দৈনন্দিন বাৰ্তা ডেস্ক:

ভাৰত- চীন সীমান্তত দেশৰ হকে শ্বহীদ হোৱা বীৰ জোৱান সকলক আজি সন্ধিয়া নলবাৰী চহৰৰ গোল পাৰ্কৰ চকত ৰাজহুৱা ভাৱে বন্তি প্ৰজ্বলন আৰু শ্ৰদ্ধাঞ্জলি জনোৱা হয় । ৰাম সেনা নলবাৰী সমিতিয়ে অনুষ্ঠিত কৰা এই ৰাজহুৱা বন্তি প্ৰজ্বলন আৰু শ্ৰদ্ধাঞ্জলি অনুষ্ঠানত উপস্থিত ৰাম সেনাৰ বিষয়ববীয়া সহ কৰ্মী সকলৰ লগতে উপস্থিত ৰাইজে বন্তি প্ৰজ্বলন কৰাৰ লগতে নলবাৰী সদৰ থানাৰ আৰক্ষী বিষয়া সকলেও দেশ হকে প্ৰাণ দিয়া জোৱান সকলক শ্ৰদ্ধাঞ্জলি জনাই বন্তি প্ৰজ্বলন কৰে । লগতে অনুষ্ঠানটোত উপস্থিত সকলো ব্যক্তিয়ে মৌণ প্ৰাৰ্থনা কৰি ভাৰতীয় সেনা বাহিনীৰ  শ্বহীদ জোৱান সকলক স্মৰণ কৰে ।

দৰং: চ’ছিয়েল মিডিয়াত ছিপাঝাৰ সমষ্টিৰ বিধায়ক বিনন্দ কুমাৰ শইকীয়াৰ  বিৰুদ্ধে অশ্লীল মন্তব্য কৰি ৰঙাঘৰৰ আলহী  দৰঙৰ এজন যুৱক ৷ বিজেপি যুৱ মৰ্চাৰ সদস্যৰ এজাহাৰৰ ভিত্তিত যুৱকজনক আটক কৰে ছিপাঝাৰ আৰক্ষীয়ে ৷ ফেইচবুকত  ছিপাঝাৰৰ সমষ্টিৰ বিধায়ক বিনন্দ কুমাৰ শইকীয়াৰ বিৰুদ্ধে অশ্লীল  মন্তব্যৰে আক্ৰমণ কৰিছিল যুৱকজনে ৷ আনহাতে বিধায়ক বিনন্দ কুমাৰ শইকীয়াৰ লগতে বিজেপি ৰ কৰ্মকর্তাক উদ্দেশ্যি ফেইচবুকত অশ্লীল  মন্তব্য কৰিছিল যুৱক জনে ৷আটক কৰা যুৱক জন ছিপাঝাৰ সমষ্টিৰ বটাবাৰীৰ    প্ৰাণজিৎ ডেকা ওৰফে প্ৰাণজিৎ পৰান ৷ নিজ গৃহ বটাবাৰীৰ পৰা  ছিপাঝাৰ আৰক্ষীয়ে আটক কৰে যুৱক জনক ৷ সম্প্ৰতি যুৱ মৰ্চাৰ এজাহাৰৰ ভিত্তিত যুৱকজনৰ  ওপৰত এটা গোছৰ ৰুজু কৰি জেল হাজোতলৈ প্ৰেৰণ কৰিছে ছিপাঝাৰ আৰক্ষীয়ে ৷

নাজিৰা : বিজ্ঞান প্ৰযুক্তি বিদ্যাৰ চৰম উৎকৰ্ষৰ  যুগত আজিও এচাম লোকে অন্ধবিশ্বাসৰ কৱলত পৰি ডাইনী সন্দেহতে  জঘন্য ঘটনা সংঘটিত কৰিছে। তেনে এক  অন্ধবিশ্বাসৰ কৱলত পৰি  নাজিৰাৰ বিহুবৰ ওপৰ নামচাই এলেকাত এচাম উম্মত্ত লোকে ডাইনীৰ সন্দেহত বাদল চাউৰা (৬০) এজন ব্যক্তিক লাঠিৰে মৰিয়াই মৰিয়াই হত্যাৰ চেষ্টা চলোৱা ঘটনাক কেন্দ্ৰ কৰি যোৱা কালি নিশাৰে পৰা অঞ্চলটোত তীব্ৰ চাঞ্চল‍্যৰ সৃষ্টি হৈছে। উত্তেজিত ৰাইজে ব‍্যক্তিজনক ঘৰৰ পৰা বাহিৰলৈ  উলিয়াই প্ৰচণ্ড মাৰপিট কৰাত তেওঁৰ অৱস্থা সংকটজনক হৈ পৰে।ইফালে এই ঘটনাৰ খৱৰ পাই নাজিৰা চক্ৰ আৰক্ষী বিষয়া দিপক সুত্ৰধৰ, বিহুবৰ থানাৰ ভাৰপ্ৰাপ্ত বিষয়া পাৰ্থ সিংগাম আৰু সহ পৰিদশক ৰিতুল দাসৰ  নেতৃত্বত আৰক্ষী আৰু অৰ্ধ-সামৰিক বাহিনীৰ এটি বৃহৎ দলে ঘটনাস্থলীত উপস্থিত হয়। আৰক্ষীয়ে  উম্মত্ত জনতাৰ কৱলৰ পৰা মুমুষ অৱস্থাত ভুক্তভোগী বাদল চাউৰাক উদ্ধাৰ কৰি ততালিকে শিৱসাগৰ অসামৰিক চিকিৎসালয়লৈ প্ৰেৰণ কৰে। ডাইনীৰ সন্দেহত বাদল চাউৰাক হত‍্যাৰ অপচেষ্টা চলোৱা উম্মত্ত ৰাইজক নিয়ন্ত্ৰণ কৰিবলৈ আৰক্ষীয়ে যথেষ্ট কষ্ট কৰিব লগা পৰিস্থিতিৰ উদ্ভৱ হয়।এনে এক পৰিস্থিতিৰ মাজতে কালি নিশাই আৰক্ষীয়ে এই ঘটনাৰ লগত জড়িত  গোবিন চাউৰা,আনন্দ চাউৰা,ৰাজু চাউৰা,অনিল চাউৰা,শিৱা চাউৰা নামৰ যুৱককেইজনক ঘটনাস্থলীৰ পৰা আটক কৰে । কিন্তু  অঞ্চলটোৰ একাংশ ৰাইজে উক্ত যুৱককেইজনক আটক কৰাত বাধা প্ৰদানৰ চেষ্টা কৰাৰ লগতে পৰৱৰ্তী সময়ত বিহুবৰ থানা চৌহদত উপস্থিত হৈ এক হুলস্থুলীয়া পৰিবেশৰ সৃষ্টি কৰে ।একাংশ উত্তেজিত ৰাইজে যুৱককেইজনক মুকলি কৰি দিবলৈ দাবী জনাই থানা ঘেৰাও কৰে যদিও আৰক্ষীয়ে পৰিস্থিতি নিয়ন্ত্ৰণ কৰিবলৈ সক্ষম হয়। ইফালে সমগ্ৰ ঘটনাৰ সন্দৰ্ভত বিহুবৰ আৰক্ষীয়ে তদন্ত অব‍্যাহত ৰখাৰ লগতে আজি শিৱসাগৰ জিলা সহকাৰী আৰক্ষী অধীক্ষক জয়ন্ত সাৰথি বৰা বিহুবৰত উপস্থিত হৈ পৰিস্থিতি পৰ্য্যালোচনা কৰে ।আনহাতে যোৱা নিশা  আৰক্ষীয়ে আন  এক অভিযান চলাই এই ঘটনাৰ লগত জড়িত অঞ্চলটোৰ যশমিল চাউৰা, মহেশ চাউৰা, বিপদ চাউৰা, আৰু তীৰনাথ চাউৰাক গ্ৰেপ্তাৰ কৰে। ধৃত আটাইকেইজন অভিযুক্তৰ বিৰুদ্ধে গোচৰ ৰজু কৰি বৰ্তমান জেল হাজোতলৈ প্ৰেৰণ কৰে ।

দৰং: আজি আন্তৰাষ্ট্ৰীয় যোগ দিৱস ৷ সমগ্ৰ দেশৰ লগতে দৰঙতো পালন কৰা হয় ৬ষ্ঠ আন্তৰাষ্ট্ৰীয় যোগ দিৱস ৷ দৰঙৰ পশ্চিম মংগলদৈ যৌগিক চিকিৎসালয় আৰু যৌগিক মহাবিদ্যালয়ৰ লগতে দৰং যোগ শিক্ষক সংস্থাই পালন কৰে আন্তৰাষ্ট্ৰীয় যোগ দিৱসটি ৷ বিশ্বত্যাস মহামাৰি কৰ’ণা ভাইৰাছৰ বাবে চৰকাৰৰ নিষেধাজ্ঞা বলবৎ হৈ থকাত চৰকাৰৰ অনুমতি সাপেক্ষে অনুষ্টুপীয়াকৈ পালন কৰা হয় যোগ দিৱসটি ৷ পুৱা বন্তি প্ৰজ্বলন , গছপুলি ৰোপণ আৰু সমুহীয়া যোগ অনুশিলনেৰে যোগ দিৱস পালন কৰা হয় ৷ বৃক্ষৰোপণ কাৰ্যসূচীত অংশগ্ৰহণ কৰে যোগ প্ৰশিক্ষক পবিত্ৰ প্ৰাণ ডেকা আৰু হিমাংশু ডেকাই ৷ বন্তি প্ৰজ্বলন কৰে গোপাল বেজবৰুৱাই ৷ সমুহীয়া যোগ অনুশীলন কাৰ্যসূচীত মুখ্য পৰিচালক হিচাৱে অংশগ্ৰহণ কৰে  হিমালয় শৰ্মা , যোগবিদ পশ্চিম মংগলদৈ যোগ মহাবিদ্যালয় ৷

নলবাৰী : ভাৰতীয় সেনা বাহিনীক চীনে সীমাত ষড়যন্ত্ৰ ৰচিত কৰি নিহত কৰা বাবে সমগ্ৰ ভাৰতবৰ্ষৰ জনগনই শ্বহিদ সকলৰ আত্মাৰ চিৰ শান্তিৰ বাবে অশ্ৰু ভৰা শ্ৰদ্ধাঞ্জলি অৰ্পন কৰাৰ লগতে আজি হিন্দু ক্ৰান্তি দল নলবাৰী জিলা সমিতিয়েও পুষ্পাঞ্জলি অৰ্পন কৰি শ্ৰদ্ধাঞ্জলি জ্ঞাপন কৰে । আৰু বিগত সময় চোৱাত চিৰ বৈৰী চীনৰ সা সামগ্ৰী বয়কত কৰাৰ উদ্দেশ্যে আজি এক সংবাদ মেল অনুষ্ঠিত কৰে । উক্ত সংবাদ মেলত হিন্দু ক্ৰান্তি দল নলবাৰী জিলা সমিতিৰ সংযোজক নিৰ্মল ৰাজবংশীয়ে কয় যে এজন ব্যাক্তি বা এখন দেশ ইতিবাচক দিশেৰে যিমানেই শক্তিশালী ৰুপত সমাজৰ আগত ধৰা দিব ,সিমানেই সেই ব্যাক্তিজনৰ নাইবা সেই দেশখনৰ বিৰুদ্ধে ৰচনা কৰা হব এটাৰ পাচত আন এটা ষড়যন্ত্ৰ । লগতে সংযোজক গৰাকীয়ে পুনৰ কয় যে,চীন দেশে সস্তীয়া বস্তুুৰ প্ৰলোভন প্ৰদান কৰি  ভাৰতৰ বজাৰ দখল কৰি স্থানীয় ক্ষুদ্ৰ উদ্যোগ বন্ধ কৰি অসম তথা ভাৰতত নিবনুৱা সমস্যাৰ সৃষ্টি কৰিছে । আমি কিনা চিনা সামগ্ৰীৰ ধনেৰে চীনে পাকস্তানক গুলি বোমা যোগান ধৰে । যি বোমা বাৰুদে আামাৰ জোৱান সকলৰ বুকু বিদাৰিছে । অতিকৈ গুৰুত্ব পুৰ্ণ কথাতো হল অসমৰ আয়ুস ৰেখা মহাবাহু ব্ৰহ্মপুত্ৰৰ ওপৰত বান্ধ নিৰ্মান কৰি অসম বা ভাৰতবৰ্ষক মৰুভূমিলৈ ৰপান্তৰ কৰিব বিচাৰিছে।যিখন দেশে ভাৰতবৰ্ষক NSG গ্ৰুপত অন্তৰ্ভুক্তিৰ বাবে বাৰে বাৰে হেঙাৰ হিচাবে থিয় দি আছে।যিখন দেশে অসমৰ  আকচাই চীন নামেৰে অসমৰ ভূ গৰ্ভ এতিয়াও দখল কৰি আছে,যিখন দেশে ভাৰত আৰু অসম বিৰোধী শক্তিক আশ্ৰয় আৰু সাহায্য প্ৰদান কৰি আহিছে।সেয়েহে হিন্দু ক্ৰান্তি দলৰ আহ্বান যিসকল লোকে শীত তাপ,ধুমুহাকো নেওচি আমাক সুৰক্ষা দি আছে,তেওলোকক যদি কিঞ্চিতমানো  ভাল পাই তেন্তে চীনা সামগ্ৰী ক্ৰয় কৰাৰ পৰা বিৰত থাকক।চীনা সামগ্ৰী ক্ৰয় কৰি অসম বা ভাৰত বিৰোধী কামৰ আংশীদাৰ নহব।চীনৰ এপদ বস্তু কিনা মানে  পাকিস্তানৰ এটা গুলি দাম দিয়া।লগতে সংযোজক গৰাকীয়ে ভাৰতৰ প্ৰধান মন্ত্ৰীলৈ আহ্বান জনাই যে সমগ্ৰ অসম তথা ভাৰতবৰ্ষৰ গাৱে ভূৱে ক্ষুদ্ৰ উদ্যোগ গঢ়ি তুলিব লাগে যত দেশৰ নিবনুৱা আৰু অৰ্থনৈতিক সমস্যাৰ পৰা হাত সাৰিব পৰা যাব।