰ আৰু  শিশুৰ বিকাশত গ্ৰন্থৰ ভূমিকা শীৰ্ষক আলোচনা চক্ৰ আৰু ২ ফেব্ৰুৱাৰীত নগাঁৱস্থ কেন্দ্ৰীয় কাৰ্যালয়ত সামৰণি অনুষ্ঠান অনুষ্ঠিত হ’ব।

২৯ জানুৱাৰী তাৰিখে অসমৰ ঐতিহ্য নগৰী হিচাপে খ্যাত শিবসাগৰ জিলাৰ তলাতল ঘৰৰ বাকৰিত আয়োজিত দুই দিনীয়া কাৰ্যসুচীৰ মুকলি সভাত বৰপেটা জিলাৰ ভেৰালদিক শ্ৰেষ্ঠ গাওঁৰক্ষী বটা প্ৰদান কৰে । জানিব পৰা মতে প্ৰতি বছৰে  ২৮ আৰু২৯ জানুৱাৰীত গাওঁৰক্ষী বাহিনীৰ জন্ম দাতা হৰিনাৰায়ন বৰুৱাক মনত পেলাবৰ বাবে ৰাজ্যিক ভিত্তিত অসমৰ জিলাসমুহত  দুই দিনীয়া কাৰ্যসুচী পালন কৰা হয় আৰু জিলাৰ একোখনকৈ দক্ষ গাওঁৰক্ষী সৎগঠনক পুৰষ্কাৰ দিয়া হয়। এইবাৰো শিবসাগৰত অনুষ্ঠিত কৰা অনুষ্ঠানত  আৰক্ষী সঞ্চালক প্ৰধান আৰু অন্যান্য বিষয়াসকলৰ উপস্হিতিত বৰপেটা জিলাৰ ভেৰালদিক শ্ৰেষ্ঠ বটা প্ৰদান কৰে অসমৰ মুখ্যমন্ত্ৰী ডাঙৰীয়াই ।২০২০ বৰ্ষত  জিলাৰ ভিতৰতে উল্লেখযোগ্য  সেৱা আগবঢ়োৱাৰ বাবে বাহিনীৰ সম্পাদক মুনতাজ আলী আহমেদৰ হাতত এখন বটা আৰু প্ৰংশসা পত্ৰ  আগবঢ়ায়। ২০১৭ বৰ্ষতো গুৱাহাটীৰ অধিৱেশন যোগে বৰপেটাৰ  ভেৰালদিক শ্ৰেষ্ঠ গাওঁৰক্ষী বটা প্ৰদান কৰা হৈছিল। উল্লেখযোগ্য যে এই বটা লাভ কৰি কোনো গাওঁৰক্ষী বাহিনীয়ে সন্তোষ হোৱা নাই। কিয়নো নিজৰ জীৱন বিপন্ন কৰি সেৱা আগবঢ়োৱা আৰু অৰ্থ ব্যয় কৰি সামাজিক অনুষ্ঠান পাতি বটাৰ বাবে বাছনি হোৱা বাহিনীক আৰ্থিক বাবে বটা দিবলৈ সকলো জিলাৰ প্ৰতিনিধিয়ে দাবী জনাইছে।