টীয়ক : কৃষক নেতা অখিল গগৈৰ মুক্তিৰ লগতে সু স্বাস্থ্যৰ কামনাৰে সমগ্ৰ অসমৰ ৰাইজে প্ৰাৰ্থনাৰ লগতে উপযুক্ত চিকিৎসা প্ৰদানৰ দাবী উত্থাপন কৰি থকাৰ সময়তে যোৰহাট জিলাৰ ছাত্ৰ মুক্তি সংগ্ৰাম সমিতি কাকজান শাখা আঞ্চলিক সমিতিৰ সম্পাদক ইন্দুকমল ভূঞাৰ এটা ফেচবুক প’ষ্টত কমেণ্টত ‘Bjp Sushant’ নামৰ গুজৰাটৰ গান্ধীনগৰৰ নিবাসী বুলি উল্লেখ থকা আৰু বিজেপি দলৰ সদস্য বুলি উল্লেখ থকা এটা ফেচবুক প্ৰফাইলৰ পৰা অখিল গগৈক এনকাউণ্টাৰ কৰি হত্যা কৰাৰ ভাবুকি প্ৰদান কৰে৷ অখিল গগৈক হত্যা কৰাৰ ভাবুকি প্ৰদানে অসমবাসীৰ লগতে অখিল গগৈৰ পৰিয়ালক সংকিত কৰি তুলিছে। সেয়ে উক্ত একাউন্টৰ গৰাকীক অতি শীঘ্ৰে গ্ৰেপ্তাৰ কৰি উপযুক্ত শাস্তি বিহাৰ দাবীৰে টীয়ক আৰক্ষী থানাত কাকজান আঞ্চলিক ছাত্ৰ মুক্তি সংগ্ৰাম সমিতিৰ সভাপতি ধ্ৰুৱজ্যোতি চাংমাই আৰু সম্পাদক ইন্দুকমল ভূঞাৰ স্বাক্ষৰ সম্বলিত এখন এজাহাৰ প্ৰদান কৰিছে।

দৈনন্দিন বাৰ্তা ডেস্ক :

চলিত বৰ্ষত বৰষুণৰ পৰিমাণ বৃদ্ধি পোৱাত গুৱাহাটী মহানগৰীত ভূমিস্খলনৰ ঘটনা দিনক দিনে বৃদ্ধি পোৱা পৰিলক্ষিত হৈছে ৷ যোৱা কিছুদিনৰ পৰা নেৰানেপেৰা বৰষুণ দি থকাৰ ফলত মহানগৰীৰ গান্ধীমণ্ডপ পথত এক ভয়ংকৰ ভূমিস্খলনৰ ঘটনা সংঘটিত হয়৷ জানিব পৰা মতে দক্ষিণ শৰণীয়া গান্ধীমণ্ডপ পথত কালি পুৱতি এটি প্ৰকাণ্ড শিলৰ সৈতে পাহাৰৰ মাটি বাগৰি আহে ৷ গান্ধী মণ্ডপ পথৰ একাংশ পথ শিল আৰু মাটিৰে ভৰি পৰিছে৷ যাৰ বাবেই পথচাৰী অহা যোৱাত যথেষ্ট অসুবিধাৰ সন্মুখীন হৈছে ৷ ইয়াৰ সমান্তৰালভাৱে পাহাৰৰ যি স্হানৰ পৰা শিল-মাটি বাগৰি আহিছিল সেই অংশৰ পৰা পুনৰ মাটি-শিল ঢহি যথেষ্ট আশাংকা কৰা হৈছে ৷ কিয়নো একেটা স্হানত মাটি আধা খহা অবস্থাত আছে ৷ সেইবাবেই যিকোনো মুহূৰ্তত পুনৰ ভুমিস্খলনৰ হোৱাৰ সম্ভাবনা প্ৰকট৷ ইপিনে গান্ধীমণ্ডপ পথৰ বিপৰীত দিশত এডাল প্ৰকাণ্ড গছ উভালি আছে ৷ গছজোপা গান্ধীবস্তিৰ দিশত পৰি আছে৷ যিহেতু সেই অঞ্চলটো এঢলীয়া সেইবাবেই যিকোনো মুহূৰ্তত গছজোপা বাগৰি যোৱাৰ আশাংকা নুই কৰিব নোৱাৰি ৷ এই ক্ষেত্ৰত স্হানীয় ৰাইজে জানিবলৈ দিয়ে যে গছজোপা তললৈ বাগৰি গ’লে গান্ধীবস্তিৰ বাসিন্দাৰ বিপদ অনিবাৰ্য ৷ সেইবাবেই বন বিভাগ তথা জিলা প্ৰশাসনে অনতি পলমে গছজোপৰ উঠুৱাৰ ব্যৱস্থা কৰাৰ লগতে ভুমিস্খলনত আবদ্ধ হৈ থকা পথৰ শিল মাটিসমূহ আতৰায় নিবলৈ স্হানীয় ৰাইজে প্ৰশাসনক অনুৰোধ জনায় ৷

নগাঁও : বছৰৰ তৃতীয়টো বানৰ কবলত পৰিছে কামপুৰৰ বিস্তৃৰ্ণ অঞ্চল। কামপুৰত কপিলী আৰু বৰপানী নৈৰ বাঢ়নী পানীয়ে এতিয়া তাণ্ডৱৰ সৃষ্টি কৰিছে৷ বিগত দুটা মাহত হোৱা বাঢ়নী পানীৰ ফলত কেইবাঠাইতো ছিঙিছিল কপিলী আৰু বৰপানী নৈৰ মথাউৰি। সেই মথাউৰিসমূহ মেৰামতি নকৰাৰ ফলতেই ভগ্ন মথাউৰিৰে এতিয়া হোৰাহুৰে সোমাইছে পানী৷ প্লাবিত হৈছে বহু গাঁও, বাসগৃহ, ৰাজপথ আৰু বিস্তৃৰ্ণ কৃষি পথাৰ৷ কামপুৰ যমুনামুখ সংযোগী গড়কাপ্টানি পথৰ ওপৰত একঁকাল পৰ্যন্ত পানী৷ বন্ধ যাতায়ত৷ বছৰৰ তৃতীয়টো বানৰ কৱলত কামপুৰ ৰাজহ চক্ৰৰ বকুলগুৰি, নলাপাৰা, মাধৱপাৰা, জুৰিপাৰ, পটিয়াপাম, কচুৱাকে ধৰি কেইবাখনো গাঁও। উল্লেখযোগ্য যে মাধবপাৰা অঞ্চলৰ কেইবাটাও পৰিয়ালৰ বাসগৃহ বানে ভাঙি নিয়াৰ ফলত এতিয়া গৃহহীন হৈ পৰিছে পৰিয়ালকেইটা৷ শালি খেতিৰ সময়ত বানে সন্ত্ৰাস চলোৱাত মূৰে কঁপালে হাত দিছে কৃষক সকলে৷ অদ্যাপি বৰ্নাত্য সকলৰ কাষ চপা নাই জিলা প্ৰশাসনৰ প্ৰতিনিধিৰ লগতে জনপ্ৰতিধি। ৰাইজৰ অভিযোগ তেওঁলোকৰ সমষ্টিৰ জনপ্ৰতিনিধিক বিগত চাৰিটা বছৰে দেখিয়ে পোৱা নাই।

নগাঁও : বিজেপি দলৰ ভিতৰচৰাত চলিছে অন্ত:কন্দল। ইয়াৰে বহি:প্ৰকাশ ঘটালে হোজাইৰ বিধায়ক শিলাদিত্য দেৱে। পদত্যাগ নকৰিলেও বিধায়ক শিলাদিত্য দেৱে ৰাজনিতীৰ পৰা ল’ব অৱসৰ। কালি হোজাইত এখন সংবাদমেল সম্বোধন কৰি ঘটালে কেতবোৰ বিস্ফোৰণ। শিলাদিত্যই কলে বিগত ৩০ বছৰ ধৰি বিজেপি দলত আছো কিন্তু মুখপাত্ৰৰ বাহিৰে একো পোৱা নাই। আমাৰ ভেলো নাই। মন্ত্ৰীৰ বাবে ষড়যন্ত্ৰ কৰা নাই। আমাৰ অভিজ্ঞতা আছে। কিন্তু পদবীৰ বাবে লবি কৰা নাই। লগতে বিধায়ক গৰাকীয়ে সংবাদমেলত কয় যে অহা ১০ মাহ বা ১ বছৰ ভিতৰত মোক হত্যা কৰা হ’ব। গতিকে আঁতৰি যোৱা ভাল বুলি ভাবি অৱসৰ লম। মই কোনো আন দলত যোগদান নকৰোঁ। কিন্তু ৰাইজৰ কাম কৰি যাম। মই অকলে খোজ দিম যুজঁ দিম অকলে কাম কৰি যাম। ১৪ জুলাইত অৱসৰ লম ভাৰতীয় জনতা পাৰ্টীৰ পৰা। দলৰ সভাপতিক ৱাটছ এপৰ জৰিয়তে অৱগত কৰিছোঁ। দলৰ সভাপতিক ফোন কৰিছো কিন্তু উঠোৱা নাই। অসমত লিডাৰ নাই। চবেই লিডাৰ হ’ব বিচাৰে। মই অনফিট গতিকে আঁতৰি যাম। মোনা লৈ ফুৰা ব্যক্তিজনে ধ্বংস কৰিছে বিজেপিক। ৰিপৰ্ট কাৰ্ড অক্টোবৰ মাহত দি দিম। অৱসৰ লোৱাৰ পিছত দলৰ পৰা দায়িত্ব নলয় বুলিও ঘোষণা। বিধায়ক হিচাপে থকা কৰ্তব্য পালন কৰি যাম। দলত কোনো ধৰণৰ কন্টল নাই। মোনা লোৱা জন বহুত শক্তিশালী তেওঁ অসম বিজেপিত বিভাজন কৰি ৰাখিছে। মোনা লৈ ৰাতি আহি যায় ঠায়ে ঠায়ে। ৰাজেন গোহাঁই, আৰ পি শৰ্মা, ৰমেন ডেকাক নি:শেষ কৰা হ’ল। এতিয়া মোনা লোৱা ব্যক্তিজনে মোক হত্যা কৰিব বুলিও গুৰুতৰ মন্তব্য কৰিলে বিধায়ক শিলাদিত্য দেৱে।