মঙলদৈ
ক’ৰোনা মহামাৰীৰ বাবে সমগ্ৰ দেশ লকডাউনত থকাত মঙলদৈ সমষ্টিৰ অন্তগৰ্ত চেলুনৰ লগত জড়িত ক্ষৌৰ কৰ্মীসকল নিজৰ বৃত্তি চলাই নিব নোৱৰাত হাহাকাৰ অৱস্থাৰ সৃষ্টি হৈছে৷ এনে সময়তে কেচি ক্ষুৰ লৈ আত্মনিয়োগ কৰি থকা ক্ষৌৰ কৰ্মীসকলৰ কাষত থিয় দিলে মঙলদৈ সমষ্টিৰ বিধায়ক গুৰুজ্যোতি দাসৰ লগতে দৰং বিজেপিৰ নেতা কৰ্মীসকল৷ আৰেং বালিমুৰৰ সভাগৃহত সামাজিক দূৰত্ব বজাই ৰাখি দৰং বিজেপিৰ সভাপতি অমৰ শৰ্মাৰ সভাপতিত্বত অনুস্থিত এই সভাত দৰঙৰ জ্যেষ্ঠ সাংবাদিক ক্ৰমে ভাৰ্গৱ কুমাৰ দাস, ময়ুখ গোস্বামী, মুকুট ৰাজ শৰ্মাই ভাষণ প্ৰদান কৰে৷ আনহাতে বিজেপি দলৰ হৈ মঙলদৈ উন্নয়ন প্ৰাধীকৰণৰ অধ্যক্ষ প্ৰতাপ বৰদলৈ, উপসভানেত্ৰী শেৱালি গোস্বামী, মহিলা মৰ্চাৰ সভানেত্ৰী প্ৰেমদা ভূঞাই৷ আনহাতে ক্ষৌৰকৰ্মী সকলৰ হৈ সভাপতি হিতেশ ডেকাই কয় যে ১৯৮৯ চনৰ পৰাই স্বাৱলম্বী হোৱাৰ লক্ষ্যৰে এই কৰ্মত তেওঁ প্ৰবৃত্ত হৈছে৷ পোনতে একাংশ লোকে তেওঁক হীন চকুৰে চাইছিল যদিও আজি ৫ শতাধিক যুৱক-যুৱতী মঙলদৈ সমষ্টিৰ পৰা এনে বৃত্তিত জড়িত হোৱাত তেওঁ সুখী বুলি অনুভৱ ব্যক্ত কৰে৷ কাৰ্যসূচীত ৫ শতাধিক যুৱক-যুৱতীলৈ গাখীৰ ৰুটি দালি আলু মিঠাতেল চাবোন মুখত মৰা মাস্ক, ছেনিটাইজাৰ আদি সামগ্ৰীৰ বৃহৎ টোপোলা এটালৈ সকলোকে প্ৰদান কৰে৷ আনহাতে বিধায়ক গুৰুজ্যোতি দাসে কয় যে অসমীয়া যুৱকসকলৰ এনেদৰে কৰ্ম প্ৰবৃত্ত হোৱা দেখি তেওঁ খুবেই আনন্দিত আৰু আগন্তুক দিনত এনেদৰে কোনো সংকোচ নকৰাকৈ নিজৰ পৰিয়ালটো পোহপাল দিব বুলি আশা কৰে৷ বুধবাৰে তেওঁ ৫ শতাধিক লোকক বহুত কিবা দিব নোৱাৰিলেও স্বাবলম্বী হোৱা যুৱকসকলৰ এনে সংকট কালত বিধায়ক হিচাপে দায়িত্ব পালন কৰা বুলি উল্লেখ কৰে৷ সভাত বিজেপিৰ প্ৰণৱ বৰুৱা, স্বপন ঘোচ, দিলীপ ডাউকা আদি সকলোৱে বিধায়ক গৰাকীৰ এনে প্ৰদক্ষেপক ভূয়সী প্ৰশংসা কৰে৷
