শিৱসাগৰ

 ক’ভিড-১৯ৰ বিৰুদ্ধে চলি থকা যুঁজখনত জনসাধাৰণক সজাগ আৰু সচেতন কৰিবলৈ সাংবাদিকসকলে গুৰুত্বপূৰ্ণ ভূমিকা পালন কৰিছে৷ এই মন্তব্য ৰাজ্যিক মাদকদ্ৰব্য নিবাৰণী পৰিষদৰ উপাধ্যক্ষা লাকী গগৈৰ। মঙলবাৰে শিৱসাগৰ প্ৰেছ ক্লাবত সাংবাদিকসকলৰ মাজত মাস্ক আৰু হেণ্ড ছেনিটাইজাৰ প্ৰদান কৰি উপাধ্যক্ষাগৰাকীয়ে আৰু কয়, সাংবাদিকসকলে এই দুৰ্যোগৰ সময়ত নিজৰ জীৱন আৰু পৰিয়ালৰ বিপৰ্যয়ৰ কথা নাভাবি প্ৰতি মুহূৰ্তৰ খবৰ জনসাধাৰণৰ মাজলৈ আগবঢ়াই নিছে। সেয়েহে তেওঁলোকৰ কৰ্মৰ প্ৰতি শ্ৰদ্ধা আৰু সন্মান জনাই তেওঁলোকক কিছু উৎসাহ দিবৰ বাবেই এই কাৰ্যসূচী হাতত লৈছ। মঙলবাৰে শিৱসাগৰ প্ৰেছ ক্লাবত জিলাখনৰ অৰ্ধ শতাধিক সাংবাদিকৰ মাজত ৰাজ্যিক মাদকদ্ৰব্য নিবাৰণী পৰিষদৰ উপাধ্যক্ষা লাকী গগৈয়ে আবকাৰী বিভাগৰ দ্বাৰা নিৰ্মিত হেণ্ড ছেনিটাইজাৰ আৰু খাদী মাস্ক বিতৰণ কৰে। এই কাৰ্যসূচীত জিলা মিডিয়া কোষৰ বিষয়ববীয়া সমীৰণ বৰদলৈয়ে সহযোগিতা আগবঢ়ায়। কাৰ্যসূচীত সমাজসেৱীকা ইপ্সিতা বৰুৱাও উপস্থিত থাকে। শিৱসাগৰ প্ৰেছ ক্লাবত উপস্থিত হৈ সাংবাদিকসকলৰ মাজত ছিনিটাইজাৰ আৰু খাদী মাস্ক বিতৰণ কৰাৰ বাবে ক্লাবৰ সাধাৰণ সম্পাদক ইনামুল হাজৰিকা আৰু ই-মিডিয়া সন্থাৰ সভাপতি অতনু বৰাই ধন্যবাদ জ্ঞাপন কৰে।

টীয়ক

নিজৰ জীৱনৰ অধিক সময় যি আনৰ বাবে কটায়েই সুখী হয়, যি নিজৰ জীৱনটো আনৰ বিপদত সেৱা কৰি  জীপাল হয় সেয়াই হ’ল ধাত্ৰী বা নাৰ্ছ ৷ নিজৰ ব্যৱস্ততাৰ প্ৰতিটো সময় আনৰ সেৱাত উৎসৰ্গিত এই বৃত্তিয়ে মানব ইতিহসত ৰাখি গৈছে এক সুকীয়া স্থান৷ হয়৷ মঙলবাৰে বিশ্ব ধাত্ৰী দিৱস আধুনিক নাৰ্চিং ব্যৱস্থাৰ বাটকটীয়া ফ্লৰেঞ্চ নাইটিংগেলৰ জন্ম দিনটোত ১৯৭৪ চনৰ পৰা বিশ্ব ধাত্ৰী দিৱস হিচাপে পালন কৰা হয়। উল্লেখ্য যে দ্বিতীয় বিশ্বযুদ্ধৰ সময়ত ফ্ল’ৰেঞ্চ নাইটিংগেলে যুদ্ধ ক্ষেত্ৰত আহতসকলৰ পৰিচৰ্যাত নিজকে উচৰ্গা কৰিছিল। নাইটিংগেলৰ এই মানৱসেৱাৰ কৰ্মস্পৃহাক স্মৰণ কৰি বৰ্তমান সময়ত নাৰ্চসকলক প্ৰেৰণা দিয়াৰ উদ্দেশ্য পালন কৰি অহা হৈছে বিশ্ব ধাত্ৰী দিৱসৰ। দেশ তথা বিশ্বৰ এই জটিল সময়ত এই নাৰ্চসকলে সমগ্ৰ দেশতে ক’ৰোনা ভাইৰাছৰ আতংক আৰু লকডাউন মাজতো মঙলবাৰৰ দিনটোতো নাৰ্চসকলে নিষ্ঠাৰে কৰ্তব্য সম্পাদন কৰি আছে। ইয়াৰ মাজতে টীয়কত দেখা গ’ল এক ব্যতিক্ৰমী দৃশ্য। চেলেংহাটৰ সামাজিক বেচৰকাৰী সংস্থা চেলেংহাট হেলথ ক্লাবে টীয়ক এফআৰএই প্ৰাংগণত আন্তৰ্জাতিক নাৰ্চ দিৱস উপলক্ষে চিকিৎসালয়খনত কৰ্মৰত নাৰ্চসকলক জনালে সম্বৰ্ধনা, বিতৰণ কৰিলে মিঠাই। তদুপৰি নাৰ্চৰ সংঘাতময় জীৱন ভিত্তিত নিৰ্মাণ কৰা চুটি ছবি “যোদ্ধা” চিকিৎসালয়ৰ প্ৰাংগণতে উন্মোচন কৰি নাৰ্চসকলৰ নামত উচৰ্গা কৰে এই বিশেষ দিনটোত।ক’ৰোনা ভাইৰাছৰ সংক্ৰমণৰ এই জটিল সময়ত চিকিৎসকসকলৰ সমান্তৰালভাৱে নাৰ্চসকলে নিজৰ জীৱনৰ লগতে পৰিয়ালকো তুচ্ছ জ্ঞান কৰি জনহিতৰ বাবে কৰা সেৱা মনোভাবক মূল কাহিনী হিচাপে লৈ নিৰ্মিত এই চুটি ছবিখন আনুষ্ঠানিকভাৱে উন্মোচন কৰে টীয়কৰ জ্যেষ্ঠ সাংবাদিক ৰিজু কুমাৰ শইকীয়াই। উক্ত কাৰ্যসূচীত অসমপ্ৰেমী যুৱ-ছাত্ৰ সমাজৰ উপদেষ্টা মনোজ গগৈ, টীয়ক বাণিজ্য সন্হাৰ সম্পাদক অঞ্জন প্ৰকাশ বৰুৱা, চিকিৎসক উমা চুক্বাকে ধৰি কেইবাজনো বিশিষ্ট ব্যক্তি উপস্থিত থাকে।

নগাঁও

ক’ৰোনা ভাইৰাছ সংক্ৰমণ প্ৰতিৰোধৰ বাবে ২৪ মাৰ্চৰ পৰা দেশজুৰি অব্যাহত থকা লকডাউনৰ নীতি নিৰ্দেশনাৰ বাবে সমাজৰ একাংশ লোকৰ জীৱনলৈ নামি আহিছে ঘোৰ অমানিশা। বিশেষকৈ লকডাউন আৰম্ভ হোৱা সময়ৰ পৰা শব্দযন্ত্ৰী আৰু ছেলুন ব্যৱসায়ৰ লগত জড়িত লোকসকলৰ জীৱন জীৱিকাৰ পথ প্ৰায় বন্ধ হৈ পৰিছে। লকডাউনৰ বাবেই নগাঁও জিলাৰ বিভিন্ন প্ৰান্তত থকা শব্দযন্ত্ৰীসকলৰ ভীষণ সমস্যাৰ সৃষ্টি হৈছে৷ লকডাউনৰ বাবে এইবাৰ ৰাজ্যখনৰ আন জিলাৰ লগতে নগাঁও জিলাতো ৰঙালী বিহু উদযাপন কৰা নহ’ল। ৰঙালী বিহুৰ সময়ত সাধাৰণতে জিলাখনৰ বিভিন্ন স্থানত সাংস্কৃতিক অনুষ্ঠান অনুষ্ঠিত হয়। এই সাংস্কৃতিক অনুষ্ঠানৰ জৰিয়তে গায়কসকলৰ লগতে শব্দযন্ত্ৰীসকলে উপাৰ্জনৰ পথ উলিয়ায়৷ এইবাৰ লকডাউনৰ বাবে সেয়া সম্ভৱ হৈ নুঠিল। তৃতীয় পৰ্যায়ৰ লকডাউনত ৰাজ্য চৰকাৰে কিছু কিছু ক্ষেত্ৰত শিথিলতা আনি দিছে যদিও ছেলুন, বিউটি পাৰ্লাৰ বন্ধ হৈ আছে। ছেলুন, বিউটি পাৰ্লাৰ, স্পা আদি লকডাউনৰ বাবে বন্ধহৈ থকাত এওঁলোকৰ জীৱিকা নিৰ্বাহৰ ক্ষেত্ৰত হাহাকাৰ সৃষ্টি হৈছে৷ বিভিন্ন জনে ব্যক্তিগতভাৱে এওঁলোকক সহায়ৰ হাত আগবঢ়াইছে যদিও এওলোকৰ বহুতে চৰকাৰী সাহায্য লাভ কৰা নাই। এইসকল শব্দযন্ত্ৰী আৰু ছেলুন ব্যৱসায়ৰ লগত জড়িত লোকক কিছু সকাহ দিয়াৰ উদ্দেশ্যে আগবাঢ়ি আহে নগাঁও সদৰ সমষ্টিৰ বিধায়ক ৰূপক শৰ্মা। মঙলবাৰে নগাঁও চৰকাৰী উচ্চতৰ মাধ্যমিক বালিকা বিদ্যালয়ত পৃথকে পৃথকে হোৱা অনুষ্ঠানত বিধায়কগৰাকীয়ে শব্দযন্ত্ৰী আৰু ছেলুন ব্যৱসায়ৰ লগত জড়িত লোকসকলক অত্যাৱশ্যকীয় খাদ্য সামগ্ৰী বিতৰণ কৰে। এই সন্দৰ্ভত বিধায়ক শৰ্মাই সংবাদ মাধ্যমৰ আগত কয়, লকডাউনৰ বাবে শব্দযান্ত্ৰী আৰু ছেলুন ব্যৱসায়ৰ লগত জড়িত লোকসকলৰ অতি কষ্ট হৈছে। জীৱন জীৱিকাৰ ক্ষেত্ৰত বহু সমস্যাৰ সৃষ্টি হৈছে। এই সংকটৰ সময়ত আমি তেওঁলোকক কিছু সকাহ দিয়াৰ প্ৰয়াস কৰিছো। এই লোকসকলক পাৰ্যমানে সহায়ৰ হাত আগবঢ়াবলৈ সকলোকে আহবান জনাইছে বিধায়ক ৰূপক শৰ্মাই। শতাধিক শব্দযন্ত্ৰী আৰু পাছ শতাধিক ছেলুন ব্যৱসায়ৰ লগত জড়িত লোকক খাদ্য সামগ্ৰী বিতৰণ কৰে বিধায়কগৰাকীয়ে। বিধায়ক গৰাকীৰ এনে পদক্ষেপক সকলোৱে প্ৰশংসা কৰিছে।