নলবাৰী

আজি ঘোষিত হাইস্কুল শিক্ষান্ত পৰীক্ষাত নলবাৰী চহৰৰ পৰা দুগৰাকী তথা নলবাৰী বৰভাগ অঞ্চলৰ তিনি শিক্ষানুষ্ঠানৰ পৰা চাৰিটাকৈ কৃতি শিক্ষাৰ্থীয়ে ছয় টাকৈ স্থান দখল কৰি গৌৰৱ কঢ়িয়াই আনিলে নলবাৰী জিলালৈ ৷ শংকৰদেৱ শিশু বিদ্যা নিকেতন, বৰভাগৰ ছাত্ৰ জ্যোতিস্মান দেৱশৰ্মাই তৃতীয় স্থান দখল কৰি সুনাম অৰ্জন কৰে ৷ কৰিয়া উচ্চতৰ মাধ্যমিক বিদ্যালয়ৰ ছাত্ৰ হিৰকজ্যোতি বৈশ্যই পঞ্চম স্থান লাভ কৰি গৌৰৱ কঢ়িয়াই আনে সমগ্ৰ অঞ্চলটোলৈ ৷ আনহাতে বাহাৰঘাটৰ শংকৰদেৱ শিশু নিকেতনৰ দুই ছাত্ৰ মাচুম  মেহতাব আৰু ইমন বৈশ্যই  নৱম স্থান দখল কৰি গৌৰৱ কঢ়িয়াই আনে ৷  শংকৰদেৱ শিশু নিকেতন, বৰভাগৰ ছাত্ৰ জ্যোতিস্মান দেৱশৰ্মাই ৫৯১ নম্বৰ লাভ কৰি তৃতীয় স্থান লাভ কৰে ৷ তেওঁ অসমীয়াত ৯৭, ইংৰাজীত ১০০, সাধাৰণ গণিতত ১০০, উচ্চ  গণিতত ১০০, সাধাৰণ বিজ্ঞানত ৯৮ আৰু সমাজ বিজ্ঞানত ৯৬ নম্বৰ লাভ কৰে ৷ বৰভাগৰ বৰৰা গাওঁ নিবাসী শিক্ষক কুলেশ্বৰ শৰ্মা আৰু ৰীতা দেৱীৰ পুত্ৰ জ্যোতিস্মানে নিতৌ ৮-৯ পঢ়ি আশা কৰামতে ফল লাভ কৰা বুলি কয় ৷ ভৱিষ্যতে এগৰাকী চিকিৎসক হোৱাৰ মন আছে বুলি কয় ছাত্ৰজনে ৷ আনহাতে চতুৰ্থ স্থান লাভ কৰিছে নলবাৰীৰ নমস্যা ডেকাই ৷ ত্ৰৈলোক্য ডেকা আৰু দিপ্তী ডেকাৰ একমাত্ৰ ছোৱালী নমস্যা ৷ ছাত্ৰী গৰাকীয়ে ইংৰাজীত ৯৯ অসমীয়াত ৯৫ গণিতত ৯৯ উচ্চ গণিতত ১০০ বিজ্ঞানত ১০০ আৰু সমাজবিজ্ঞান বিষয়ত ৯৭ নম্বৰ লাভ কৰি সৰ্বমুঠ ৫৯০ নম্বৰ অৰ্জন কৰিবলৈ সক্ষম হয় । ৰাজ্য খনৰ ভিতৰত চতুৰ্থ স্থান লাভ কৰি নলবাৰী লিটিল ফ্লাৱাৰ স্কুলৰ ছাত্ৰী নমস্যা ডেকাই নলবাৰী বাসীলৈ সুনাম কঢ়িয়াই আনিবলৈ সক্ষম হৈছে ৷ নলবাৰী জিলাৰ সীমান্তৱৰ্তী তথা কামৰূপ জিলাৰ হাবলাখা গাওঁ নিবাসী তথা অম্বিকাগিৰী উচ্চ মাধ্যমিক বিদ্যালয়ৰ প্ৰধান শিক্ষক ফণীধৰ বৈশ্য আৰু  অংগনবাদী কৰ্মী প্ৰতিভা বৈশ্যৰ পুত্ৰ হিৰকজ্যোতিয়ে কৰিয়া উচ্চতৰ মাধ্যমিক বিদ্যালয়ৰ পৰা  ৯৮.১৮ শতাংশ নম্বৰেৰে সৰ্ব্বমুঠ ৫৮৯ নম্বৰ লাভ কৰে ৷ ৰামানুজন জুনিয়ৰ কলেজত অধ্যয়ণ কৰিবলৈ ইচ্ছা প্ৰকাশ কৰা হিৰকজ্যোতি ভৱিষ্যতে এজন চিকিৎসক হোৱাৰ বাসনা থকা বুলি সাংবাদিকৰ আগত প্ৰকাশ কৰে ৷ দৈনিক ৮-৯ ঘণ্টা অধ্যয়ণ কৰা ছাত্ৰজনে তেওঁৰ কৃতিত্বৰ বাবে পিতৃ-মাতৃৰ লগতে শিক্ষাগুৰু সকলৰ অৱদান থকাৰ কথা প্ৰকাশ কৰে ৷ তেওঁ অসমীয়াত ৯৭, ইংৰাজীত ৯৭, সাধাৰণ গণিতত ৯৮, সাধাৰণ  বিজ্ঞানত ১০০, সমাজ বিজ্ঞানত ১০০ আৰু উচ্চ গণিতত ৯৭ নম্বৰ লাভ কৰে ৷শংকৰদেৱ শিশু নিকেতন, বাহাৰঘাটৰ মৌচম মেহতাবে ৫৮৫ নম্বৰ লাভ কৰি নৱম স্থান দখল কৰিবলৈ সক্ষম হয় ৷ তেওঁ অসমীয়াত ৯৭, ইংৰাজীত ৯৭, সাধাৰণ গণিতত ৯৭, সমাজ বিজ্ঞানত ৯৮, উচ্চ গণিতত ৯৯ আৰু সাধাৰণ বিজ্ঞানত ৯৭ নম্বৰ লাভ কৰে ৷ বাৰাংহাটী গাওঁ নিবাসী তথা বাৰাংহাটী প্ৰাথমিক স্বাস্থ্য কেন্দ্ৰৰ ফাৰ্মাচিষ্ট চাদেক আলী আৰু মফিদা মল্লিকৰ পুত্ৰ মাচুম মেহতাবে নিতৌ ১০ ঘণ্টাকৈ পঢ়িছিল ৷ এগৰাকী চিকিৎসক হোৱাৰ সপোন আছে মাচুমৰ ৷ শংকৰদেৱ শিশু নিকেতন ,বাহাৰঘাটৰ দ্বিতীয়গৰাকী নৱম স্থান লাভ কৰা ছাত্ৰ ইমন বৈশ্য ৷ ইমন বৈশ্যই ৫৮৫ নম্বৰ লাভ স্থান দখল কৰে ৷ তেওঁ অসমীয়াত ৯৩, ইংৰাজীত ৯৯, সাধাৰণ গণিতত ৯৬, সাধাৰণ বিজ্ঞানত ১০০, সমাজ বিজ্ঞানত ৯৮আৰু উচ্চ গণিতত ৯৯ নম্বৰ লাভ কৰে ৷ বৰভাগ ৰাজহ চক্ৰৰ অন্তৰ্গত বৰখালা গাওঁ নিবাসী অৰ্থনীতি আৰু পৰিসংখ্যা বিভাগৰ কৰ্মচাৰী খগেন চন্দ্ৰ বৈশ্য আৰু উষা বৈশ্যৰ পুত্ৰ ইমনে দৈনিক ৬-৭ ঘণ্টা পঢ়িছিল ৷ আশা কৰা মতে তেওঁ ফলাফল লাভ কৰা বুলি প্ৰকাশ কৰে ৷ তেৱোঁ  ভৱিষ্যতে এগৰাকী চিকিৎসক হোৱাৰ বাসনা মনত পুহি ৰাখিছে ৷ সমান্তৰালভাৱে ৰাজ্যৰ খনৰ ভিতৰত দশম স্থান লাভ কৰিবলৈ সক্ষম হৈছে শশাংক হালৈ  ৷ শশাংক হালৈ জগদীশ হালৈ আৰু   হিৰন হালৈৰ একমাত্ৰ পুত্ৰ ৷ নলবাৰী আনন্দ বিদ্যা নিকেতনৰ উত্তীৰ্ণ হোৱা শশাংকই সৰ্বমুঠ ৫৮৪ নম্বৰ লাভ কৰে । ছাত্ৰ গৰাকীয়ে সাধাৰণ গণিতত ১০০ অসমীয়াত ৯২ ইংৰাজীত ৯৮ বিজ্ঞানত ৯৮ সমাজবিজ্ঞানত ৯৯ আৰু উচ্চ গণিতত ৯৭ নম্বৰ লাভ কৰে । ছাত্ৰ গৰাকীয়ে ভৱিষ্যতে এজন সুদক্ষ চিকিৎসক হোৱাৰ আশা মনত পুহি ৰাখিছে । আটাইকেইগৰাকী ছাত্ৰ ছাত্ৰীকে আজি বিভিন্ন দল সংগঠনৰ লগতে বিভিন্ন সামাজিক অনুষ্ঠানে উষ্ম অভিনন্দন জনায় ৷

অজয় ডেকা,মঙলদৈ

সন্তানক চহৰৰ যান্ত্ৰিকতাৰ পৰা আঁতৰত ৰাখি গাঁৱৰ পৰিবেশৰ মাজতে সংগোপনে শিক্ষাৰ ক্ষেত্ৰ খনত  আগবঢ়াই নিয়া দুটি সন্তানৰ পিতৃ মাতৃয়ে আজি আনন্দৰ বন্যা বোৱাবলৈ সক্ষম হ’ল৷অকল পিতৃ মাতৃয়ে নহয় সেই অঞ্চলটোতো আজি বিৰাজ কৰিছে এক আনন্দ উৎসৱ মুখৰ পৰিবেশ৷ আকৌ এবাৰ প্ৰমান কৰিলে সেই দুই সন্তানৰ পিতৃ মাতৃয়ে নিজৰ সন্তানক সু- শিক্ষিত কৰি গঢ়ি তুলিবলৈ চহৰৰ কোনো যান্ত্ৰিকতাৰ মাজলৈ যোৱাৰ প্ৰয়োজন নাই৷ আৰু তাক বাস্তৱত প্ৰতিপন্ন কৰি দেখুৱালে সেই কেইগৰাকী পিতৃ মাতৃৰ দুই সন্তান ধৃতিৰাজ আৰু ভৃগুমোহনে৷ সদ্যঘোষিত হাইস্কুল শিক্ষান্ত পৰীক্ষাত প্ৰথম স্থান আৰু নৱম স্থান লাভ কৰি সমগ্ৰ দৰঙৰ লগতে ঐতিহাসিক পথৰুঘাটলৈ গৌৰৱ কঢ়িয়াই আনিলে বৰমপুৰ জাতীয় বিদ্যালয়ৰ ছাত্ৰ ধৃতিৰাজ বাস্তৱ কলিতা আৰু শ্ৰীমন্ত শংকৰদেৱ বিদ্যালয়ৰ ছাত্ৰ ভৃগুমোহন কুমাৰে।সদ্য ঘোষিত হাইস্কুল শিক্ষান্ত পৰীক্ষাত ৰাজ্যৰ ভিতৰতে শীৰ্ষ স্থান লাভ কৰাৰ পাছত আনন্দমুখৰ হৈ পৰিছে ধৃতিৰাজৰ বাসগৃহৰ লগতে দৰং বাসী। প্ৰথম স্থান লাভ কৰি দৰঙলৈ গৌৰৱ কঢ়িয়াই অনা দৰং জিলাৰ বানেকুছি জাতীয় বিদ্যালয়ৰ ছাত্ৰ তথা পদুম পুখুৰী উচ্চ মাধ্যমিক বিদ্যালয়ৰ পৰা পৰীক্ষাত উত্তীৰ্ণ হোৱা  ধৃতিৰাজ বাস্তৱ কলিতাই  ৫৯৫ (৯৯.১৭)নম্বৰ লাভ কৰি  প্ৰথম স্থানেৰে  সমগ্ৰ দৰং জিলালৈ গৌৰৱ কঢ়িয়াই অনা দৰঙৰ প্ৰথম গৰাকী ছাত্ৰ৷ পঢ়াৰ কোনো ধৰনৰ সময়সুচী নোলোৱাকৈ একাগ্ৰতাৰে পঢ়াত মনোনিৱেশ কৰি শীৰ্ষস্থান লাভ কৰিবলৈ সক্ষম হোৱা ধৃতিৰাজ ভৱিষ্যতে এগৰাকী সু-চিকিৎসক হোৱাৰ সপোন পুহি ৰাখিছে৷ বৰমপুৰ উচ্চতৰ মাধ্যমিক বিদ্যালয়ৰ শাৰীৰিক ব্যাম বিভাগৰ প্ৰক্ষিশক নৱ কুমাৰ কলিতা আৰু টুলুমনি কলিতাৰ সন্তান ধৃতিৰাজ বাস্তৱ কলিতাই বৰমপুৰ জাতীয় বিদ্যালয়ত অংকুৰ শ্ৰেণীৰ পৰা প্ৰাথমিক শিক্ষা আৰম্ভ কৰি মেট্ৰিক পৰীক্ষাত অৱতীৰ্ণ হৈ ৰাজ্যৰ ভিতৰতে শীৰ্ষস্থান লাভ কৰি দৰং জিলালৈ গৌৰৱ কঢ়িয়াই অনাৰ লগতে জাতীয় বিদ্যালয় খনৰো নাম উজ্জ্বলাই তুলিলে৷ ধৃতিৰাজ বাস্তৱ কলিতাই অসমীয়াত ৯৮, ইংৰাজীত ৯৯, সাধাৰণ গনিতত ১০০ ,সমাজ বিজ্ঞানত ৯৮, আৰু উচ্চ গনিতত ১০০ নম্বৰসহ মুঠ ৫৯৫ নম্বৰ লাভ কৰিবলৈ সক্ষম হয়৷ ধৃতিজৰৰ পিতৃ মাতৃয়ে আমাৰ সংবাদিকক  জনোৱা অনুসৰি কোনো ধৰনৰ ঘৰুৱা টিউচন নোলোৱাকৈ বিদ্যালয়ৰ শিক্ষক সকলৰ পৰা পোৱা শিক্ষাৰে এনে কৃতিত্ব লাভ কাৰৰ লগতে টিভি চোৱা আৰু মোবাইলৰ প্ৰতি কোনো ধৰনৰ ৰাপ নাই বুলি জনোৱাৰ লগতে মোবাইলটো কেৱল পঢ়াৰ ক্ষেত্ৰতহে ব্যৱহাৰ কৰিছিল বুলি অৱগত কৰে৷ ইফালে নৱম স্থান লাভ কৰি দৰঙলৈ গৌৰৱ কঢ়িয়াই আনিলে দৰঙৰ শ্ৰীমন্ত শংকৰদেৱ বিদ্যালয়ৰ ছাত্ৰ ভৃগু মোহন কুমাৰে । ৫৮৫ নম্বৰ লাভ কৰি এই নৱম স্থান দখল কৰে দৰঙৰ ছাত্ৰ গৰাকীয়ে ।অসমীয়াত ৯৮ ইংৰাজীত ৮২ অংকত ৯০ বিজ্ঞানত ৯০ উচ্চ গনিতত ৯০ আৰ সমাজ বিজ্ঞানত ৮৮, (৯৭.৫) শতাংশ নম্বৰ লাভ কৰি ছাত্ৰজনে অসমৰ ভিতৰত নৱম স্থান লাভ কৰিবলৈ সক্ষম হয়৷ দৰঙৰ বৈৰাগীপাৰা নিবাসী তথা বেজভাগৱতী উচ্চ মাধ্যমিক বিদ্যালয়ৰ শিক্ষক চন্দ্ৰ কুমাৰ আৰু বিজয়া বৰুৱা কুমাৰৰ পুত্ৰ তথা শ্ৰীমন্ত শঙ্কৰদেৱ  বিদ্যালয়ৰ ছাত্ৰ গৰাকীৰ ফলাফলত উৎফুল্লিত বিদ্যালয় খনৰ শিক্ষক শিক্ষয়িত্ৰী,ছাত্ৰ ছাত্ৰী  তথা  দৰংবাসী ৷ভৃগুমোহনে জনোৱামতে প্ৰতিদিনে পঢ়িছিল ১৬/১৮ ঘন্টা পঢ়াৰ লগতে ভবিষ্যতে এগৰাকী প্ৰশাসনিক বিষয়া হোৱাৰ মন পুহি ৰাখিছে৷ তিনিটা বিষয়ত ঘৰুৱা শিক্ষকৰ সহায় লোৱা ভৃগু মোহন কুমাৰে যুৱ সমাজক আহ্বান জনায় চ’ছিয়েল মিডিয়া ব্যৱহাৰ কৰি নিজৰ জীৱন ধংস কৰাৰ বিপৰীতে জীৱনৰ মুল্যবান সময়খিনি উদ্ভাৱনত ব্যৱহাৰ কৰিবলৈ ৷ ছাত্ৰ গৰাকীৰ সাফল্যত উৎসাহিত হৈ দৰঙৰ বিভিন্ন প্ৰান্তৰ লোক তথা দল সংগঠনে ছাত্ৰ দুগৰাকীক আদৰনী জনাই৷ বিশেষকৈ মঙলদৈ বিধানসভা সমষ্টিৰ যুৱ বিধায়ক গুৰুজ্যোতি দাস, ছিপাঝাৰ বিধানসভা সমষ্টিৰ বিধায়ক বিনন্দ কুমাৰ শইকীয়া, দৰং জিলাৰ উপায়ুক্ত দিলীপ কুমাৰ বৰা, জিলা শিক্ষা বিষয়া জৱাহিৰা টাবাচুম, অসম সাহিত্য সভাৰ প্ৰধান সম্পাদক যাদৱ শৰ্মা , মঙলদৈ লোকসভা সমষ্টিৰ প্ৰাক্তন সাংসদ মাধৱ ৰাজবংশী, দৰঙৰ জ্যেষ্ঠ সাংবাদিক ভাৰ্গৱ কুমাৰ দাস, দৰং জিলা সাহিত্য সভাৰ সভাপতি শৈলেন্দ্ৰ কুমাৰ ৰাজবংশী, প্ৰাক্তন সম্পাদক মুকুট হাজৰিকা,মঙলদৈ আঞ্চলিকৰ সম্পাদক দীপেন্দ্ৰ নাৰায়ন কোঁৱৰ,ৰানা আলম, দৰং জিলা ছাত্ৰ সন্থাৰ সভাপতি খনিন্দ ৰাজবংশী উপ সভাপতি নিৰঞ্জন শইকীয়া সাধাৰন সম্পাদক পৰাগ কুমাৰ চহৰীয়া, অসম জাতীয়তাবাদী যুৱ ছাত্ৰ পৰিষদৰ দৰং জিলা সমিতি, আছুৰ কেন্দ্ৰীয় কাৰ্য্যনিৰ্বাহক অৰুপ কলিতা,দৰং জিলা শ্ৰীমন্তশঙ্কৰদেৱ সংঘ, বিশিষ্ট সমাজকৰ্মী গৌতম চহৰীয়া,বিজেপি নেতা প্ৰনৱ বৰুৱাৰ লগতে বিশিষ্ট ব্যক্তি সকল তথা দৰং জিলাৰ বিভিন্ন দল সংগঠনৰ লোক উপস্থিত হৈ দুয়োকে উস্ম আদৰনি জনাই৷ দৰং জিলা প্ৰশাসন আৰু অসম চৰকাৰৰ হৈ দুয়োগৰাকী কৃৰ্তীমানকে জিলা উপায়ুক্তই গামোচা, গ্ৰন্থ, মাস্ক, চেনিটাইজাৰ প্ৰদান কৰি সম্বন্ধনা জ্ঞাপন কৰে৷ 

কলিয়াবৰ

অতি দৰিদ্ৰ পৰিৱেশতেই নিজ প্ৰতিভা আৰু একাগ্ৰতাৰ যোগেদি লাভ কৰা সফলতাই সুগন্ধি বিলাইছে কলিয়াবৰৰ জখলাবন্ধাৰ নাতি দুৰত্বৰ চিকণী-বৰহোলাত। দৰিদ্ৰতাত কক-বকাই থকা কলিয়াবৰৰ চিকণী-বৰহোলাৰ এইজন ছাত্ৰই আজি ঘোষিত হাইস্কুল শিক্ষান্ত পৰীক্ষাত উত্তীৰ্ণ হ’ল সুখ্যাতিৰে। নিজৰ মাটি-ভেটিহীন পিতৃ – মাতৃৰ সন্তান শ্বাকিল আহমেদ চৰকাৰী খণ্ডৰ চিকণী-বৰহোলা উচ্চ মাধ্যমিক বিদ্যায়লত অধ্যয়ন কৰি আটাইকেইটা বিষয়তে লেটাৰ মাৰ্কসহ ৮৬.৩ শতাংশ নম্বৰেৰে ডিষ্টিংচন লাভ কৰি উত্তীৰ্ণ হ’ল। ইংৰাজীত – ৮৪, অসমীয়াত – ৯২, সাধাৰণ গণিতত – ৮৮, সাধাৰণ বিজ্ঞানত ৮১, সমাজ বিজ্ঞানত – ৮০ আৰু ঐচিক হিন্দী বিষয়ত ৮৬ নম্বৰৰে মুঠ ৫১৮ নম্বৰ লাভ কৰিছে। বৰ্তমান শিক্ষা ব‍্যৱস্থা আৰু আন বহু ছাত্ৰ-ছাত্ৰীৰ বাবে ৮৬.৩ % নম্বৰ গুৰুত্বহীন হ’লেও দৰিদ্ৰ পৰিয়ালটিৰ লগতে চুবুৰীয়াক আনন্দিত কৰিছে শ্বাকিলৰ এই সফলতাই। দৰিদ্ৰ ছাত্ৰজনে ভৱিষ‍্যতে ইয়াতকৈও অধিক সফল হৈ পিতৃ-মাতৃৰ লগতে গাঁওখনলৈ গৌৰৱ কঢ়িয়াই আনক। পুণৰবাৰ প্ৰমাণিত হ’ল – সুগন্ধি ফুল য’তেই নাথাকক কিয়, তাৰ সুগন্ধি বিয়পিবই।জখলাবন্ধা বাণিজ‍্যিক কেন্দ্ৰৰ প্ৰায় লগতে লাগি থকা আগতীয়া বাৰিষাৰ পানীয়ে যাতায়তৰ সমস‍্যাৰ সৃষ্টি কৰা এখন গাঁৱৰ বাসিন্দা শ্বাকিলৰ পিতৃয়ে কবিৰাজী কৰি পোহপাল দিয়ে পৰিয়ালটো, আনহাতে মাতৃ মানসিকভাৱে অসুস্থ। তাৰ মাজতেই অতি সীমিত সা-সুবিধাৰ মাজতেই শ্বাকিলে দেখুৱাইছে একাগ্ৰতাৰ অনন‍্য উদাহৰণ। আনহাতে, আজি ঘোষণা কৰা হাইস্কুল শিক্ষান্ত পৰীক্ষাৰ ফলাফলত পুণৰ ব‍্যক্তিগত খণ্ডৰ বিদ‍্যালয়ে আধিপত‍্য বিস্তাৰ কৰে। কলিয়াবৰৰ অসমীয়া মাধ‍্যমৰ ব‍্যক্তিগত খণ্ডৰ বিদ‍্যালয় ক্ৰমে শিশু বিদ‍্যাপীঠ উচ্চ মাধ‍্যমিক বিদ‍্যালয়, কুঁৱৰীটোল আৰু শঙ্কৰদেৱ শিশু নিকেতন, কলিয়াবৰ তিনিআলিয়ে ১০০% সফলতা লাভ কৰে। ইংৰাজী মাধ‍্যমৰ ব‍্যক্তিগত খণ্ডৰ বিদ‍্যালয় চেণ্ট ৰৱাৰ্টচ হাইস্কুল, জখলাবন্ধা আৰু আয়ুস পাব্লিক স্কুল, জখলাবন্ধাৰে উত্তীৰ্ণৰ হাৰ ১০০%। তাৰ বিপৰীতে চৰকাৰী মাধ‍্যমৰ বিদ‍্যালয় মধ‍্য কলিয়াবৰ উচ্চ মাধ‍্যমিক বালিকা বিদ‍্যালয়ে ১০০% ফলাফলৰে সকলোৰে দৃষ্টি আকৰ্ষণ কৰিবলৈ সক্ষম হৈছে।