লংকা : হোজাই জিলাৰ বিজেপিত হৈছে নেকি দলীয় সংঘাত। যাৰ পৰিণতিত দেওবাৰে বিধায়ক শিলাদিত্য‌ই বিজেপিৰ পৰা অৱসৰ লোৱাৰ পথ বাছি লৈছে। বিধায়ক শিলাদিত্য আৰু হোজাই বিজেপি সমিতিৰ কৰ্মীৰ মাজত চলিছে আভ্যান্তৰীণ সংঘাত যাৰ পৰিণতিত জিলা বিজেপি কাৰ্য্যালয়ত জিলা পৰিষদৰ উপ-সভাপতি নুৰ আহমেদক সভাৰ জৰিয়তে ততাতৈয়াকৈ বিজেপিত যোগদান কৰা হʼল। ৰাজ্যিক বিজেপি, নেতা কৰ্মী কাৰ পক্ষত? কিয় বিষয়টো নিয়ন্ত্ৰণ কৰিব পৰা নাই উচ্চ ৰাজ্যিক পৰ্যায়ৰ নেতাসকলে। সকলো বৰ্তমান পানীৰ তলৰ কাঁইট সদৃশ পৰিবেশ। কালি বিজেপিৰ হোজাই জিলা সমিতিৰ সভাপতি অনুপ দেৱ আৰু প্ৰাক্তন সভাপতি অৰ্জুন মজুমদাৰে হোৱা এক আছুতীয়া সাক্ষাৎকাৰত সাংবাদিকক কয় যে বিধায়ক শিলাদিত্য দেৱে বিজেপি দলৰ পৰা অৱসৰ লোৱাৰ ক্ষেত্ৰত জনোৱা নাছিল হোজাই জিলা বিজেপিৰ কৰ্মকৰ্তাক। আনহাতে, আকৌ হোজাই সভাপতি গৰাকীকো ব্যক্তিগতভাৱে জনোৱা নাছিল কোনো কথা। তেওঁ পৰিষদৰ সন্দৰ্ভত কয় যে, বিধায়ক গৰাকীয়ে কোৱাৰ দৰে কথাবোৰ নহয়। হোজাই জিলা পৰিষদৰ উপ-সভাপতি নুৰ আহমেদে কংগ্ৰেছৰ পৰা পদত্যাগ কৰি নিৰ্দলীয় হৈ আহিছিল। পদত্যাগৰ লিখিত পত্ৰ হোজাই জিলা বিজেপিৰ হাতত আছে। পিছতহে কংগ্ৰেছৰ পৰা নুৰ আহমেদক বহিষ্কাৰ কৰিছিল। পৰিষদত অবাধ দুৰ্নীতি সন্দৰ্ভত কয় যে, পুৰণি পৰিষদৰ কিছু পুঁজি আছিল যদিও পৰিষদত পুঁজিক লৈ কোনো দুৰ্নীতি হোৱা নাই । পুঁজিয়েই নাই দুৰ্নীতি হ’ব কʼৰ পৰা? কান্ধত মোনা লৈ হোজাইত দলীয় কৰ্মীৰ মাজত বিভাজন অনা ৰাজ্যিক পৰ্যায়ৰ নেতা, কাৰ কথা বিধায়ক শিলাদিত্য‌ই কৈছে নাজানো। তেওঁ নাম কোৱা নাই। বিজেপিৰ প্ৰায় সংখ্যক কৰ্মকৰ্তাই কান্ধত মোনা লয়। ৰাজ্যিক পৰ্যায়তো বহু আছে কাৰ কথা কৈছে নাজানো। এইদৰে কয় জিলা সভাপতি অনুপ দেৱে। আনহাতে প্ৰাক্তন সভাপতি অৰ্জুন মজুমদাৰে কয় যে, বিধায়ক শিলাদিত্য‌ই কিছু দিনৰ পৰা এনে কথা কৈ দলৰ কৰ্মীসকলৰ মনোৱল ভাঙিছে। কোন সেই কান্ধত মোনা লোৱা ব্যক্তিৰ লগত প্ৰাক্তন জিলা সভাপতি অৰ্জুন মজুমদাৰ সম্পৰ্ক আছে, যদি সত্ সাহস আছে শিলাদিত্য‌ই স্পষ্ট কৰক। হোজাই বিজেপিত হোৱা নাই দল কেন্দ্ৰীক ৰাজনীতি। আনহাতে আকৌ শিলাদিত্যই অৰ্জুন মজুমদাৰক নাৰী লগত অপকৰ্ম কৰা বুলি সংবাদমেলত যি মন্তব্য আগবঢ়াইছিল তাৰ সন্দৰ্ভত অৰ্জুন মজুমদাৰে কয় যে, মোৰো এটা পৰিয়াল আছে। এনেবোৰ কথা দুনাই যাতে শিলাদিত্য‌ই নকয়। ৰাজনৈতিকভাবে যি কয় ক‍ওঁক কিন্তু ব্যক্তিগতভাবে যাতে শিলাদিত্যই নকয়। নহ’লে ম‌ই আইনৰ আশ্ৰয় লম।

নগাঁও :
নগাঁও সদৰ সমষ্টিত কংগ্ৰেছত সৃষ্টি হৈছে ব্যাপক গৰাখহনীয়াৰ। আজি সদৰ সমষ্টিৰ কেন্দুগুৰি গাঁও পঞ্চায়তত কংগ্ৰেছৰ ৯গৰাকী নিৰ্বাচিত পঞ্চায়ত প্ৰতিনিধিয়ে বিধায়ক ৰূপক শৰ্মাৰ উপস্থিতিত বিজেপি দলত যোগদান কৰি পঞ্চায়ত টোত কংগ্ৰেছৰ ভেটিত ব্যাপক খহনীয়াৰ সৃষ্টি কৰিছে। আজি বিয়লি কেন্দুগুৰি পঞ্চায়তৰ ভাৰতীয় জনতা পাৰ্টিৰ অস্থায়ী কাৰ্যালয়ত অনুষ্ঠিত সভাত বিধায়ক ৰূপক শৰ্মা,ভকতগাঁও জিলা পৰিষদৰ সদস্য ৱাজিবুল্লা কবিৰ আৰু জিলা সভাপতি অভিজিৎ নাথৰ উপস্থিতিত ৯গৰাকী পঞ্চায়ত প্ৰতিনিধিসহ শতাধিক কংগ্ৰেছ কৰ্মীয়ে গেৰুৱা বসন পৰিধান কৰে। সংখ্যালঘূ জনবসতি প্ৰধান পঞ্চায়তটোত কংগ্ৰেছৰ যথেষ্ট শক্তিশালী স্থিতি থকা বুলি চৰ্চিত হোৱাৰ সময়তে শতাধিক কংগ্ৰেছীয়ে দলত্যাগ কৰা কাৰ্যই চিন্তিত কৰি তুলিছে জিলাখনৰ কংগ্ৰেছী মহলক। আনহাতে আজিৰ এই সভাত ভাষণ প্ৰদান কৰি বিধায়ক ৰূপক শৰ্মাই কয় যে সবকা সাথ সবকা বিকাশ নীতিৰে ভাৰতীয় জনতা পাৰ্টিয়ে জাতি-বৰ্ণ-ধৰ্ম নিৰ্বেশেষে সকলোকে লগত লৈ আগুৱাই যাব। বিধায়ক গৰাকীয়ে লগতে কয় যে এতিয়া কংগ্ৰেছে ধৰ্মৰ কথা কৈ আৰু মুছলমান ভোটাৰক প্ৰৱঞ্চনা কৰিব নোৱাৰে। ২০২১ত বিজেপিৰ নেতৃত্বত পুনৰ চৰকাৰ গঠন হ’ব বুলি মন্তব্য কৰি বিধায়ক গৰাকীয়ে পুনৰ কয়, নৰেন্দ্ৰ মোডী, সৰ্বানন্দ সোণোৱাল আৰু হিমন্ত বিশ্ব শৰ্মাৰ নেতৃত্বত বিগত দিনবোৰৰ দৰে অনাগত সময়তো সদৰ সমষ্টিৰ ৰাইজৰ সৰ্বাঙ্গীণ উন্নয়ণৰ বাবে তেঁও কাম কৰি যাব। উল্লেখযোগ্য যে কেন্দুগুৰিত অনুষ্ঠিত সভাখনত ভাৰতীয় জনতা পাৰ্টিৰ খাগৰিজান মণ্ডল, যুৱ মৰ্চা আৰু জিলা বিজেপিৰ কেইবাগৰাকীও জ্যেষ্ঠ নেতা উপস্থিত থাকে।

তিনিচুকীয়া : মৰাণ জনজাতিক অতিশীঘ্ৰে অনুসূচীত জনজাতিৰ মৰ্যদা প্ৰদান কৰি ষষ্ঠ অনুসূচীভূক্ত স্বায়ত্ব শাসন প্ৰদানৰ লগতে ৰাজ্যিক কেবিনেটৰ সিদ্ধান্ত মৰ্মে জাৰি কৰা নতুন ভূমি নীতিৰ অধ্যাদেশ বাতিলৰ দাবী আৰু অত্যাৱশ্যকীয় সামগ্ৰীৰ মূল্যবৃদ্ধি ৰোধ কৰাৰ দাবীত সদৌ মৰাণ ছাত্ৰ সন্থা সৰৱ হৈ একাদিক্ৰমে বিভিন্ন প্ৰতিবাদী কাৰ্যসূচী গ্ৰহণ কৰিছে। সদৌ মৰাণ ছাত্ৰ সন্থাৰ কেন্দ্ৰীয় সমিতিৰ নিৰ্দেশমৰ্মে আঞ্চলিক সমূহৰ উদ্যোগত যোৱা ১০ জুলাইত সংশ্লিষ্ট ৰাজহ চক্ৰ বিষয়াৰ কাৰ্যালয়ৰ সন্মুখত প্ৰতিবাদী ধৰ্ণা কাৰ্যসূচী ৰূপায়ণ কৰি অসমৰ মুখ্যমন্ত্ৰীলৈ স্মাৰক পত্ৰ প্ৰেৰণ কৰে। সদৌ মৰাণ ছাত্ৰ সন্থাৰ কেন্দ্ৰীয় সমিতিৰ উদ্যোগত কালি তিনিচুকীয়া জিলা উপায়ুক্ত কাৰ্য্যালয়ৰ সন্মুখত প্ৰতিবাদ সাব্যস্ত কৰি ভাৰতৰ প্ৰধানমন্ত্ৰী, জনজাতি পৰিক্ৰমা মন্ত্ৰী, অসমৰ মুখ্যমন্ত্ৰীলৈ পৃথকে পৃথকে স্মাৰক পত্ৰ প্ৰেৰণ কৰে। সাম্প্ৰতিক সময়ৰ বিশ্বজোৰা কৰোনা মহামাৰীৰ ভয়াৱহতাৰ প্ৰতি লক্ষ্য ৰাখি সামাজিক দূৰত্ব বজাই ৰাখি বিভিন্ন চৰকাৰ বিৰোধী শ্লোগান দি জিলা উপায়ুক্ত কাৰ্য্যালয়ৰ সন্মুখত পৰিবেশ উত্তাল কৰি তোলে। চৰকাৰে জন বিৰোধী নীতি গ্ৰহণ কৰাটো মৰাণ ছাত্ৰ সন্থাই কেতিয়াও মানি নলয় বুলি স্পষ্ট কৰি দি মূল্যবৃদ্ধি হ্ৰাস কৰিবলৈ দাবী জনায়। আনহাতে, মৰাণ জনজাতিক অতিশীঘ্ৰে অনুসূচীত জনজাতিৰ মৰ্যদা প্রদান কৰিবলৈ চৰকাৰক দাবী জনাইছে। অন্যথা প্ৰতিবাদী কাৰ্যসূচী তীব্ৰ কৰাৰ হুংকাৰ দিছে। কালিৰ কাৰ্যসূচীত সদৌ মৰাণ ছাত্ৰ সন্থাৰ সভাপতি অৰুণজ্যোতি মৰাণ, ভাৰপ্ৰাপ্ত সভাপতি দিলীপ মৰাণ, সাধাৰণ সম্পাদক নৱ মৰাণ, অসম মৰাণ সভাৰ সাংগঠনিক সম্পাদক খগেন মৰাণ আদি নেতৃবৰ্গ উপস্থিত থাকে।