দৈনন্দিন বাৰ্তা ডেস্ক : বেইজিঙৰ বাবেই ক্ৰমশঃ ভাৰতৰ বিৰুদ্ধাচৰণ কৰি আছে নেপালে৷ এইবাৰ দেশখনৰ সংসদত অনুমোদন হোৱা মেপ লৈ ৰাষ্ট্ৰসংঘসহ বিভিন্ন আন্তৰ্জাতিক ফ’ৰামৰ দ্বাৰস্থ হৈছে নেপাল৷ জানিব পৰা মতে আগষ্টৰ মাজভাগত এই মেপ আন্তৰ্জাতিক মঞ্চত উত্থাপন কৰিব কে পি শৰ্মা ওলিৰ চৰকাৰে৷ ভাৰতৰ লিম্পিয়াধুৰা, কালাপানি আৰু লিপুলেখক নেপালৰ ভূখণ্ডৰ বুলি দাবী কৰা হৈছে এই মেপত৷ নেপাল চৰকাৰৰ ভূমি, সমবায় আৰু দাৰিদ্র দূৰীকৰণ সংক্রান্তিয় মন্ত্রী পদ্ম আৰাৱলে কয় যে লিম্পিয়াধুৰা, কালাপানি-লিপুলেখসহ নেপালৰ সংশোধিত মেপ ৰাষ্ট্ৰসংঘৰ অন্যান্য প্ৰতিষ্ঠান আৰু আন্তৰ্জাতিক ফ’ৰামত তুলি ধৰা হ’ব৷ ইংৰাজী ভাষাত চাৰি হাজাৰ প্ৰতিলিপি ছাপা কৰিবলৈ নিৰ্দেশ দিয়া হৈছে৷ আনহাতে ৰাষ্ট্ৰীয় স্তৰত এই মেপৰ প্ৰায় ২৫ হাজাৰ প্ৰতিলিপি ছপাই বিভিন্ন চৰকাৰী কাৰ্যালয়ত বিনামূলীয়াকৈ দিয়া হৈছে৷ বজাৰত নেপালী মুদ্ৰাত ৫০ টকাত বিক্ৰী হৈছে নতুন মেপ৷

দৈনন্দিন বাৰ্তা ডেস্ক : অৱশেষত চিকিৎসালয়ৰ পৰা মুক্তি পালে বিগ-বি অমিতাভ বচ্চনে৷ আনহাতে তেওঁৰ পুত্ৰ অভিষেকে জনালে, বিগ বিৰ শেষ ক’ৰোনা ৰিপৰ্ট নিগেটিভ আহিছে৷ যোৱা ১১ জুলাইত অমিতাভ বচ্চনা ক’ভিড ৰিপৰ্ট পজিটিভ আহে৷ সেইদিনাই ৰাতি ৭৭ বছৰীয়া অভিনেতাজনক নানাৱতী হাস্পতালত ভৰ্ত্তি কৰোৱা হয়৷ তাৰ পাছত ২৩ দিন চিকিৎসাৰ অন্তত তেওঁক চিকিৎসালয়ৰ পৰা যাবলৈ দিয়ে৷ এই খবৰ দিলে পুত্ৰ অভিনেতা অভিষেক বচ্চনে৷ অভিষেক বচ্চনে টুইটাৰত লিখিলে, দেউতা সুস্থ হৈ চিকিৎসালয়ৰ পৰা মুক্তি পালে৷ দেউতাৰ ৰিপৰ্ট নিগেটিভ আহিছে৷ এতিয়া আমাৰ ঘৰতে বিশ্ৰাম ল’ব৷ আপোনালোকৰ প্ৰাৰ্থনাৰ বাবে এয়া সম্ভৱ হৈছে৷ উল্লেখ্য যে ক’ৰোনাত আক্ৰান্ত হৈ অমিতাভ বচ্চন যি দিনা মুম্বাইৰ নানাৱতী হাস্পতালত ভৰ্ত্তি হৈছিল সেইদিনাই পুত্ৰ অভিষেকৰ শৰীৰত এই ভাইৰাছ ধৰা পৰিছিল৷ তেওঁকো চিকিৎসালয়ত ভৰ্ত্তি কৰা হয়৷ ইয়াৰ পাছতে পৰিয়ালৰ আন সদস্যৰ ক’ভিড পৰীক্ষা হয়৷ লগতে ৩০ জন কৰ্মীক আইচ’লেট কৰা হয়৷ জয়া বচ্চন, ঐশ্বৰ্য আৰু আৰাধ্যৰ প্ৰথম পৰীক্ষাত নিগেটিভ আহে৷ কিন্তু দ্বিতীয় পৰীক্ষাত মাতৃ-কন্যা ঐশ্বৰ্য আৰু আৰাধ্যৰ পজিটিভ আহে৷ ইতিমধ্যে ঐশ্বৰ্য আৰু আৰাধ্য ক’ৰোনা মুক্ত হ’ল৷ অমিতাভ ঘৰলৈ উভটিলেও পুত্ৰ অভিষেক বচ্চনৰ ৰিপর্ট আজিও পজিটিভ আহে। টুইটত সেই কথা জনাই অভিষেকে লিখিছে, “দেউতা ঘৰলৈ উভতি গৈছে। বৰ্তমান বিশ্রামত থাকিব। কিন্তু কোমর্বিডিটিৰ কাৰণে মই এতিয়াও পজিটিভ। আমাৰ পৰিয়ালৰ প্রতি ইমান ভালপোৱা-প্রার্থনাৰ বাবে আপোনালোক প্রত্যেককে ধন্যবাদ। মই খুব শীঘ্ৰেই ক’ৰোনাক পৰাজিত কৰি আহিম। প্রমিজ।”

দৈনন্দিন বাৰ্তা ডেস্ক : এইবাৰৰ ৰাখী বন্ধন উৎসৱৰ সময়ত প্ৰভূত ক্ষতিৰ মুখ দেখিছে চীনে ৷ যিহেতু চীনত প্ৰস্তুত কৰা ৰাখী ভাৰতৰ বজাৰত পোৱা নাযাব ৷ ফলত ৰাখীৰ বজাৰ নোপোৱাত এইবাৰ চীনে ৪০০০ কোটি টকা হেৰুৱাব লগা হ’ব ৷ যিহেতু ভাৰতে চীনত নিৰ্মাণ কৰা সামগ্ৰী বৰ্জন কৰাত কাষৰীয়া দেশখন এই লোকচানৰ সন্মুখীন হৈছে ৷ উল্লেখ্য যে ১০ জুনত কনফেডাৰেছন অব অল ইণ্ডিয়া ট্ৰেড (চিএআইটি)ৰ তৰফৰ পৰা ‘হিন্দুস্তানী ৰাখী’ৰে এই উৎসৱ পালনৰ আহ্বান জনাইছিল ৷ চিএআইটিৰ এই আহ্বানক সঁহাৰি জনাই দেশত প্ৰায় এক কোটি ভাৰতীয় সামগ্ৰীৰে প্ৰস্তুত কৰে ৷ এই ৰাখী বাণিজ্যিক খণ্ড, ঘৰতে আৰু অংগনৱাদী কেন্দ্ৰত মহিলাই প্ৰস্তুত কৰে ৷ ভাৰতীয় সামগ্ৰী ব্যৱহাৰ কৰি বিভিন্ন নতুন ডিজাইনত ৰাখী প্ৰস্তুত কৰে ৷ ফলত এটাও চীনা ৰাখী ব্যৱহাৰ নকৰাকৈ এইবাৰ এই উৎসৱ পালন কৰা হ’ব ৷ চিএআইটিৰ ৰাষ্ট্ৰীয় সভাপতি বি চি ভাৰতীয়া আৰু ৰাষ্ট্ৰীয় সাধাৰণ সম্পাদক প্ৰবীন খান্দেৱালাই কয় যে হিচাপ মতে প্ৰতি বছৰে ৫০ কোটি ৰাখী বিক্ৰী হয় ৷ যোৱা কেইটামান বছৰত ৬০০০ কোটিৰ ৰাখী বিক্ৰী হৈছিল ৷ তাৰে ৪০০০ কোটি টকাৰ সামগ্ৰী আছিল চীনৰ ৷ চিএআইটিৰ সভাপতি আৰু সাধাৰণ সম্পাদকে কয় যে অহা ৯ আগষ্টত সমগ্ৰ দেশৰ বণিকসকলে ‘চীনে ভাৰত এৰক’ প্ৰচাৰ অভিযান আৰম্ভ কৰিব ৷ দেশৰ ৮০০ ঠাইত বণিকসকলে ‘চীনে ভাৰত এৰক’ শ্ল’গান দিব ৷

দৈনন্দিন বাৰ্তা ডেস্ক : ক’ৰোনাত আক্ৰান্ত হ’ল কেন্দ্ৰীয় গৃহ মন্ত্ৰী অমিত শ্বাহ৷ দেওবাৰে নিজেই টুইট কৰি এই কথা জনালে কেন্দ্ৰীয় গৃহ মন্ত্ৰীজনে৷ বৰ্তমান দেশৰ ৰাজনীতিৰ অন্যতম চৰ্চিত ব্যক্তি অমিত শ্বাহে প্ৰাথমিক উপসৰ্গ দেখাৰ বাবে ক’ৰোনা পৰীক্ষা কৰাইছিল৷ তাতেই পজিটিভ ৰিপৰ্ট আহে৷ টুইট কৰি তেওঁ লিখে,  প্ৰাথমিক উপসৰ্গ থকাত ক’ৰোনা পৰীক্ষা কৰিছিলো৷ ৰিপৰ্টত পজিটিভ আহিছে৷ শাৰীৰিক অৱস্থা ভালেই আছে৷ তথাপি চিকিৎসকৰ পৰামৰ্শ মানি চিকিৎসালয়ত ভৰ্ত্তি হৈছো৷ কেন্দ্ৰীয় গৃহ মন্ত্ৰীজন বিগত কেইটামান দিন অতি সক্ৰিয়ভাৱে একাধিক ঠাইত আছে৷ স্বাভাৱিকভাৱে তেওঁৰ সংস্পৰ্শলৈ আহিছে একাধিক মানুহৰ লগতে নেতা-মন্ত্ৰী৷ যিসকল তেওঁৰ সংস্পৰ্শলৈ আহিছিল তেওঁলোকো সকলোকে ক’ৰোনা পৰীক্ষা কৰি আইচ’লেছনত থাকিবলৈ তেওঁ আহ্বান জনাইছে৷ উল্লেখ্য যে গৃহ মন্ত্ৰী শ্বাহে বিভিন্ন ভাৰ্চুৱেল জনসভাত ভাষণ দিছিল৷ সেই মঞ্চত উপস্থিত আছিল আন নেতা৷ ইয়াৰ উপৰি তেওঁ প্ৰধানমন্ত্ৰীৰ সৈতে সংস্পৰ্শলৈ আহিছিল৷ তাকেলৈও চিন্তাৰ কাৰণ আহি পৰিছে৷ ইপিনে ৰাম মন্দিৰৰ ভূমি পূজা সমাগত৷ ইয়াৰ ওপৰত কি প্ৰভাৱ পৰিব তাকে লৈও প্ৰশ্ন উত্থাপন হৈছে৷ মন কৰিব লগা যে দিল্লীৰ ক’ৰোনা পৰিস্থিতি লৈ উল্লেখযোগ্য ভূমিকা লৈছিল অমিত শ্বাহে৷ সম্প্ৰতি দিল্লী চৰকাৰৰ বিভিন্ন বিষয়াৰ লগত অমিত শ্বাহে আলোচনা কৰিছিল৷ ৫৫ বছৰীয়া শ্বাহক চিকিৎসকৰ পৰামৰ্শ মতে চিকিৎসালয়ত ভৰ্ত্তি কৰা হৈছে৷ অমিত শ্বাহ ক’ৰোনাত আক্ৰান্ত হোৱাৰ খবৰ পাই বিজেপিৰ সভাপতি জে পি নাড্ডাই শ্বাহ শীঘ্ৰে আৰোগ্য হ’বৰ বাবে ভগৱানৰ ওচৰত প্ৰাৰ্থনা জনাইছে বুলি প্ৰকাশ কৰে৷ জ্যেষ্ঠ বিজেপি নেতা সুব্ৰমণিয়াম স্বামীয়ে কেন্দ্ৰীয় গৃহ মন্ত্ৰীজন শীঘ্ৰে আৰোগ্য হৈ আহিবৰ বাবে প্ৰাৰ্থনা কৰিছে৷

দৈনন্দিন বাৰ্তা ডেস্ক : নতুন ৰাষ্ট্ৰীয় শিক্ষানীতিক লৈ দেশজুৰি বিতৰ্ক চলি থকা সময়তে মহাবিদ্যালয়ৰ ছাত্ৰ-ছাত্ৰীৰ এক ভাৰ্চুৱেল সভাত অংশগ্ৰহণ কৰে৷ স্মাৰ্ট ইণ্ডিয়া হেকাথন ২০২০ৰ গ্ৰাণ্ড ফিনালৰ সূচনাপৰ্বৰ বক্তৃতাত প্ৰধানমন্ত্ৰীয়ে কয়, বাবা চাহেব আম্বেদকাৰে কৈছিল, দেশত সুলভ শিক্ষাৰ প্ৰয়োজন ৷ তেওঁৰ সেই ইচ্ছা প্ৰতিফলিত হৈছে নতুন শিক্ষানীতিত ৷ প্ৰধানমন্ত্ৰীৰ দাবী, বিভিন্ন স্তৰত ধাৰাবাহিক আলোচনাৰ পাছত কেন্দ্ৰীয় চৰকাৰে নতুন ৰাষ্ট্ৰীয় শিক্ষানীতি অনুমোদন কৰিছে৷ কেৱল বিদ্যালয় পৰ্যায়তে নহয়, নতুন ৰাষ্ট্ৰীয় শিক্ষানীতিয়ে প্ৰৱল সংশয় আৰু শংকাৰ সৃষ্টি হৈছে মহাবিদ্যালয়-বিশ্ববিদ্যালয়ৰ ছাত্ৰ-ছাত্ৰী আৰু অভিভাৱকৰ মাজত৷ প্ৰধানমন্ত্ৰীয়ে জনায়, নতুন শিক্ষানীতি কাৰ্যকৰী হ’লে ১৩০ কোটিৰ বেছি দেশবাসীৰ প্ৰত্যাশা পুৰণ হ’ব৷ তেওঁ কয়, শিক্ষা ব্যৱস্থাক আধুনিক কৰি তোলাৰ বাবে পৰিকাঠামোৰ সংস্কাৰ কৰাই আমাৰ লক্ষ্য৷ আগৰ শিক্ষা পদ্ধতিৰ বেমেজালিবোৰ নতুন ব্যৱস্থাত দূৰ কৰা হৈছে৷ ভাৰতত অ’ত দিনে স্নাতক স্তৰত বিজ্ঞান, কলা আৰু বাণিজ্যৰ পাঠ আছিল তিনি বছৰ৷ সেই ক্ষেত্ৰত কোনো ছাত্ৰ-ছাত্ৰী প্ৰাথমিক স্তৰৰ পৰা স্নাতক হয় ১৫ বছৰত৷ কিন্তু বিদেশত ১৬ বছৰ পঢ়াশুনা দৰকাৰ হয়৷ নতুন শিক্ষানীতিত সেই বিদেশী ধাৰা অনুসৰণ কৰা হৈছে বুলি বহুৱে লক্ষ্য কৰিছে৷ মোডীৰ দাবী ল’কেল আৰু গ্ল’বেলৰ বন্ধন ঘটাব নতুন শিক্ষানীতিত৷ বিষয় বাচনিত ছাত্ৰ-ছাত্ৰীৰ বহু সুবিধা হ’ব৷ লগতে মৌলিক চিন্তাৰ বিকাশ ঘটাব৷ ইয়াৰ লগতে তেওঁ কয়, ছাত্ৰ-ছাত্ৰীৰ বেগৰ বোজা কমোৱাৰ প্ৰয়োজন৷ সেই বিষয়টোত গুৰুত্ব দিয়া হৈছে৷ বিশ্বৰ উন্নত দেশবোৰে নিজা ভাষাত শিক্ষাৰ ওপৰত জোৰ দিয়ে বুলি মোডীয়ে কয়, নতুন শিক্ষানীতিয়ে ভাৰতীয় ভাষাৰ বিস্তাৰ ঘটাব৷ ইয়াৰ লগতে মহাবিদ্যালয়ৰ ছাত্ৰ-ছাত্ৰীৰ উদ্দেশ্যে তেওঁ কয়, নতুন শিক্ষানীতি বহু বেছি কৰ্মসংস্থাপনমুখী হ’ব৷ কেৱল চাকৰি প্ৰাৰ্থী সৃষ্টি নকৰে, চাকৰিদাতাৰ সংখ্যাও বঢ়াব৷ ২০৩৫ চনৰ ভিতৰত ছাত্ৰ-ছাত্ৰীৰ অন্তত ৫০ শতাংশই উচ্চ শিক্ষাৰ সুযোগ দিয়া তেওঁৰ চৰকাৰৰ লক্ষ্য বুলি জনায়৷ স্মাৰ্ট ইণ্ডিয়া হেকাথন প্ৰতিযোগিতাৰ জৰিয়তে ছাত্ৰ-ছাত্ৰীৰ মৌলিক চিন্তাচৰ্চা আৰু উদ্ভাৱনী দক্ষতা বঢ়োৱা হ’ব৷ এইবাৰৰ প্ৰতিযোগিতাত প্ৰায় চাৰে চাৰি লাখ ছাত্ৰ-ছাত্ৰীয়ে অংশগ্ৰহণ কৰিছিল৷ চূড়ান্ত পৰ্যায়ত (গ্ৰাণ্ড ফিনাল) অংশগ্ৰহণকাৰীৰ সংখ্যা ১০ হাজাৰ৷ ৩ আগষ্টত এই প্ৰতিযোগিতাৰ ফাইনেল পৰ্ব৷

অনলাইন বাৰ্তা, ১ আগষ্ট : শচীনৰ ধুমুহাত বিপৰ্যস্ত গেহলট ৷ এতিয়া আস্থা ভোটৰ নাম মুখত নাই ৷ এইবাৰ বাৰম্বাৰ শচীন পাইলট আৰু দলৰ বিদ্ৰোহী বিধায়কক ঘুৰাই অনাৰ কথা কৈছে ৰাজস্থানৰ মুখ্যমন্ত্ৰী অশোক পাইলটে ৷ ৰাজ্যৰ ৰাজনৈতিক সংকটৰ বাবে তেওঁ প্ৰধানমন্ত্ৰী মোডীক লক্ষ্য কৰি ল’বলৈ এৰা নাই৷ আগতে অৱশ্যে গেহলটে দাবী কৰিছিল, ৰাজ্য কংগ্ৰেছৰ বিধায়কক লৈ চৰকাৰ পতন ঘটাব বিচাৰিছে বিজেপিয়ে৷ শনিবাৰে অশোক গেহলটে কয়, ৰাজ্যত যি চলিছে সেয়া প্ৰধানমন্ত্ৰী মোডীয়ে বন্ধ কৰা উচিত৷ প্ৰধানমন্ত্ৰী হিচাপে মোডীজীৰ উচিত এই ‘তামাচা’ বন্ধ কৰাৰ ৷ ৰাজ্যত এতিয়া বিধায়ক কিনাবেচাৰ দৰ বহু বেছি ৷ বিধানসভাৰ অধিৱেশন আৰম্ভ হ’লে ইয়াতকৈ বাঢ়ি যাব৷ উল্লেখ্য যে দল ভাঙোনৰ ভয়ত গেহলটে তেওঁৰ অনুগত বিধায়কক জয়ছলমিৰৰ এখন হোটেলত প্ৰায় বন্দী কৰি ৰাখিছে ৷ তেওঁ দাবী কৰিছে, তেওঁৰ হাতত ১০১ জন বিধায়ক আছে ৷ শনিবাৰে গেহলটে সাংবাদিকক কয়, কংগ্ৰেছৰ হাইকমাণ্ডে যদি বিদ্ৰোহী বিধায়কক ক্ষমা কৰে তেনে তেওঁৰ কোনো আপত্তি নাই৷ শচীনসহ আন বিধায়কৰ তেওঁ স্বাগত জনাবলৈ সাজু ৷